ວັນທີ 12 ພະຈິກ 2015 ຜ່ານມາ ທີ່ຫ້ອງວ່າການນະຄອນຫຼວງວຽງຈັນ ໄດ້ຈັດງານຖະແຫຼງຂ່າວຂອງ ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ ຕາງໜ້າອະນຸກຳມະການອະນາໄມປະດັບປະດາຕົວເມືອງ ແລະ ແກ້ໄຂຄວາມແອອັດໃນນະຄອນຫຼວງວຽງຈັນ ກ່ຽວກັບວຽກງານປະດັບປະດາ ເພື່ອການກະກຽມໃຫ້ແກ່ການສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 40 ປີ ແລະ ກອງປະຊຸມສາກົນຕ່າງໆ ໄດ້ກ່າວວ່າ: ເພື່ອເປັນການຫ້າງຫາກະກຽມວຽກງານອະນາໄມ ແລະ ປະດັບປະດາຕົວເມືອງ ໃຫ້ມີຄວາມເປັນລະບຽບຮຽບຮ້ອຍ ຕ້ອນຮັບວັນສຳຄັນຂອງຊາດ ໂດຍສະເພາະແມ່ນວັນສະຖາປະນາ ສປປ ລາວ ຄົບຮອບ 40 ປີ (ວັນທີ 2 ທັນວາ) ທີ່ກຽມຈະສະຫຼອງໃຫຍ່ ໃນທ້າຍປີ 2015 ແລະ ການກະກຽມເປັນເຈົ້າພາບກອງປະຊຸມສຸດຍອດອາຊຽນ ຄັ້ງທີ 28 ແລະ ກອງປະຊຸມເຈົ້າຄອງນະຄອນອາຊຽນ ແລະ ຄູ່ຮ່ວມ ໃນປີ 2016 ເຊິ່ງວຽກງານດັ່ງກ່າວ ແມ່ນຈະໄດ້ຈັດຕັ້ງປະຕິບັດຢູ່ນະຄອນຫຼວງວຽງຈັນ ເຊິ່ງນະຄອນຫຼວງວຽງຈັນ ໄດ້ເນັ້ນເຖິງການຄຸ້ມຄອງຈັດສັນຄວາມເປັນລະບຽບຮຽບຮ້ອຍ ຕາມແຄມທາງ ແລະ ການສັນຈອນຕາມຖະໜົນ ວຽກງານປະດັບປະດາທຸງຊາດ ທຸງພັກ ແລະ ທຸງທິວ ພ້ອມກັນນີ້ ຍັງໄດ້ຮຽກຮ້ອງອຳນາດການປົກຄອງ ແລະ ປວງຊົນ ໃຫ້ມີການເອົາໃຈໃສ່ວຽກງານປັບປຸງເສັ້ນທາງໃຫ້ມີຄວາມສະອາດຈົບງາມ ເຊັ່ນດຽວກັບວຽກງານມາດຖານເຄຫາສະຖານສະອາດ ມາດຖານຮັບປະກັນພາຫະນະສະອາດ ຮັບປະກັນສາທາລະນຸປະໂຫຍດສະອາດ ຮັບປະກັນໂຮງຈັກໂຮງງານສະອາດ ຮັບປະກັນການບໍລິໂພກສະອາດ ນ້ຳສະອາດ ແລະ ຮັບປະກັນທ້ອງຟ້າສົດໃສປອດຄວັນລົດ ແລະ ຄວັນການຈູດເຜົາປົກຄຸມທ້ອງຟ້າ.
ແຫລ່ງຂ່າວ:
