ພາຍຫຼັງການອອກພັນສາປະວໍລະນາ ກໍ່ເລີ່ມເຂົ້າສູ່ບຸນນະມັດສະການພະທາດຫຼວງວຽງຈັນ ອີກວາລະໜຶ່ງ ທີ່ຊາວນະຄອນຫຼວງວຽງຈັນ ກໍ່ຄືຊາວລາວໃນທົ່ວປະເທດຕັ້ງຕາລໍຄອຍ ເພາະງານດັ່ງກ່າວ ຈະໄດ້ເຫັນການແຫ່ຜາສາດເຜີ້ງທີ່ສວຍງາມ ແລະ ວຽນທຽນອ້ອມພະທາດ ໃນວັນເພັງ 15 ຄ່ຳ ເດືອນ 12 ຂອງທຸກໆປີ.
ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງ ປະທານຄະນະກຳມະການຈັດງານບຸນນະມັດສະການພະທາດຫຼວງ ແລະ ງານຕະຫຼາດນັດ ປະຈຳປີ 2015 ຖະແຫຼງຂ່າວວັນທີ 12 ພະຈິກ 2015 ວ່າ: ງານບຸນນະມັດສະການພະທາດຫຼວງປີນີ້ ທີ່ມີກຳນົດຈັດວັນທີ 20-25 ພະຈິກ 2015 ແມ່ນຈະຍັງຮັກສາຮູບແບບຮີດຄອງປະເພນີທາງສາສະໜາແບບດັ້ງເດີມຄື: ຈະມີການແຫ່ຜາສາດເຜີ້ງຈາກວັດສີເມືອງ ເພື່ອໄປຖວາຍພະທາດ ແລະ ຮູບແບບຂອງຜາສາດເຜີ້ງ ແມ່ນຈະໃຫ້ເປັນຜາສາດແທ້ຮູບແບບຂອງເກົ່າແກ່ໃນນະຄອນຫຼວງວຽງຈັນ (ຈະບໍ່ໃຫ້ມີຜາສາດລັກສະນະຮູບນາກຕ່າງໆນາໆ) ນອກຈາກນັ້ນ ກໍ່ຈະມີການຫຼິ້ນກີລາຕີຄີ ທີ່ເປັນກີລາເອກະລັກປະຈຳຊາດ ທີ່ຈັດມາແລ້ວປະມານ 459 ປີ ຈາກນັ້ນ ກໍ່ຈະມີການວຽນທຽນ ພາຍໃນງານກໍ່ຈະມີຊາວຄ້າຂາຍທີ່ເປັນເອກະລັກເຊັ່ນ: ເຂົ້າຫຼາມ ປິ້ງໄກ່ ແລະ ງານສະແດງສິນຄ້າຕ່າງໆຈາກຫຼາຍຕົວເມືອງໃນນະຄອນຫຼວງ ແລະ ຫຼາຍແຂວງໃນທົ່ວປະເທດ ນຳມາວາງສະແດງທີ່ເປັນສີສັນພາຍໃນງານ ໃຫ້ຜູ້ທີ່ມາຮ່ວມໃນງານສາມາດຊົມ ແລະ ເລືອກຊື້ຕາມໃຈ ສ່ວນສະຖານທີ່ວາງສະແດງສິນຄ້າຈະມີ 2 ສູນການຄ້າໃຫຍ່ຄື: ສູນການຄ້າລາວ-ໄອເຕັກ ແລະ ສູນການຄ້າທາດຫຼວງສະແຄຣ໌.
ປະທານຄະນະຈັດງານຍັງໄດ້ຮຽກຮ້ອງໃຫ້ປະຊາຊົນລາວບັນດາເຜົ່າ ລວມທັງຮ້ານຄ້າຊາວຂາຍທັງພາກລັດ ແລະ ເອກະຊົນ ລວມເຖິງນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ຈະເດີນທາງເຂົ້າມາຮ່ວມໃນງານປີນີ້ ຈົ່ງພ້ອມກັນເອົາໃຈໃສ່ຮັກສາຮີດຄອງປະເພນີຂອງຊາດ ການນຸ່ງຖື ຄວາມສະອາດ ຢ່າງມີສະຕິ ໃຫ້ສົມກັບຄຳຂວັນຂອງນະຄອນຫຼວງວາງອອກ 6 ສ ໃຫ້ປາກົດຜົນເປັນຈິງ.
ແຫລ່ງຂ່າວ:
