ຂປລ. ຄາດວ່າ ໃນປີ 2015 ນີ້ ສປປ ລາວ ຈະຜະລິດເຂົ້າໃຫ້ໄດ້ຈຳນວນ 3.872.000 ໂຕນ ໃນທົ່ວປະເທດ ໃນເນື້ອທີ່ທັງໝົດ ປະມານ 951.000 ເຮັກຕາ, ໃນນີ້ ຢູ່ 10 ແຂວງຈຸດສຸມ (ແຂວງບໍ່ແກ້ວ, ຫລວງນ້ຳທາ, ໄຊຍະບູລີ, ວຽງຈັນ, ນະຄອນຫລວງ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ ແລະ ແຂວງຈຳປາສັກ), ຜະລິດເຂົ້າໄດ້ປະມານ 3.260.000 ໂຕນ ໃນເນື້ອທີ 786.000 ເຮັກຕາ ປະກອບມີ ເນື້ອທີ່ຊົນລະປະທານ 315.000 ເຮັກຕາ, ລະດູຝົນ 195.000 ເຮັກຕາ ແລະ 120.000 ເຮັກຕາ ສຳລັບລະດູແລ້ງກວມເອົາ 85% ຂອງການຜະລິດເຂົ້າທັງໝົດ ໃນທົ່ວປະເທດ. ມີເຂົ້າເຫລືອຂາຍ 1 ລ້ານກວ່າໂຕນ ເທົ່າກັບ 35% ຂອງເຂົ້າທັງໝົດ, ຂາຍພາຍໃນ ແລະ ຊາຍແດນເປັນສ່ວນຫລາຍ ເຊິ່ງມີເຂົ້າສົ່ງອອກເປັນສິນຄ້າເຄື່ອງໝາຍ ເຖິງ 40 ພັນໂຕນ.
ທ່ານ ດຣ.ພວງປາຣິສັກ ປຣະວົງວຽງຄຳ ກ່າວຕື່ມວ່າ: ເພື່ອຄ້ຳປະກັນຄວາມໝັ້ນຄົງ ໃນການຜະລິດເຂົ້າ ຕ້ອງໄດ້ຂະຫຍາຍເນື້ອທີ່ ຊົນລະປະທານ ແລະ ດຳເນີນການ ເຮັດຊົນລະກະເສດ, ເຮັດກະເສດສຸມປູກເຂົ້າ ສະບຽງສະເພາະ ໃນເຂດດັ່ງກ່າວ, ທັງຜະລິດ ແລະ ທັງຕ້ານແລ້ງຕ້ານຖ້ວມໄປນຳ ດ້ວຍການ ສົມທົບກັບບັນດາແຂວງເປົ້າໝາຍ, ເຊິ່ງ ກະຊວງກະສິກຳ ແລະ ປ່າໄມ້ ໄດ້ຂຶ້ນແຜນປັບປຸງ ແລະ ພັດທະນາໂຄງການ ຊົນລະປະທານຮອດປີ 2020 ແລະ ປີ 2025 ແລ້ວ, ໃນນີ້ ໄດ້ສ້າງເປັນບັນຊີ ໂຄງການຈຸດສຸມຮອດປີ 2020 ແລະ ເອົາເຂົ້າແຜນ ແລະ ໂຄງການຈຳນວນໜຶ່ງ ພວມດຳເນີນການກໍ່ສ້າງ ອັນຈະເຮັດໃຫ້ ຮອດປີ 2020 ມີ18 ໂຄງການ ເຊິ່ງໄດ້ເລີ່ມກໍ່ສ້າງແລ້ວ ຈະເພີ່ມເນື້ອທີ່ໄດ້ເຖິງ 76.000 ເຮັກຕາ.
ແຫລ່ງຂ່າວ:
