ສຳນັກຂ່າວຕ່າງປະເທດ ລາຍງານໃນວັນທີ 5 ພະຈິກນີ້ວ່າ ທ່ານ ວິກເຕີ້ ພອນຕາ ນາຍົກລັດຖະມົນຕີຣູມານີ ໄດ້ປະກາດລາອອກຈາກຕຳແໜ່ງ ໃນມື້ວານນີ້ (4 ພະຈິກ) ເພື່ອສະແດງຄວາມຮັບຜິດຊອບ ຕໍ່ເຫດໂສກນາຕະກຳ ໄຟໄໝ້ຮ້ານບັນເທີງ ໂຄເລັກທີບ ໃຈກາງນະຄອນຫລວງບຸບກາແຣັດ ຊຶ່ງຕົ້ນເຫດເກີດຈາກ ການຈູດພຸດອກໄມ້ໄຟ ປະກອບແສງສີສຽງຂອງວົງດົນຕີ ເປັນເຫດເຮັດໃຫ້ມີຜູ້ເສຍຊີວິດ 32 ຄົນ ແລະ ບາດເຈັບກ່ວາ 130 ຄົນ ໃນມື້ວັນທີ 30 ຕຸລາຜ່ານມາ.

ທັງນີ້ ເນື່ອງຈາກຄືນວັນທີ 3 ພະຈິກຜ່ານມາ ໄດ້ມີປະຊາຊົນຊາວຣູມານີ ປະມານ 20,000 ຄົນ ໄດ້ອອກມາໂຮມຊຸມນຸມປະທ້ວງ ສະແດງຄວາມບໍ່ພໍໃຈ ແລະ ຮຽກຮ້ອງໃຫ້ລັດຖະບານສະແດງຄວາມຮັບຜິດຊອບ ພ້ອມທັງກົດດັນໃຫ້ນາຍົກລັດຖະມົນຕີ ແລະ ລັດຖະມົນຕີກະຊວງພາຍໃນລາອອກ.