ໃນ​ວັນ​ທີ 4 ພະຈິກ​ຜ່ານ​ມາ​ນີ້, ທ່ານ ປຣະສິດ ຈຳ (Prasit Cham) ລັດຖະມົນຕີ​ວ່າການ​ກະຊວງ​ອຸດສາຫະກຳ ​ແລະ ຫັດຖະກຳ ​ແຫ່ງ ລາຊະ​ອານາຈັກ​ກຳປູ​ເຈຍ ​ໄດ້​ເຂົ້າ​ພົບ​ປະກັບທ່ານ ສຈ ບໍ່​ວຽງ​ຄຳ ວົງ​ດາລາ ລັດຖະມົນຕີ​ວ່າການ​ກະຊວງ​​ວິທະຍາສາດ ​ແລະ ​ເຕັກ​ໂນ​ໂລ​ຊີ ​ໃນ​ໂອກາດ​ເດີນທາງ​ມາ​ເຂົ້າ​ຮ່ວມ​ກອງ​ປະຊຸມ​ຄູ່​ຮ່ວມ​ເຈລະຈາ​ອາ​ຊຽນ-ອີ​ຢູ ດ້ານ​ວິ​ທະຍາ​ສາດ ​ແລະ ​ເຕັກ​ໂນ​ໂລ​ຊີ ຄັ້ງ​ທີ 6 (ASEAN-EU DST) ທີ່​ມີ​ຂຶ້ນ​ໃນ​ວັນ​ທີ 5 ພະຈິກ​ນີ້ ​ແມ່ນ​ການ​ພົບ​ປະເປັນ​ຄັ້ງ​ທຳ​ອິດ​ລະຫວ່າງ​ກະຊວງ​ວິທະຍາສາດ ​ແລະ ​ເຕັກ​ໂນ​ໂລ​ຊີ ສປປ ລາວ ​ແລະ ກະຊວງ​ອຸດ​ສາ​ຫະກຳ ​ແລະ ຫັດ​ຖະກຳ ລາຊະ​ອານາຈັກກຳປູ​ເຈຍ, ​ເຊິ່ງທັງ​ສອງ​ຝ່າຍ​ໄດ້​ເຫັນ​ເຖິງ​ຄວາມ​ຈຳ​ເປັນ​ທີ່​ຈະ​ຕ້ອງ​ໄດ້​ມີ​ການຮ່ວມ​ມືກັນ​ທາງ​ດ້ານ​ວິທະຍາສາດ ​ແລະ ​ເຕັກ​ໂນ​ໂລ​ຊີ, ​ໃນ​ນີ້ ທາງ​ຝ່າຍ​ກຳປູ​ເຈຍ ​ໄດ້​ໃຫ້​ຄວາມ​ຫວັງ​ວ່າ: ສປປ ລາວ ກໍ​ຄື​ກະຊວງ​ວິທະຍາສາດ ​ແລະ ​ເຕັກ​ໂນ​ໂລ​ຊີ ​ຈະມີ​ບົດຮຽນ​ກ່ຽວ​ກັບ​ການ​ຄຸ້ມ​ຄອງ ​ແລະ ຊຸກຍູ້​ສົ່ງ​ເສີມ​ວຽກ​ງານ​ວິທະຍາສາດ ​ແລະ ​ເຕັກ​ໂນ​ໂລ​ຊີ ​ໃຫ້​ແກ່ກຳປູ​ເຈຍ. ດັ່ງ​ນັ້ນ ຈຶ່ງ​ຈຳ​ເປັນ​ຕ້ອງ​ໄດ້​ຮ່ວມ​ກັນ ​ເພື່ອ​ສຶກສາ​ ​ແລະ ຖອດ​ຖອນ​ບົດຮຽນ ​ໃນ​ວຽກ​ງານ​ດັ່ງກ່າວ, ພ້ອມ​ນີ້ ທັງ​ສອງ​ຝ່າຍ​ຍັງໄດ້​ຕົກລົງ​ ​ແລະ ​ເຫັນ​ດີ​ໃນ​ການ​ຄົ້ນ​ຄ້ວາ​ ​ແລະ ເຊັນ​ສັນຍາ​ບົດ​ບັນທຶກ​ຊ່ວຍ​ຈຳ (MOU) ຮ່ວມ​ກັນ ​ແລະ ຫລັງ​ຈາກ​ນັ້ນ ກໍ​ຈະ​ມີ​ການ​ພົບ​ປະ​ຂອງ​ການ​ນຳ​​ທັງ​ສອງກະຊວງ ​ເພື່ອ​ນຳ​ໄປ​ຈັດ​ຕັ້ງ​ຜັນ​ຂະຫຍາຍ​ໃຫ້​ໄດ້​ຮັບ​ໝາກຜົນ​ດີ​ຂຶ້ນ​

ທີ່ມາ ໜັງສືພິມລາວພັດທະນາ