ຂປລ.ບຸນທາດຫລວງປີນີ້, ເຈົ້າໜ້າທີ່ຮັບຜິດຊອບງານບຸນນະມັດສະການພະທາດຫລວງວຽງຈັນຍັງບໍ່ມີການເປີດເຜີຍການກໍານົດຈໍານວນຕົວເລກຫ້າງຮ້ານຂາຍເຄື່ອງວ່າຈະເອົາຈັກຮ້ານ, ມາດຕະການຮັກສາຄວາມສະອາດລະອຽດ ລວມເຖິງການອະນຸຍາດປະເພດສິນຄ້າທີ່ເປັນອັນຕະລາຍ ຂະນະທີ່ ຜູ້ປະກອບການ ແລະ ມວນຊົນສ່ວນໃຫຍ່ໃຫ້ຄວາມສົນໃຈຢາກຮູ້ຄັກແນ່ເພາະຜ່ານມາເກີດມີຫາງສຽງການເກັບມ້ຽນຂີ້ເຫຍື້ອຍັງຊະຊາຍ ຊັກຊ້າ ແລະ ມີການອະນຸຍາດໃຫ້ຂາຍມີດຟ້າ ຫລື ມີຄົມດ້ານໃນ.
ຕາມແຜນແລ້ວບຸນນະມັດສະການພະທາດຫລວງວຽງຈັນປີ 2015 ຈະເລີ່ມຂື້ນໃນວັນທີ 20 ເຖິງ 25 ພະຈິກ 2015, ສ່ວນ ທ້ອງສະໜາມຫລວງປີ ນີ້ງົດບໍ່ໃຫ້ຂາຍສິນຄ້າສະຫງວນ ເພື່ອຝຶກຊ້ອມກ້ອນກຳລັງ ສະແດງການສະເຫລີມສະຫລວງ ວັນ ຊາດທີ 2 ທັນວາ ຄົບຮອບ 40 ປີ ແລະ ຈະອະນຸຍາດໃຫ້ພຽງແຕ່ຜະລິດຕະພັນແຫ່ງຊາດໂອດອັບເທົ່າ ນັ້ນຂາຍຢູ່ໃນເດີ່ນພະ ທາດຫລວງ ແຕ່ເຂົ້າຫລາມປີ້ງໄກ່ ແລະ ປະເພດອາຫານການກິນຂາຍອື່ນໆຈະອະນຸໃຫ້ບໍລິເວນແຄມທາງ.
ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫລວງວຽງຈັນ, ປະທານຄະນະກຳມະການ ຊີ້ນຳງານບຸນນະ ມັດສະການ ພະທາດຫລວງວຽງຈັນປີນີ້ແມ່ນຈະເລີ່ມຂື້ນແຕ່ວັນທີ 20 ຄືການເປີດສິນຄ້າໂອ ດອັບ ແລະ ວັນທີ 23 ຫາວັນທີ 25 ແມ່ນວັນນະມັດສະການພະທາດຫລວງຄືການເປີດໃຫ້ມວນຊົນເຂົ້າກາບໄຫ້ວສັກກະລະບູຊາ, ສ່ວນວັນທີ 24 ແມ່ນຈະມີ ການ ແຫ່ຜາສາດເຜີ້ງແຕ່ວັດສີເມືອງຫາພະທາດຫລວງ ແລະ ວັນທີ 25 ຫລັງຈາກຈົບພິທີຕັກບາດກໍ່ຈະມີການຕີຄີ ແລະ ຄົບ ງັນຕາມປະເພນີ. ຄາດໝາຍກໍຄືສືບສານຮີດຄອງປະເພນີອັນດີງາມຂອງຊາດລາວໄວ້, ສ້າງໃຫ້ມວນຊົນມ່ວນຊື່ນ ກ່ຽວກັບຈິດ ຈະກຳທາງສາສະໜາ ທັງສ້າງສິ່ງດຶງດູດໃຫ້ນັກທ່ອງທ່ຽວ ທັງພາຍໃນ ແລະ ຕ່າງປະ ເທດ ເຂົ້າມາທ່ຽວຊົມນະຄອນຫລວງວຽງຈັນໃຫ້ນັບມື້ນັບຫລາຍຂຶ້ນ.
ສ່ວນງານຕະຫລາດນັດສາກົນປີນີ້ແມ່ນຈະບໍ່ໄດ້ຈັດຢູ່ທ້ອງສະໜາມຫລວງຊຶ່ງຈະຍ້າຍໄປຈັດຢູ່ສູນການຄ້າລາວ-ລາວໄອເຕັກບ່ອນດຽວ ເນື່ອງຈາກວ່າທ້ອງສະໜາມຫລວງສະຫງວນໄວ້ເພື່ອຝຶກຊ້ອມກ້ອນກຳລັງສະແດງ ເພື່ອສະແດງ ໃນມື້ສະເຫລີມສະຫລວງ ວັນຊາດທີ 2 ທັນວາ ຄົບຮອບ 40 ປີ (ແຕ່ວັນທີ 2 ທັນວາ 1975-ວັນທີ 2 ທັນວາ 2015) ເຊິ່ງຈະມີການສະເຫລີມສະຫລອງໃຫ່ຍໃນທົ່ວປະເທດພ້ອມໆກັນ.
ແນວໃດກໍ່ຕາມປະຈຸບັນ ການກະກຽມບຸນນະມັດສະ ການພະທາດຫລວງວຽງຈັນ ໄດ້ດຳເນີນຢ່າງ ຕໍ່ເນື່ອງສຳເລັດ ການຈັດຕັ້ງຄະນະກຳມະການຮັບຜິດຊອບງານບຸນ ລວມທັງເຈົ້າໜ້າທີ່ປ້ອງກັນຄວາມສະຫງົບ, ເຈົ້າໜ້າທີ່ກວດກາ ການຄ້າ ແລະ ອື່ນໆ ເພື່ອໃຫ້ໄດ້ຮີດຄອງປະເພນີ ແລະ ມີຄວາມສະຫງົບ.
ທ່ານ ໂສວັນ ນຸພາບພະວົງສີ ຮອງຫົວໜ້າພະແນກອຸດສາຫະກຳ ແລະ ການຄ້າ ກ່າວວ່າ: ສະເພາະການຄ້າຂາຍ ສິນຄ້າໃນງານນະມັດສະການພະທາດຫລວງໄດ້ມີການກຳນົດຄຸ້ມຄອງລາຄາ ແລະ ໃຫ້ຕິດລາຄາ ລວມເຖິງລາຄາຝາກ ລົດ ຫາກຜູ້ໃດລະເມີດກໍ່ຈະຖຶກປະຕິບັດຕາມລະບຽບ ແລະ ພວກເຮົາກໍ່ໄດ້ກຽມກຳລັງເຈົ້າ ໜ້າທີ່ກວດກາການຄ້າໄວ້ ຢ່າງ ພຽງ ພໍເພື່ອຕິດຕາມໃນ ແຕ່ລະຈຸດ ໃນ ແຕ່ ລະວັນ ສະນັ້ນຈິ່ງຂໍການຮ່ວມມືກັບນັກທ່ອງທ່ຽວ, ຖ້າລູກຄ້າພົບເຫັນການລະເມີດ ຕ້ອງ ໃຫ້ແຈ້ງ ຄະນະກຳມະການດ່ວນເພື່ອແກ້ໄຂ. ແນວໃດກໍດີ ປະຊາຊົນຍັງມີຄວາມເປັນຫ່ວງວ່າອາດມີບາງກຸ່ມຄົນບໍ່ດີສວຍໂອກາດລັກຊັບພົນລະເມືອງຢູ່ງານບຸນ, ມາດຕະການຮັກຄວາມສະອາດບໍ່ຈະແຈ້ງ ແລະ ການອະນຸຍາດໃຫ້ເອົາປະເພດສິນຄ້າເຂົ້າໄປຂາຍດ້ານໃນມີຫຍັງແນ່ເພາະຜ່ານມາໃຊ້ກໍາລັງພົນຢ່າງຫລວງໃນການຮັກສາຄວາມປອດໄພ ແຕ່ສຸດທ້າຍອະນຸຍາດໃຫ້ພໍ່ຄ້າແມ່ຂາຍມີດ ແລະ ບາງສິ່ງອັນຕະລາຍ.
ຂ່າວຈາກ ຂ່າວສານປະເທດລາວ
