ຍົນຂົນສົ່ງ ໂບອິ້ງ 747-400 ນຳສົ່ງງົວຈາກອົສຕຣາລີ ມາຮອດລາວແລ້ວ ການລໍາລຽງງົວ ງວດທໍາອິດ 300 ກວ່າໂຕຈາກ ປະເທດອົດສະຕາລີ ມາ ຮອດເມືອງລາວແລ້ວ.

ຂປລ. ເຮືອບິນຂອງສາຍກາຍບິນອາທລາສແອອົດສະຕາລີ ໄດ້ລໍາລຽງງົວງວດທໍາອິດ ຈໍານວນ 300 ກວ່າໂຕ ຈາກປະເທດອົດສະຕາລີ ມາຮອດສະໜາມບິນສາກົນວັດໄຕ ນະຄອນຫລວງວຽງຈັນຢ່າງເປັນທີ່ຮຽບຮ້ອຍແລ້ວເວລາ 12:00 ຂອງວັນທີ 3 ພະຈິກ 2015 ເພື່ອຈະສືບຕໍ່ນໍາໄປລ້ຽງຢູ່ຟາມລ້ຽງງົວທີ່ແຂວງຊຽງຂວາງ ພາຍຫລັງນັກລົງທຶນຍີ່ປຸ່ນ ໄດ້ສັ່ງຊື້ຫລາຍກວ່າ 1.000 ໂຕ.
ເຈົ້າໜ້າທີ່ຈາກກະຊວງກະສິກໍາ ແລະ ປ່າໄມ້ເປີດເຜີຍວ່າ: ບໍລິສັດພັດທະນາກະສິກໍາລາວ-ຍີ່ປຸ່ນຊຽງຂວາງຈໍາກັດ ໄດ້ລົງທຶນສໍາປະທານເນື້ອທີ່ດິນເປົ່າວ່າງປະມານ 1.500 ເຮັກຕາຢູ່ເມືອງແປກ ແຂວງຊຽງຂວາງ ໂດຍມີຈຸດລ້ຽງງົວພັນຊີ້ນ ແລະ ງົວນົມເພື່ອສະໜອງໃຫ້ພາຍໃນ ແລະ ຕ່າງປະເທດ ພ້ອມດຽວກັນນັ້ນ ນັກລົງທຶນຍີ່ປຸ່ນຍັງສ້າງຕັ້ງໂຮງງານປຸງແຕ່ງຊີ້ນ ແລະ ນົມຢູ່ແຂວງດັ່ງກ່າວ.
ປັດຈຸບັນນີ້ ເນື້ອທີ່ດິນເປົ່າວ່າງ ແລະ ເຊື່ອມໂຊມໄດ້ຮັບການປັບປຸງ ແລະ ປູກຫຍ້າເກືອບສໍາເລັດ ສະນັ້ນ ງົວພັນຊີ້ຈໍານວນ 300 ກວ່າໂຕເຫລົ່ານັ້ນແມ່ນມີອາຫານຮອງຮັບໄວ້ແລ້ວເພາະບໍລິສັດດັ່ງກ່າວໄດ້ລົງມືປູກຫຍ້າກຽມໄວ້ແລ້ວ. ແນວໃດກໍດີ ຍັງເຫລືອງງົວພັນຊີ້ນ ແລະ ພັນນົມອີກ 1.000 ກວ່າໂຕຄາດວ່າຈະຂົນສົ່ງມາໃນໄວໆນີ້.