ກອງທັບລັດຖະບານຊີຣີທຳລາຍວົງລ້ອມທີ່ປິດກັ້ນຖານທັບອາກາດໃນເມືອງເລບໂປສຳເລັດແລ້ວ ຫລັງເລີ່ມປະຕິບັດການຢຶດຄືນພື້ນທີ່ຮ່ວມກັບນັກຮົບອີກຫລາຍຊາດ…
ສຳນັກຂ່າວຕ່າງປະເທດລາຍງານວ່າ ກອງທັບລັດຖະບານຊີຣີສາມາດທຳລາຍວົງລ້ອມຂອງກຸ່ມຕິດອາວຸດລັດອິດສະລາມ (ໄອຊິດ) ທີ່ປິດຖານທັບອາກາດ ຄູໄວລິດ ໃນເມືອງເລບໂປທາງຕອນເໜືອຂອງປະເທດມາດົນເກືອບ 2 ປີສຳເລັດແລ້ວເມື່ອມື້ວັນອັງຄານ 11 ພະຈິກ ລວມທັງສາມາດສັງຫານນັກຮົບຕິດອາວຸດໄດ້ເປັນຈຳນວນຫລາຍ
ໃນໄລຍະຫລາຍອາທິດທີ່ຜ່ານມາ ເກີດການຕໍ່ສູ້ຢ່າງດຸເດືອດໃນພື້ນທີ່ໂດຍຮອບເມືອງເລບໂປ ຫລັງຈາກກອງທັບລັດຖະບານຊີຣີຊຶ່ງໄດ້ຮັບການສະໜັບສະໜູນຈາກນັກຮົບເລບານອນແລະອິຫລ່ານ ເລີ່ມປະຕິບັດການຢຶດຄືນພື້ນທີ່ຈາກກຸ່ມຕິດອາວຸດ ແລະ ຫລ້າສຸດກອງທັບລັດຖະບານກໍສາມາດທຳລາຍວົງລ້ອມເຂົ້າໄປຫາທະຫານທີ່ຢູ່ໃນຖານທັບອາກາດຄູໄວລິດໄດ້ສຳເລັດ
ຂະນະດຽວກັນ ກຸ່ມສັງເກດການເພື່ອສິດທິມະນຸດຊົນໃນຊີຣີ (ເອັສໂອເອັສອາ) ລາຍງານດ້ວຍວ່າ ກຸ່ມຕິດອາວຸດຍິງປືນໃຫຍ່ເຂົ້າໄປໃນເມືອງລາຕາເກຍ ຕິດທະເລເມດິເຕີເລນ່ຽນ ເຮັດໃຫ້ມີຜູ້ເສຍຊີວິດ 22 ລາຍ ແລະບາດເຈັບອີກຈຳນວນຫລາຍ