ກອງປະຊຸມ ໄດ້ຮັບຟັງບົດລາຍງານການເມືອງ ຈາກສະຫາຍເລຂາຄະນະ ບໍລິຫານງານພັກແຂວງ ​ເຊິ່ງໄດ້ຍົກໃຫ້ເຫັນໝາກຜົນ ຂອງການຈັດຕັ້ງປະຕິບັດ ມະຕິ ກອງປະຊຸມໃຫຍ່ ຄັ້ງທີ VIII ຂອງຕົນ ໃນໄລຍະ 5 ປີຜ່ານມາ ເປັນຕົ້ນ ໄດ້ເຮັດໃຫ້ແຂວງຫົວພັນ ໃຫ້ມີຄວາມສະຫງົບປອດໄພ, ລະບົບການເມືອງ ມີສະຖຽນ ລະພາບ, ສັງຄົມມີຄວາມເປັນ ລະບຽບຮຽບຮ້ອຍໂດຍພື້ນຖານ, ຊຸກຍູ້ການພັດທະນາທາງດ້ານ ເສດຖະກິດ-ສັງຄົມ ໄດ້ມີບາດກ້າວຂະຫຍາຍ ຕົວຢ່າງບໍ່ຢຸດຢັ້ງ.ກອງປະຊຸມ ໄດ້ປະກອບຄຳຄິດຄຳເຫັນ ເພື່ອເຮັດໃຫ້ກອງປະຊຸມ ມີເນື້ອໃນເລິກເຊິ່ງຄົບຖ້ວນ, ພ້ອມທັງໃຊ້ສິດ ປະຊາທິປະໄຕ ປ່ອນບັດຄັດເລືອກ ເອົາຄະນະ ບໍລິຫານງານພັກ ແຂວງຫົວພັນ ຊຸດທີ IX ຈຳນວນ 33 ສະຫາຍ, ຍິງ 4 ສະຫາຍ. ກອງປະຊຸມ ຄັ້ງປະຖົມມະລຶກ ໄດ້ເຫັນດີເປັນເອກະພາບ ເລືອກຕັ້ງ ເອົາຄະນະປະຈຳພັກແຂວງ ຈຳນວນ 11 ສະຫາຍ, ຍິງ 1 ສະຫາຍ ແລະ ເລືອກເອົາ ສະຫາຍ ວັນໄຊ ແພງຊຸມມາ ເປັນເລຂາຄະນະ ບໍລິຫານງານພັກແຂວງ, ສະຫາຍ ຄຳວອນ ບຸນທະວົງ, ສະຫາຍ ຄຳຜິວ ວົງສະຫວັນ ແລະ ສະຫາຍນາງ ແພງ ກັນຍາພິມ ເປັນຮອງເລຂາ, ເລືອກເອົາສະຫາຍ ຄຳສອນ ເທບວົງຊຳ ເປັນປະທານກວດກາ. ທີ່ປະຊຸມຍັງໄດ້ປ່ອນບັດຄັດເລືອກ ເອົາຜູ້ແທນສົມບູນ ເພື່ອເຂົ້າຮ່ວມ ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ X ຂອງພັກ ຈຳນວນ 33 ສະຫາຍ ແລະ ຜູ້ແທນສຳຮອງ 3 ສະຫາຍ.

ກອງປະຊຸມ ໄດ້ຮັບຟັງການໂອ້ລົມຂອງ ສະຫາຍ ພັນຄຳ ວິພາວັນ, ​ກ່ອນອື່ນ ທ່ານໄດ້ສະແດງ ຄວາມຍ້ອງຍໍຊົມເຊີຍ ຕໍ່ຜົນສຳເລັດ ທີ່ແຂວງຫົວພັນ ຍາດມາໄດ້ ໃນໄລຍະ 5 ປີ ຜ່ານມາ ພ້ອມດຽວກັນນີ້ ທ່ານຍັງໄດ້ເນັ້ນ ບາງບັນຫາສຳຄັນ​ທີ່ຕ້ອງເພີ່ມທະວີການ ຊີ້ນຳ-ນຳພາ ເພື່ອຮັບປະກັນ ເຮັດໃຫ້ທົ່ວ ແຂວງຫົວພັນ ມີສະຖຽນລະພາບ ທາງດ້ານການເມືອງ ຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ. ເພີ່ມທະວີຄວາມ ສາມັກຄີ ເປັນປຶກແຜນ ແໜ້ນໜາ ຂອງປະຊາຊົນບັນດາເຜົ່າ ຕິດພັນກັບມູນເຊື້ອປະຕິວັດ, ມູນເຊື້ອວິລະຊົນ ຂອງແຂວງຫົວພັນ, ເປັນປັດໄຈພື້ນຖານ ຮັບປະກັນໃຫ້ ແຂວງຫົວພັນ ມີການພັດທະນາ. ຄະນະພັກທຸກຂັ້ນ ຕ້ອງສືບຕໍ່ຄົ້ນຄວ້າ, ກຳນົດໃຫ້ຈະແຈ້ງລະອຽດຕື່ມ ກ່ຽວກັບການກຳນົດ ທ່າແຮງຂອງແຂວງ ແລະ ຂອງແຕ່ລະທ້ອງຖິ່ນ ເພື່ອນຳໃຊ້ທ່າແຮງດັ່ງກ່າວ ເຂົ້າສູ່ການພັດທະນາ ເຂົ້າສູ່ການແກ້ໄຂລຶບລ້າງຄວາມທຸກຍາກ ຍົກລະດັບຊີວິດການເປັນຢູ່ ທາງດ້ານວັດຖຸ ແລະ ຈິດໃຈ ຂອງປະຊາຊົນ ບັນດາເຜົ່າໃຫ້ດີຂຶ້ນ. ສະເໜີໃຫ້ການນຳແຂວງເອົາໃຈໃສ່ຄົ້ນຄວ້າ ຖອດຖອນບົດຮຽນ ຂອງບັນດາແຂວງຕ່າງໆ ໃນທົ່ວປະເທດ ເພື່ອນຳເອົາ ບົດຮຽນເຫລົ່ານັ້ນ ມານຳໃຊ້ ແລະ ປັບປຸງແກ້ໄຂບັນຫາຂອງຕົນ, ພ້ອມນັ້ນຕ້ອງເອົາໃຈໃສ່ຮ່ວມມື ໃຫ້ແໜ້ນແຟ້ນກັບບັນດາແຂວງ ທີ່ໃກ້ຄຽງ ແລະ ເພື່ອນບ້ານຫວຽດນາມ ເພື່ອຜົນປະໂຫຍດ ການພັດທະນາຮ່ວມກັນ ເປັນຕົ້ນ ການຮ່ວມມື ດ້ານວຽກງານປ້ອງກັນຊາດ, ປ້ອງກັນຄວາມສະຫງົບ, ການທ່ອງທ່ຽວ, ການອະນຸລັກມູນເຊື້ອປະຫວັດສາດ, ວັດທະນະທຳ ແລະ ອື່ນໆ. ເອົາໃຈໃສ່ປັບປຸງ ອຳນາດການປົກຄອງທຸກຂັ້ນ ໃຫ້ເຂັ້ມແຂງ, ໂປ່ງ​ໄສເປັນທີ່ເພິ່ງ ຂອງປະຊາຊົນຢ່າງແທ້ຈິງ ໝາຍຄວາມວ່າຕ້ອງປົກຄອງ ໂດຍຄວາມຍຸຕິທຳ, ການປົກຄອງຕ້ອງຢຶດໝັ້ນ ຕາມຫລັກຂອງກົດໝາຍ, ບໍ່ເລືອກປະຕິບັດ, ບໍ່ລຳອຽງ, ບໍ່ສວຍໃຊ້ໂອກາດ, ບໍ່ສວຍໃຊ້ໜ້າທີ່ຕຳແໜ່ງ, ບໍ່ແລ່ນນຳສິດຜົນປະໂຫຍດສ່ວນຕົວ, ບໍ່ຈຸ້ມເຈື້ອເຊື້ອສາຍ ແລະ ພັກພວກ. ປັບປຸງແບບແຜນ ວິທີເຮັດວຽກ ແລະ ແບບແຜນວິທີນຳພາ ຂອງຄະນະບໍລິຫານງານພັກແຂວງ ແລະ ຄະນະພັກແຕ່ລະຂັ້ນ ໃຫ້ໜັກແໜ້ນເຂັ້ມແຂງປອດ​ໄສ ກ່ອນອື່ນໝົດ ຕ້ອງຢຶດໝັ້ນຫລັກການລວມສູນ ປະຊາທິປະໄຕ ຕົກລົງເປັນໝຸ່ຄະນະ ແລະ ບຸກຄົນຮັບຜິດຊອບແທ້ຈິງ ຕາມລະບຽບຂອງພັກ.

ສຳລັບຄະນະບໍລິຫານງານພັກ ແຂວງຫົວພັນຊຸດໃໝ່ ​ແມ່ນ​ໄດ້ສ່ອງແສງໃຫ້ເຫັນ ເຖິງລັກສະນະສືບທອດຕໍ່ເນື່ອງ, ມີທັງຕົວແທນ ​ເພດ, ເຜົ່າ, ຮຸ່ນອາວຸໂສ, ຮຸ່ນກາງ ແລະ ຮຸ່ນໜຸ່ມ ​ເຊິ່ງແຕ່ລະສະຫາຍ ລ້ວນແຕ່ແມ່ນຜູ້ທີ່ມີເງື່ອນໄຂ, ມາດຖານຄົບຖ້ວນ ສະນັ້ນ ສະຫາຍ ຄະນະບໍລິຫານງານຊຸດໃໝ່ ຕ້ອງເພີ່ມທະວີຄວາມ ໜັກແໜ້ນ ທາງດ້ານການເມືອງ, ມີຄຸນສົມບັດສິນທຳປະຕິວັດ, ມີແບບແຜນວີທີ່ເຮັດວຽກ, ມີຫົວຄິດປະດິດສ້າງ, ກ້າຄິດ, ກ້າເຮັດ, ກ້າຮັບຜິດຊອບ ຕໍ່ໜ້າທີ່ການເມືອງຂອງຕົນ.

ຂ່າວແລະຮູບຈາກ: ສຳນັກຂ່າວສານປະເທດລາວ