ກອງປະຊຸມໃຫຍ່ຄັ້ງທີ 9 ຂອງອົງຄະນະພັກແຂວງຫົວພັນ ໄດ້ໄຂຂື້ນຢ່າງເປັນທາງການໃນຕອນເຊົ້າຂອງວັນທີ່ 4 ພະຈິກ 2015 ນີ້ ຢູ່ທີ່ສະໂມສອນຂອງແຂວງ. ໂດຍພາຍໃຕ້ການເປັນປະທານຂອງສະຫາຍ ຄຳຮຸ່ງ ເຮືອງວົງສີ ກຳມະການ ສູນກາງພັກ ເລຂາພັກແຂວງ ເຈົ້າແຂວງຫົວພັນ ແລະ ເປັນກຽດເຂົ້າຮ່ວມຂອງສະຫາຍ ດຣ ພັນຄຳ ວິພາວັນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ແຫ່ງ ສປປ ລາວ, ລັດຖະມົນຕີວ່າການກະຊວງສຶກສາທິການ ແລະ ກິລາ, ມີບັນດາສະຫາຍຜູ້ແທນເຂົ້າຮ່ວມທັງໝົດ 297 ສະຫາຍ, ໃນນີ້ຜູ້ແທນສົມບູນຕາງໜ້າໃຫ້ສະມາຊິກພັກ ໃນທົ່ວແຂວງ 237 ສະຫາຍ, ຍິງ 28 ສະຫາຍ ແລະ ບັນດາສະຫາຍແຂກທີ່ຖືກເຊີນຈາກແຂວງມີ: ແຂວງຫຼວງພະບາງ ແລະ ຊຽງຂວາງເຂົ້າຮ່ວມນຳ.
ໃນພິທີ ສະຫາຍເລຂາພັກແຂວງ ຄຳຮຸ່ງ ເຮືອງວົງສີ ໃນນາມປະທານກອງປະຊຸມໄດ້ໃຫ້ກຽດມີຄຳເຫັນກ່າວເປີດກອງປະຊຸມໃຫຍ່ຄັ້ງທີ 9 ຂອງອົງຄະນະພັກແຂວງຫົວພັນຢ່າງເປັນທາງການ.
ກອງປະຊຸມໃຫຍ່ຄັ້ງທີ 9 ຂອງອົງຄະນະພັກແຂວງຫົວພັນ ຈະໄດ້ດຳເນີນໄປເປັນເວລາ 3 ວັນ, ໃນວາລະດຳເນີນກອງປະຊຸມ ບັນສະຫາຍຜູ້ແທນທີ່ເຂົ້າຮ່ວມຈະໄດ້ຮັບຟັງຜ່ານຮ່າງລາຍງານການເມືອງຕໍ່ກອງປະຊຸມ ຈາກສະຫາຍເລຂາພັກແຂວງ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ່ 8 ແຕ່ 2016-2020, ຍຸດທະສາດພັດທະນາແຂວງຫົວພັນແຕ່ນີ້ເຖີງປີ 2025 ແລະ ວິໄສທັດ ຮອດປີ 2030.
ຈາກນັ້ນບັນດາຜູ້ແທນກອງປະຊຸມຈະໄດ້ພ້ອມກັນປະກອບຄຳຄິດຄຳເຫັນເພື່ອໃຫ້ກອງປະຊຸມຄັ້ງນີ້ມີເນື້ອໃນເລິກເຊິ່ງຄົບຖ້ວນ ແລະ ຈະໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະບໍລິຫານງານພັກແຂວງຊຸດໃໝ່ (ຊຸດທີ 9 ) ຕາມລະບຽບການ.
ຈາກນັ້ນ ສະຫາຍ ດຣ ພັນຄຳ ວິພາວັນ ກຳມະການ ກົມການເມືອງສູນກາງພັກ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງສຶກສາທິການ ແລະ ກິລາ ໃນນາມ ຕາງໜ້າໃຫ້ເລຂາຄະນະບໍລິຫານງານສູນກາງພັກຈະໄດ້ໃຫ້ກຽດມີຄຳເຫັນໂອ້ລົມຕໍ່ທີ່ປະຊຸມເພື່ອເຮັດໃຫ້ກອງປະຊຸມຄັ້ງນີ້ ເຕັມໄປດ້ວຍຄວາມໝາຍຄວາມສຳຄັນ ແລະ ທັງເປັນການຊີ້ທິດເຍືອງທາງໃຫ້ບັນດາສະຫາຍ ຄະນະບໍລິຫານງານພັກແຂວງຫົວພັນຊຸດໃໝ່ ໃນການຊີ້ນຳໆພາຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງນີ້ໃຫ້ໄດ້ຮັບຜົນເປັນຈິງ.
