ໃນຕອນເຊົ້າຂອງວັນທີ 3 ພະຈິກນີ້, ຢູ່ກະຊວງແຮງງານ ແລະ ສະຫວັດດີການສັງຄົມ, ທ່ານ ດຣ. ຄຳແພງ ໄຊສົມແພງ ລັດຖະມົນຕີວ່າການກະຊວງແຮງງານ ແລະ ສະຫວັດດີການສັງຄົມ ໄດ້ຕ້ອນຮັບທ່ານ ກິມ ຊູ ວອນ (Kim Soo-Gwon) ເອກອັກຄະລັດຖະທູດ ສ.ເກົາຫລີ ປະຈໍາລາວ ເຂົ້າພົບປະເພື່ອປຶກສາຫາລືເຖິງຫລາຍບັນຫາທີ່ພົວພັນກັບວຽກງານແຮງງານ ແລະ ສະຫວັດດີການສັງຄົມທີ່ສອງຝ່າຍມີຄວາມສົນໃຈ.
ທ່ານທູດ ຍັງໄດ້ຖືໂອກາດດັ່ງກ່າວ ແຈ້ງໃຫ້ທ່ານລັດຖະມົນຕີວ່າການກະຊວງແຮງງານ ແລະ ສະຫວັດດີການສັງຄົມ ຮັບຮູ້ໃນເບື້ອງຕົ້ນກ່ຽວກັບການຮ່ວມມືຊ່ວຍເຫລືອຂອງ ລັດຖະບານ ສ.ເກົາຫລີ ແກ່ ສປປ ລາວ, ໃນດ້ານແຮງງານ ແລະ ສະຫວັດດີການສັງຄົມ, ເຊິ່ງຈະມີການເຊັນສັນຍາຮັບເອົາແຮງງານລາວໄປເຮັດວຽກຢູ່ ສ.ເກົາຫລີ ໃນທ້າຍປີນີ້ ແລະ ພ້ອມນັ້ນ ຍັງໃຫ້ທຶນຊ່ວຍເຫລືອທຸກດ້ານໃນການພັດທະນາສີມືແຮງງານ ລາວ-ເກົາຫລີ.
ທ່ານທູດກ່າວວ່າ: ລັດຖະບານ ສ.ເກົາຫລີ ຍິນດີຮັບເອົາແຮງງານຈາກ ສປປ ລາວໄປເຮັດວຽກຢູ່ ສ.ເກົາຫລີ ເພື່ອປະກອບເຂົ້າໃນຂະແໜງການຕ່າງໆ ທີ່ສາມາດປະກອບເປັນອາຊີບ ແລະ ສ້າງໃຫ້ແຮງງານລາວເປັນແຮງງານທີ່ມີສີມື, ສ້າງນາຍຊ່າງໃຫ້ມີຄຸນນະພາບ ແລະ ສ້າງວຽກເຮັດງານທຳທີ່ເປັນຫລັກແຫລງໃຫ້ແກ່ຄອບຄົວຂອງເຂົາເຈົ້າ.
ທ່ານ ດຣ. ຄຳແພງ ໄຊສົມແພງ ໄດ້ຖືໂອກາດນີ້ ຕາງໜ້າລັດຖະບານລາວ ຂອບໃຈອີກເທື່ອໜຶ່ງ ໃນການຊ່ວຍເຫລືອຂອງ ສ.ເກົາຫລີ ໃນການແກ້ໄຂວຽກເຮັດງານທຳໃຫ້ແຮງງານລາວ ແລະ ຊ່ວຍເຮັດໃຫ້ເຂົາເຈົ້າ ກາຍເປັນນາຍຊ່າງທີ່ມີສີມືດີ ສາມາດກຸ້ມຕົນເອງ ແລະ ຄອບຄົວໄດ້.
ແຫລ່ງຂ່າວ:
