ກອງທັບແລະຫນ່ວຍຂ່າວກອງຂອງອັງກິດຈັບມືຣັດເຊຍ ຮ່ວມມືໃນ ‘ປະຕິບັດການລັບສຸດຍອດ’ ຕາມໄລ່ລ່າຫາມືວາງລະເບີດ ຖ້ຽວບິນ 9268 ຈົນຖືເປັນຄວາມຮ່ວມມືລະຫວ່າງປະເທດເທື່ອໃຫຍ່ທີ່ສຸດນັບຕັ້ງແຕ່ເກີດເຫດ
ເມື່ອວັນທີ່ 6 ພະຈິກ ເວັບໄຊຕ໌ ເດິ ມິດເລີ ອອນໄລນ໌ ລາຍງານ ກອງທັບແລະທີມເຈົ້າຫນ້າທີ່ຂ່າວກອງຂອງອັງກິດ ຮ່ວມມືກັບເຈົ້າຫນ້າທີ່ຣັດເຊຍ ໃນປະຕິບັດການລັບສຸດຍອດຕິດຕາມຫາ ‘ມືລະເບີດ’ ທີ່ວາງລະເບີດເຮືອບິນໂດຍສານຂອງສາຍການບິນໂຄກາລິມາເວຍ ຫລື ເມໂທຣເຈັດ ຂອງຣັດເຊຍ ຖ້ຽວບິນ 9268 ເທິງທະເລໄຊນາຍ ໃນປະເທດອີຍິບ ເມື່ອວັນທີ່ 31 ຕຸລາ ເປັນເຫດໃຫ້ມີຜູ້ໂດຍສານແລະລູກເຮືອເສຍຊີວິດລວມ 224 ລາຍ
ຂ່າວແຈ້ງວ່າ ຄວາມຮ່ວມມືໃນປະຕິບັດການລັບສູງສຸດ ຕາມລ່າຫາມືລະເບີດຖ້ຽວບິນ 9268 ຖືເປັນປະຕິບັດການຮ່ວມມືລະຫວ່າງປະເທດໃນການໄລ່ລ່າຕົວຜູ້ກໍ່ເຫດຮ້າຍ ເທື່ອໃຫຍ່ສຸດເທົ່າທີ່ເຄີຍເກີດຂຶ້ນ
ຈາກການເປີດເຜີຍຂອງແຫລ່ງຂ່າວ ລະບຸວ່າ ການຈັບມືລະຫວ່າງທີມເຈົ້າຫນ້າທີ່ຂ່າວກອງແລະ ກອງທັບອັງກິດກັບຣັດເຊຍ ມີຂຶ້ນຫລັງຈາກພົບສົບເດັກນ້ອຍດາລິນາ ໂກໂມວາ ເດັກນ້ອຍຊາວຣັດເຊຍອາຍຸພຽງ 10 ເດືອນ ຊຶ່ງຖືເປັນຜູ້ເສຍຊີວິດອາຍຸນ້ອຍທີ່ສຸດຈາກເຫດການເສົ້າສະຫລົດເທື່ອນີ້ ຕົກຢູ່ຫ່າງຈາກບໍລິເວນທີ່ຊິ້ນສ່ວນເຮືອບິນສ່ວນໃຫຍ່ຕົກໄປໄກເຖິງປະມານ 21 ກິໂລແມັດ ຈຶ່ງເຮັດໃຫ້ເກີດຂໍ້ສັນນິດຖານທີ່ມີຄວາມເປັນໄປໄດ້ຫລາຍກວ່າແຕ່ການຄາດຄະເນກ່ອນໜ້າ ວ່າເຮືອບິນອາດລະເບີດກາງອາກາດ ຫລັງຈາກທະຍານຂຶ້ນຈາກສະໜາມບິນເມືອງຕາກອາກາດທະເລຊື່ດັງ ຊາລ໌ເອລຊີກ ໃນອີຍິບ ພຽງແຕ່ 23 ນາທີ ຂະນະທີ່ສົບພໍ່ແມ່ຂອງເດັກນ້ອຍດາລິນານັ້ນ ຍັງຫາບໍ່ພົບ ຈົນເຖິງວັນທີ່ 5 ພະຈິກ
