ບໍລິສັດ ເປໂຕຣຫວຽດນາມອອຍລາວ ຈຳກັດ (PV Oil Lao) ໄດ້ຈັດພິທີສະເຫຼີມສະຫຼອງ ເນື່ອງໃນໂອກາດວັນສ້າງຕັ້ງບໍລິສັດ ຄົບຮອບ 3 ປີ ຂຶ້ນຕອນຄ່ຳວັນທີ 1 ທັນວາ 2013 ຢູ່ໂຮງແຮມດອນຈັນພາເລດ ໂດຍມີທ່ານເອກອັກຄະລັດຖະທູດ ສສ.ຫວຽດນາມ ປະຈຳ ສປປ ລາວ ພ້ອມດ້ວຍຄະນະປະທານບໍລິສັດ ແລະ ແຂກຖືກເຊີນຈາກ ສປປ ລາວ ແລະ ສສ.ຫວຽດນາມ ເຂົ້າຮ່ວມ.
ທ່ານ ລຳພູນ ພິມພະວົງ ປະທານກຳມະການບໍລິຫານບໍລິສັດ PV Oil Lao ໄດ້ກ່າວສະແດງຄວາມຂອບໃຈມາຍັງບັນດາທ່ານ ທີ່ໄດ້ໃຫ້ການສະໜັບສະໜູນອູ້ມຊູ ແລະ ໃຊ້ບໍລິການນ້ຳມັນຂອງບໍລິສັດ PV Oil Lao ດ້ວຍດີຕະຫຼອດມາ ພ້ອມທັງໄດ້ແຈ້ງໃຫ້ຊາບວ່າ ນັບແຕ່ມື້ສ້າງຕັ້ງບໍລິສັດມາເຖິງປັດຈຸບັນ PV Oil Lao ມີສາງນ້ຳມັນທີ່ໃຫຍ່ ແລະ ໄດ້ມາດຕະຖານ 4 ແຫ່ງ ພ້ອມທັງມີປ້ຳນ້ຳມັນທີ່ໄດ້ຄຸນນະພາບ 90 ກວ່າແຫ່ງໃນທົ່ວປະເທດ ແລະ ໃນມໍ່ໆນີ້ກໍຈະໄດ້ມີການຂະຫຍາຍຕື່ມອີກ.
ໂອກາດພິທີສະເຫຼີມສະຫຼອງວັນສ້າງຕັ້ງບໍລິສັດ PV Oil Lao ຄົບຮອບ 3 ປີ ໃນຄັ້ງນີ້ ຍັງໄດ້ມີການມອບໃບຍ້ອງຍໍ ແລະ ລາງວັນໃຫ້ແກ່ສະຖານີບໍລິການ ກໍຄືຜູ້ຈັດການປ້ຳນ້ຳມັນທີ່ມີຜົນງານດີເດັ່ນ ຮັບໃຊ້ສັງຄົມ ມີຄວາມຊື່ສັດ ແລະ ເປັນສະຖານີທີ່ສະອາດປອດໄພອີກດ້ວຍ.