ມື້ນີ້ ວັນທີ 11 ພະຈິກ 2015 ຄະນະກຳມະການການເລືອກຕັ້ງ ຂອງມຽນມາຖະແຫຼງວ່າ ຜົນຈາກການເລືອກຕັ້ງເຂົ້າລັດຖະສະພາ 333 ຕຳແໜ່ງ ເມື່ອວັນອາທິດທີ່ຜ່ານມານັ້ນ ປະກາດຜົນຢ່າງເປັນທາງການ ເປັນທີ່ຮຽບຮ້ອຍແລ້ວ.
ໂດຍຜູ້ແທນທັງໝົດ 333 ຕຳແໜ່ງນັ້ນ ໄດ້ຮັບການເລືອກເຂົ້າສະພາຜູ້ແທນ ລາດສະດອນ (ສະພາຕ່ຳ) 88 ບ່ອນນັ່ງ, ລັດຖະສະພາ (ສະພາສູງ) ອີກ 33 ບ່ອນນັ່ງ ແລະສະພາທອງຖິ່ນອີກ 212 ຕຳແໜ່ງ.
ຈົນເຖິງຕອນນີ້ ພັກສັນນິບາດແຫ່ງຊາດ ເພື່ອປະຊາທິປະໄຕ (NLD) ທີ່ມີນາງອອງຊານ ຊູຈີ ເປັນຫົວໜ້າພັກນັ້ນ ໄດ້ຮັບເລືອກເຂົ້າສະພາທັງໝົດ 291 ບ່ອນນັ່ງ ແບ່ງເປັນ 78 ຕຳແໜ່ງ ໃນສະພາຜູ້ແທນລາດສະດອນ 29 ຕຳແໜ່ງໃນລັດຖະສະພາ ແລະ 184 ຕຳແໜ່ງ ໃນສະພາທ້ອງຖິ່ນ.
ພໍແຕ່ຮູ້ຂ່າວວ່າ ພັກສັນນິບາດແຫ່ງຊາດ ເພື່ອປະຊາທິປະໄຕ ຂອງນາງ ອອງຊານ ຊູຈີ ເປັນຝ່າຍຊະນະການເລືອກຕັ້ງ ປະຊາຊົນທີ່ສະໜັບສະໜຸນ ໂດຍສ່ວນຫຼາຍຈະເປັນນັກຮຽນຮູ້ ແລະປັນຍາຊົນ ໄດ້ລົງສູ່ຖະໜົນໂບກທຸງ ສະເຫຼີມສະຫຼອງຜົນການຊະນະ ການເລືອກຕັ້ງດັ່ງກ່າວ.
