ບັນດາເຈົ້າໜ້າທີ່ອາວຸໂສຈາກປະເທດສະມາຊິກອາຊຽນ ເຂົ້າຮ່ວມປຶກສາຫາລືບັນຫາຕ່າງໆ ໃນການພັດທະນາວຽກງານກີລາພາກພື້ນ ເພື່ອເປັນການກະກຽມຄວາມພ້ອມ ໃນການເປັນເຈົ້າພາບຈັດກອງປະຊຸມ ລັດຖະມົນຕີກີລາອາຊຽນ ຄັ້ງທີ 2 ທີ່ ສປປ ລາວ.
ກອງປະຊຸມເຈົ້າໜ້າທີ່ອາວຸໂສກີລາອາຊຽນ ຄັ້ງທີ 3 ຈັດຂຶ້ນທີ່ນະຄອນຫຼວງວຽງຈັນ ໃນວັນທີ 3 ທັນວາ 2013 ໂດຍການເປັນປະທານຂອງທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີຊ່ວຍວ່າການ ກະຊວງສຶກສາທິການ ແລະ ກີລາ ຊຶ່ງມີບັນດາເຈົ້າໜ້າທີ່ອາວຸໂສຂອງປະເທດສະມາຊິກອາຊຽນ ເຂົ້າຮ່ວມ.
ທ່ານນາງ ແສງເດືອນ ຫຼ້າຈັນທະບູນ ກ່າວວ່າ: ສປປ ລາວ ໄດ້ຮັບກຽດເປັນເຈົ້າພາບ ກອງປະຊຸມລັດຖະມົນຕີກີລາອາຊຽນ ຄັ້ງທີ 2 ແມ່ນເປັນເຫດການສຳຄັນໃນການສົ່ງເສີມ ແລະ ພັດທະນາວຽກງານກີລາ ຊຶ່ງຈະສາມາດປະກອບສ່ວນເຂົ້າໃນການພັດທະນາຊັບພະຍາກອນມະນຸດ ໃນຂອບເຂດອາຊຽນໃຫ້ດີຂຶ້ນ ແຕ່ເຖິງຢ່າງໃດກໍຕາມ ສຳລັບກອງປະຊຸມເຈົ້າໜ້າທີ່ອາວຸໂສກີລາອາຊຽນ ຄັ້ງທີ 3 ນີ້ ຈະເປັນສ່ວນໜຶ່ງເຂົ້າໃນການພັດທະນາ ບັນດາກິດຈະກຳຕ່າງໆດ້ານກີລາຂອງພາກພື້ນໃນອະນາຄົດ ການປະສານງານ ແລະ ເສີມສ້າງມິດຕະພາບ ລະຫວ່າງບັນດາປະເທດສະມາຊິກອາຊຽນ ໃຫ້ໄດ້ຮັບການຂະຫຍາຍຕົວຍິ່ງຂຶ້ນ.