ຂປລ. ກອງປະຊຸມລັດຖະມົນຕີ ດ້ານວິທະຍາສາດ ແລະ ເຕັກໂນໂລຊີອາຊຽນ ຄັ້ງທີ 16 ໄດ້ໄຂຂຶ້ນຢ່າງເປັນທາງການໃນວັນທີ 6 ພະຈິກ 2015 ນີ້ ໃຫ້ກຽດເຂົ້າຮ່ວມໂດຍທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດ ຖະມົນຕີວ່າການ ກະຊວງການຕ່າງປະເທດ, ມີບັນດາລັດຖະມົນຕີ ດ້ານວິທະຍາສາດ ແລະ ເຕັກໂນໂລຊີ ຈາກປະເທດສະມາຊິກອາຊຽນ, ທ່ານ ຮອງເລຂາທິການໃຫຍ່ອາຊຽນ ແລະ ຄະນະຜູ້ແທນ ຈາກພາກສ່ວນກ່ຽວຂ້ອງ.
ໃນໂອກາດດັ່ງກ່າວ ທ່ານ ທອງລຸນ ສີສຸລິດ ໄດ້ກ່າວບາງຕອນທີ່ສໍາຄັນວ່າ: ວິທະຍາສາດ ແລະ ເຕັກໂນໂລຊີ ແມ່ນກໍາລັງແຮງຂັບເຄື່ອນ ທີ່ສໍາຄັນຕໍ່ເສດຖະກິດ ແລະ ການພັດທະນາ ສະນັ້ນ ການເຂົ້າຮ່ວມປະຊຸມ ຂອງບັນດາທ່ານໃນຄັ້ງນີ້ ສະແດງເຖິງຄວາມໝາຍອັນແຮງກ້າ ແລະ ຄວາມພະຍາຍາມອັນສູງສົ່ງ ຮ່ວມກັນຂອງບັນດາ ປະເທດອາຊຽນ ເພື່ອສ້າງປະຊາຄົມອາຊຽນ ໃຫ້ມີຄວາມກ້າວໜ້າ ທາງດ້ານວິທະຍາສາດ ແລະ ເຕັກໂນໂລຊີ ເຊິ່ງເປັນປັດໄຈອັນສໍາຄັນ ໃນການຜັກດັນການພັດທະນາ ເສດຖະກິດ–ສັງຄົມ ຂອງແຕ່ລະປະເທດໃນອາຊຽນ ໃຫ້ຈະເລີນຮຸ່ງເຮື່ອງ, ພ້ອມດຽວກັນ ກອງປະຊຸມໃນຄັ້ງນີ້ ກໍຈັດຢູ່ໃນໄລຍະທີ ສປປ ລາວ ກໍາລັງກະກຽມ ເປັນປະທານອາຊຽນ ແລະ ເປັນເຈົ້າພາບຈັດກອງປະຊຸມ ສຸດຍອດອາຊຽນ ພ້ອມດ້ວຍກອງປະຊຸມ ທີ່ກ່ຽວຂ້ອງອື່ນໆ ໃນປີ 2016. ຂະນະດຽວກັນ ອາຊຽນ ກໍາລັງຄົ້ນຄ້ວາ ແລະ ພິຈາລະນາວິໄສທັດ ປະຊາຄົມເສດຖະກິດອາຊຽນ ພາຍຫລັງ ປີ 2015 ເຊິ່ງຄາດວ່າຈະຖືກຮັບຮອງ ເອົາໃນກອງປະຊຸມ ສຸດຍອດອາຊຽນ ໃນທ້າຍປີນີ້.
ທ່ານ ທອງລຸນ ສີສຸລິດ ກ່າວຕື່ມວ່າ: ເຖິງຢ່າງໃດກໍຕາມ ອີງໃສ່ຄວາມຮຽກຮ້ອງຕ້ອງການ ໄລຍະໃໝ່ ຂ້າພະເຈົ້າມີ ຄວາມເຊື່ອໝັ້ນວ່າ ກອງປະຊຸມລັດຖະມົນຕີ ວິທະຍາສາດ ແລະ ເຕັກໂນໂລຊີອາຊຽນ ຄັ້ງທີ 16 ນີ້ ຈະເປັນເວທີປຶກສາຫາລື ແລະ ບັນລຸການຕົກລົງ ທີ່ນໍາໄປສູ່ການພັດທະນາ ວິທະຍາສາດ ແລະ ເຕັກໂນໂລຊີ ຕາມແນວຄິດວິໄສທັດ ທີ່ກໍານົດຮ່ວມກັນ ຄືສ້າງໃຫ້ອາຊຽນ ມີຄວາມສາມາດແຂ່ງຂັນ ດ້ານເຕັກໂນໂລຊີ, ມີຄວາມກ້າວໜ້າ ໃນເຕັກໂນໂລຊີ ທີ່ມີລັກສະນະຍຸດທະສາດ, ມີຊັບພະຍາກອນມະນຸດ ທີ່ມີຄວາມຮູ້ຄວາມສາມາດສູງ ທາງດ້ານເຕັກໂນໂລຊີ, ມີເຄືອຂ່າຍການພົວພັນ ລະຫວ່າງ ສະຖາບັນ ແລະ ສູນກາງ ທາງດ້ານວິທະຍາສາດ ແລະ ເຕັກໂນໂລຊີ ທີ່ເຂັ້ມແຂງ–ດີເລີດ.
ແຫລ່ງຂ່າວ:
