ຂປລ. ກະຊວງແຜນການ ແລະ ການລົງທຶນ (ຜທ) ໄດ້ຈັດກອງປະຊຸມ ປຶກສາຫາລືກ່ຽວກັບ ການປັບປຸງ ກົດໝາຍວ່າດ້ວຍການລົງທຶນຂອງລັດ ສະບັບປີ 2009 ຂຶ້ນໃນວັນທີ 11 ພະຈິກ 2015 ນີ້, ໂດຍມີທ່ານ ດຣ. ຄຳລຽນ ພົນເສນາ ລັດຖະມົນຕີ ຊ່ວຍວ່າການກະຊວງ (ຜທ) ແລະ ພາກສ່ວນກ່ຽວຂ້ອງເຂົ້າຮ່ວມ.
ກະຊວງ ແຜນການ ແລະ ການລົງທຶນ ໄດ້ເປັນເສນາທິການ ໃຫ້ລັດຖະບານ ໃນການຄຸ້ມຄອງ ການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ກໍຄືແຜນການລົງທຶນຂອງລັດ ສະນັ້ນ, ຈຶ່ງໄດ້ດຳເນີນການຄົ້ນຄວ້າ ປັບປຸງກົດໝາຍດັ່ງກ່າວ ໃຫ້ມີເນື້ອໃນທີ່ສອດຄ່ອງ-ຄົບຖ້ວນ, ສາມາດຮອງຮັບສະພາບ ແລະ ເງື່ອນໄຂໃນປັດຈຸບັນ ແລະ ໃຫ້ຖືກຕ້ອງຕາມຂັ້ນຕອນ, ຫລັກການທີ່ກຳນົດໄວ້ໃນ ກົດໝາຍວ່າດ້ວຍການສ້າງນິຕິກຳ ທັງນີ້ກໍເພື່ອເຮັດໃຫ້ກົດໝາຍ ສະບັບດັ່ງກ່າວ ມີຄວາມສອດຄ່ອງ ແລະ ກົມກຽວກັນກັບຮ່າງກົດໝາຍ ວ່າດ້ວຍສະພາປະຊາຊົນຂັ້ນແຂວງ ທີ່ກອງປະຊຸມສະໄໝສາມັນ ເທື່ອທີ 10 ສະພາແຫ່ງຊາດ ຊຸດທີ VII ຈະພິຈາລະນາຮັບຮອງເອົາ ໃນທ້າຍປີນີ້.
ພາຍຫລັງຮ່າງກົດໝາຍດັ່ງກ່າວ ຖືກຮັບຮອງ ແລະ ປະກາດໃຊ້ຢ່າງເປັນທາງການ ຈະເຮັດໃຫ້ການ ຄຸ້ມຄອງໂຄງການລົງທຶນຂອງລັດ ມີປະສິດທິພາບ ແລະ ປະສິດທິຜົນ, ການລົງທຶນມີຈຸດສຸມ ສາມາດຊຸກຍູ້ ການພັດທະນາເສດຖະກິດ-ສັງຄົມ ໃຫ້ບັນລຸຕາມເປົ້າໝາຍ ໃນແຕ່ລະໄລຍະ.
ແຫລ່ງຂ່າວ:
