ຂປລ. ສະມາຄົມນັກຂ່າວແຫ່ງ ສປປ ລາວ ຮ່ວມກັບສະມາຄົມ ນັກຂ່າວໜັງສືພິມ ແຫ່ງປະເທດໄທ ຈັດຊຸດຝຶກອົບຮົມ 2 ວັນ. ໃນຫົວຂໍ້ ການນຳໃຊ້ສື່ສັງຄົມອອນລາຍ ໃນວຽກງານສື່ມວນຊົນ ລະຫວ່າງວັນທີ 12-13 ພະຈິກ 2015 ທີ່ສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ ໂດຍມີທ່ານ ວິໄລທອງ ສີຊານົນ ຫົວໜ້າສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ, ທ່ານ ຊະນະຣົງ ລິ້ມປັດທະມະປານີ ທີ່ປຶກສາສະມາຄົມ ຜູ້ຜະລິດສື່ອອນລາຍ ແລະ ທີ່ປຶກສາ ສະມາຄົມນັກຂ່າວໜັງສືພິມ ແຫ່ງ ປະເທດໄທ ພ້ອມສຳມະນາກອນ.
ທ່ານ ວິໄລທອງ ສີຊານົນ ໄດ້ກ່າວວ່າ: ປັດຈຸບັນ ການນຳໃຊ້ສື່ສັງຄົມອອນລາຍແມ່ນມີຄວາມສຳຄັນຫລາຍ ໃນການເຜີຍແຜ່ຂໍ້ມູນຂ່າວສານ ເຊິ່ງເປັນ ທາງເລືອກໜຶ່ງ ໃນການກະຈາຍຂ່າວໄດ້ໄວ ແລະ ເປັນທີ່ນິຍົມໃນປະຈຸບັນ, ແຕ່ແນ່ນອນແຫລ່ງຂໍ້ມູນ ກໍມີທັງດ້ານດີ ແລະ ດ້ານລົບ ສະນັ້ນ ພວກເຮົາຕ້ອງຮູ້ເລືອກເຟັ້ນ ເອົາທີ່ເໝາະສົມ ແລະ ຖືກຕ້ອງສ່ອດຄ່ອງກັບ ແນວທາງນະໂຍບາຍຂອງ ພັກ-ລັດ.
ການຝຶກອົບຮົມຄັ້ງນີ້ ກໍແມ່ນເພື່ອເປັນການ ຍົກລະດັບຄວາມຮັບຮູ້, ຄວາມສາມາດຄວາມເຂົ້າໃຈ ແລະ ທັກສະໃຫ້ແກ່ນັກຂ່າວ ຮູ້ນຳໃຊ້ສື່ສັງຄົມອອນລາຍ ໃຫ້ມີປະສິດທິພາບ ແລະ ສອດຄ່ອງກັບວຽກງານສື່ມວນຊົນ. ນອກຈາກນັ້ນ ຍັງເປັນການພົບປະ ແລກປ່ຽນບົດຮຽນ ລະຫວ່າງ ນັກຂ່າວລາວ ແລະ ນັກຂ່າວໄທ ອີກດ້ວຍ.
ແຫລ່ງຂ່າວ:
