ທ່ານ ພູເບດ ສຸກພິພັດ ຜູ້ບໍລິຫານທີມບານເຕະ ລາວໂຕໂຍຕ້າ ມີໜ້າທີ່ເຝິກຊ້ອມນັກກິລາຮຸ່ນສືບທອດຂອງສະໂມສອນ, ຮັບຜິດຊອບການຕະຫລາດ, ການໂຄສະນາກັບສື່ຕ່າງໆ ຕະຫລອດການປະກອບເອກະສານ ແລະ ເຊັນສັນຍາກັບນັກເຕະບານຕ່າງປະເທດ ເຊິ່ງທ່ານເປັນຜູ້ຢູ່ເບື້ອງຫລັງຄວາມສຳເລັດຂອງ ທີມ ລາວໂຕໂຍຕ້າ ທີ່ຍາດໄດ້ແຊ້ມການແຂ່ງຂັນເຕະບານ ລາວພຣີເມຍລີກ 2015 ນີ້
ທ່ານ ພູເບດ ສຸກພິພັດ ກ່າວວ່າ: ຕົນຮູ້ຈັກກັບ ທ່ານ ບຸນລັບ ເຄນກິຕິສັກ ອະດີດນັກເຕະບານກອງໜ້າທີມຊາດລາວ ມາແຕ່ດົນແລ້ວ ແລະ ໄດ້ຕິດຕໍ່ກັນເປັນປະຈຳ ຈົນໄດ້ແນະນຳໃຫ້ ນັກກິລາຂອງລາວ ຄື ທ້າວ ສຸກອາພອນ ວົງຈຽງຄຳ, ທ້າວ ຄຳແພງ ໄຊຍະວຸດທິ ແລະ ທ້າວ ກັນລະຍາ ສີສົມຫວັງ ໄປຄ້າແຄ່ງຢູ່ປະເທດໄທ, ຫລັງຈາກນັ້ນ ທ່ານ ບຸນລັບ ກໍໄດ້ແນະນຳໃຫ້ຮູ້ຈັກ ທ່ານ ປະສາດໄຊ ພິລາພັນເດຊ ປະທານສະໂມສອນ ລາວໂຕໂຍຕ້າ ແລະ ໄດ້ຕັດສິນໃຈມາຮ່ວມທີມ ເນື່ອງຈາກວ່າປະທັບໃຈອຸດົມການຂອງທ່ານປະທານ, ຂະນະດຽວກັນ ກໍເປັນສິ່ງທ້າທາຍທີ່ຈະໄດ້ມາເຮັດວຽກກັບວົງການບານເຕະລາວ. ພາຍຫລັງມາເຮັດວຽກກັບສະໂມສອນນີ້ແລ້ວ ກໍເຫັນວ່ານັກເຕະບານຫລາຍຄົນແມ່ນເອົາໃຈໃສ່ຕໍ່ການເຝິກຊ້ອມ ແລະ ການແຂ່ງຂັນ ຈົນສາມາດຍາດໄດ້ແຊ້ມມາຄອງ ຈຶ່ງເຮັດໃຫ້ຕົນປະທັບໃຈກັບຜົນງານທີ່ປາກົດອອກມາ, ຕົນດີໃຈຫລາຍທີ່ເປັນຜູ້ຢູ່ເບື້ອງຫລັງ ທີ່ຊ່ວຍໃຫ້ທີມໄດ້ແຊ້ມໃນຄັ້ງນີ້.
ທ່ານຍັງໃຫ້ຮູ້ຕື່ມອີກວ່າ: ເປັນຄັ້ງທັງທຳອິດທີ່ໄດ້ຮ່ວມສະຫລອງແຊ້ມ ນັບແຕ່ກ້າວເຂົ້າມາເຮັດວຽກກ່ຽວກັບກິລາບານເຕະ ແລະ ພ້ອມຈະສືບຕໍ່ພັດທະນາທີມດັ່ງກ່າວ ໃຫ້ແຂງແກ່ນຍິ່ງໆຂຶ້ນ.
ຂອບໃຈຂ່າວແລະພາບຈາກ: ຂປລ