ຂປລ. ເມື່ອບໍ່ດົນມານີ້ ທ່ານ ທອງໃສ ໄຊຍະວົງຄຳດີ ຄະນະບໍລິຫານງານເຂດເສດຖະກິດພິເສດສະຫວັນ-ເຊໂນ ແລະ ຄະນະວິຊາການຈາກພະແນກໂຍທາທິການ ແລະ ຂົນສົ່ງແຂວງສະຫວັນນະເຂດໄດ້ລາຍງານແຜນແມ່ບົດໂຄງການສ້າງສະໜາມບິນແຫ່ງໃໝ່ທີ່ເຊໂນ ເມືອງອຸທຸມພອນ ແຂວງສະຫວັນນະເຂດ ຕໍ່ ທ່ານ ໂຕມິນິກ ໂກະ ເອກອັກຄະລັດຖະທູດສິງກະໂປປະຈຳລາວທີ່ໄດ້ນຳພາຄະນະຜູ້ຊ່ຽວຊານ ກ່ຽວກັບການກໍ່ສ້າງສະໜາມບິນ ຈາກປະເທດສິງກະໂປ, ຈີນ ແລະມຽນມາ ເພື່ອເຄື່ອນໄຫວເຮັດວຽກ ເກັບກໍຂໍ້ມູນກ່ຽວກັບໂຄງການກໍ່ສ້າງສະໜາມບິນດັ່ງກ່າວ.
ທ່ານ ທອງໃສກ່າວຕື່ມອີກວ່າ: ພວກເຮົາຈະກໍ່ສ້າງສະໜາມບິນພ້ອມອາຄານຜູ້ໂດຍສານ ແລະ ສິ່ງອຳນວຍຄວາມສະດວກອື່ນໆຕິດພັນພັນກັບການພັດທະນາຢູ່ເຂດເຊໂນເພື່ອຂົນສົ່ງສິນຄ້າຈາກໂຮງຈັກໂຮງງານທີ່ນອນໃນເຂດເສດຖະກິດພິເສດສະຫວັນ-ເຊໂນຕາມແລວເສດຖະກິດຕາເວັນອອກ-ຕາເວັນຕົກ ແລະ ເຂດການຄ້າແດນສະຫວັນອອກຕ່າງປະເທດ, ຕາມແຜນການແມ່ນຈະໄດ້ເຊື່ອມຕໍ່ຕົວເມືອງເຂົ້າກັນລະຫວ່າງເມືອງໄກສອນພົມວິຫານ ແລະ ເມືອງອຸທຸມພອນ ແລະມີຄວາມເປັນໄປໄດ້ສູງທີ່ຈະຕັດເສັ້ນທາງໃໝ່ ແຕ່ຕົວເມືອງໄກສອນ ພົມວິຫານ ຫາສະໜາມບິນແຫ່ງໃໝ່ທີ່ເຊໂນ. ສ່ວນສະໜາມບິນທີ່ຢູ່ເມືອງໄກສອນ ພົມວິຫານ ແມ່ນມີເນື້ອທີ່ຈຳກັດ ແລະ ຕັ້ງຢູ່ກາງຊຸມຊົນສະນັ້ນຖ້າຫາກໂຄງການກໍ່ສ້າງສະໜາມບິນແຫ່ງໃໝ່ສຳເລັດ ກໍອາດຈະໄດ້ຍ້າຍມາຕັ້ງສະໜາມບິນແຫ່ງໃໝ່ຢູ່ທີ່ນີ້ ເພື່ອບໍລິການຜູ້ໂດຍສານທັງພາຍໃນ ແລະ ຕ່າງປະເທດ.
ທີ່ມາ ຂ່າວສານປະເທດລາວ
