ສຳນັກຂ່າວຕ່າງປະເທດ ລາຍງານໃນວັນທີ 4 ພະຈິກນີ້ວ່າ ປະທານາທິບໍດີ ໝ່າອິງຈິ່ວ ແຫ່ງໄຕ້ຫວັນ ຈະພົບປະຫາລືເປັນຄັ້ງປະຫວັດສາດ ກັບປະທານປະເທດຈີນ ສີຈິ້ນຜິງ ທີ່ປະເທດສິງກະໂປ ໃນວັນເສົາທີ 7 ພະຈິກນີ້ ຊຶ່ງຈະເຮັດໃຫ້ເປັນການພົບປະກັນ ລະຫວ່າງຜູ້ນຳຈີນ ແລະ ໄຕ້ຫວັນ ເປັນຄັ້ງທຳອິດ ໃນຮອບ 66 ປີ ນັບຕັ້ງແຕ່ການສະຖາປະນາ ສາທາລະນະລັດປະຊາຊົນຈີນ ໃນປີ 1949 ເປັນຕົ້ນມາ ຊຶ່ງໃນເວລານັ້ນ ພັກກົກມິນຕັງ ໄດ້ອອກຈາກຈີນແຜ່ນດິນໃຫຍ່ ແລ້ວມາຢູ່ເກາະໄຕ້ຫວັນ ເພື່ອຕັ້ງລັດຖະບານຂອງຕົນຂຶ້ນ ໂດຍມີນະໂຍບາຍຢາກແຍກເອກະລາດຈາກຈີນ.

ແນວໃດກໍຕາມ ໂດຍປະຕິບັດຕາມນະໂຍບາຍຈີນດຽວສອງລະບອບ ຂອງພັກກອມມູນິດຈີນ ໄດ້ເຮັດໃຫ້ຄວາມສຳພັນ ລະຫວ່າງຈີນ ແລະ ໄຕ້ຫວັນ ນັບມື້ນັບ ເພີ່ມທະວີຄວາມເປັນປຶກແຜ່ນຫລາຍຂຶ້ນ ໂດຍສະເພາະນັບຕັ້ງແຕ່ ທ່ານ ໝ່າອິງຈິວ ຫົວໜ້າພັກກົກມິນຕັງ ໄດ້ກ້າວຂຶ້ນມາດຳລົງຕຳແໜ່ງ ປະທານາທິບໍດີ ແຫ່ງເກາະໄຕ້ຫວັນ ໃນປີ 2008 ເປັນຕົ້ນມາ.