ເບຍລາວມອບທຶນການສຶກສາໃຫ້ນັກສຶກສາ ມ.ຂ ແລະວິທະຍາໄລຄູສະຫວັນນະເຂດສົກ 2015-2016
ພິທີມອບ-ຮັບທຶນການສຶກສາຂອງ ບໍລິສັດເບຍລາວ ຈຳກັດ ມອບໃຫ້ແກ່ ມະຫາວິທະຍາໄລສະຫວັນນະເຂດ ແລະມອບໃຫ້ວິທະຍາໄລຄູສະຫວັນນະເຂດ ໄດ້ຈັດຂຶ້ນໃນວັນທີ 2 ພະຈິກ 2015 ທີ່ ມ.ຂ. ໃນໂອກາດນີ້, ທ່ານ ອາຈານ ຄຳເຜີຍ ອັກຄະວົງ ຜູ້ຮັບຜິດຊອບກິດຈະກຳນັກສຶກສາຂອງ ມ.ຂ ໄດ້ລາຍງານວ່າ: ການມອບທຶນການສຶກສາໃຫ້ແກ່ ນັກສຶກສາທີ່ຮຽນດີ-ຮຽນເກັ່ງ ແລະມີຄຸນສົມບັດແມ່ນໜຶ່ງໃນຫຼາຍໆ ໂຄງການທີ່ບໍລິສັດເບຍລາວໄດ້ຈັດຕັ້ງຂຶ້ນ ເພື່ອຊ່ວຍພັດທະນາສັງຄົມ. ສຳລັບປີນີ້, ບໍລິສັດເບຍລາວຈຳກັດ ໄດ້ມອບທຶນການສຶກສາໃຫ້ແກ່ນັກສາຂອງ ມ.ຂ ເປັນຄັ້ງທີ 5 ມີຈຳນວນ 45 ທຶນ, ເປັນມູນຄ່າ 131 ລ້ານກີບ, ພ້ອມນັ້ນໃນປີນີ້ບໍລິສັດເບຍລາວຈຳກັດ ກໍ່ຍັງໄດ້ມອບທຶນການສຶກສາໃຫ້ແກ່ ວິທະຍາໄລຄູສະຫວັນນະເຂດ ເຊິ່ງປີນີ້ແມ່ນ ປີທຳອິດ ທີ່ທາງບໍລິສັດເບຍລາວຈຳກັດໄດ້ມອບ ທຶນການສຶກສາໃຫ້ວິທະຍາໄລຄູ ເປັນຈຳນວນ 20 ຄົນ, ມີມູນຄ່າ 64 ລ້ານກີບ. ໃຫ້ກຽດເຂົ້າຮ່ວມໃນພີທີຄັ້ງນີ້ ໂດຍມີ ທ່ານ ດຣ ຄຳເຜີຍ ຜັນທະຈອນ ຮອງເລຂາພັກແຂວງ ຮອງເຈົ້າແຂວງສະຫວັນນະເຂດ, ທ່ານ ຮອງສາສະດາຈານ ດຣ ສີທາ ເຂັມມະລາດ ຮອງອະທິການບໍດີຝ່າຍວິຊາການ ມ.ຂ, ທ່ານ ອາຈານ ທອງເຄນ ຄຳສຸກຖາວົງ ຄະນະອຳນວຍການວິທະຍາໄລຄູສະຫວັນນະເຂດ ແລະທ່ານ ກິດສະໜາ ວົງໄຊ ຜູ້ອຳນວຍການໃຫຍ່ບໍລິສັດເບຍລາວຈຳກັດໃຫ້ກຽດເຂົ້າຮ່ວມ./.
