“ຫົງແດງ” ລິເວີພູ ເກັບໄຊຊະນະນັດທຳອິດ ການແຂ່ງຂັນ ຢູຟາ ຢູໂຣປາລີກ ຮອບແບ່ງກຸ່ມ ເຊືອດ ຣູບິນ ຄາຊານ ແບບຫວຸດຫວິດ 1-0 ຈາກປະຕູຂອງ ຈໍດອນ ໄອ ປີກດາວຮຸ່ງ ທີ່ສະໜາມ ຄາຊານ ອາຣີນາ ເມື່ອວັນພະຫັດວັນທີ 5 ພະຈິກ 2015 ທີ່ຜ່ານມາຂື້ນເປັນອັນດັບ 2 ຂອງກຸ່ມ

ເກມການແຂ່ງຂັນດຸເດືອດຕັ້ງແຕ່ເຄີ່ງເວລາາທຳອິດທັງສອງທີມບໍ່ສາມາດຍິງປະຕູກັນໄດ້, ຈົນເຖິງເຄີ່ງເວລາທີ 2 ໃນນາທີ 52 ໂຣເບໂຕ ເຟີມິໂນ ສົ່ງຊີ້ງບານຈັງຫວະດຽວອອກຂວາ ຈໍດອນ ໄອບ໌ ແລ່ນດ້ວຍຄວາມໄວທະລຸເຂົ້າໄປຍິງຜ່ານມື ເຊີໄກ ໄຣຊີຄອຟ ຜ່ານເສົາເບື້ອງຊ້າຍມືໄປຂື້ນຳກ່ອນ 1-0, ຕໍ່ມາໃນນາທີ 58 ຈໍດອນ ໄອບ໌ ເປີດແຈຈາກເບື້ອງຂວາ ເດຢັນ ລອຟເຣນ ໂໝ່ງແຕ່ກໍ່ຍັງບໍ່ເພີ່ມປະຕູ

ຈົນມາເຖິງໃນນາທີ 68 ອະດຳ ລັລລານາ ລາກບານຈາກກາງສະໜາມ ສົ່ງອອກຂວາໃຫ້ ຈໍດອນ ໄອບ໌ ຍິງເນັ້ນໆ ເຊີໄກ ໄຣຊີຄອຟ ເຊບຊ່ວຍໄວ້ໄດ້ ຈົບເກມ ລິເວີພູ ເອົາຊະນະ ຣູບິນ ຄາຊານ ເກັບເພີ່ມເປັນ 6 ຄະແນນຈາກ 4 ນັດ ຢູ່ອັນດັບທີ 2ຂອງຕາຕະລາງກຸ່ມ