ເຟ​ສບຸກບັງຄັບໃຫ້​ທີມ​ງານ​ປ່ຽນ​ໄປ​ໃຊ້ Android ເພາະ​ໃຊ້ iPhone ກັນ​ຫລາຍ​ເກີນ​ໄປ ໃຫ້​ຄວາມ​ສຳຄັນ​ກັບ​ການ​ພັດທະນາ​ແອັບ Facebook ເທິງ Android
ເມື່ອ​ວັນທີ່ 3 ພະ​ຈິກ ສຳ​ນັກ​ຂ່າວ Independent ໄດ້​ລາຍ​ງານ​ວ່າ Chris Cox ຫົວ​ໜ້າ​ຝ່າຍ​ຜະລິດຕະພັນ​ຂອງ​ເຟ​ສບຸກກຳ​ລັງ​ອອກ​ນະໂຍບາຍ​ບັງຄັບ​ລູກ​ທີມ​ຂອງ​ພວກເຂົາ​ໃຫ້​ປ່ຽນ​ໄປ​ໃຊ້​ສະ​ມາດໂຟນ Android ເນື່ອງ​ຈາກ​ປະຈຸບັນ​ມີພະ​ນັກ​ງານ​ເຟ​ສບຸກ​ໃຊ້ iPhone ກັນ​ຫລາຍ​ເກີນ​ໄປ ຊຶ່ງ​ການ​ທີ່​ພວກເຂົາ​ເຮັດ​ເຊັ່ນ​ນີ້​ບໍ່​ໄດ້​ເປັນ​ການ​ຕໍ່​ຕ້ານ iPhone ແຕ່​ຢ່າງ​ໃດ ພຽງ​ແຕ່​ພວກເຂົາ​ຢາກ​ໃຫ້​ທີມ​ງານ​ໄດ້​ໃຊ້​ງານ​ແອັບ Facebook ເທິງ Android ແລະ​ຮັບ​ຮູ້​ເຖິງ​ບັນຫາ​ທີ່​ຜູ້​ໃຊ້​ສ່ວນ​ໃຫຍ່​ຕ້ອງ​ປະ​ສົບ ເນື່ອງ​ຈາກ Android ເປັນ​ລະບົບ​ປະຕິບັດການ​ທີ່​ມີ​ຄົນ​ໃຊ້​ກັນ​ຫລາຍ​ທີ່ສຸດ​ໃນ​ໂລກ ດ້ວຍ​ຈຳນວນ​ຫລາຍ​ເຖິງ 82.8% ສ່ວນ​ຜູ້​ໃຊ້ iOS ໃນ​ໂລກ​ນັ້ນ​ມີ​ພຽງ 13.9% ເທົ່າ​ນັ້ນ
ຈາກ​ກໍລະນີ​ດັ່ງ​ກ່າວ​ສະແດງ​ໃຫ້​ເຫັນ​ວ່າ​ເຟ​ສບຸກ​ໃຫ້​ຄວາມ​ສຳຄັນ​ກັບ​ຜູ້​ໃຊ້​ເທິງ Android ແລະ ​ຕ້ອງ​ການ​ໃຫ້​ທີມ​ງານ​ພັດທະນາ​ປັບປຸງ​ແອັບ ໃຫ້​ຕອບ​ບັນຫາ​ຜູ້​ໃຊ້​ໄດ້​ດີ​ທີ່ສຸດ ຊຶ່ງ Chris Cox ໄດ້​ກ່າວ​ວ່າ​ຖ້າ​ຫາກ​ພວກເຂົາ​ບໍ່​ບັງຄັບ​ໃຫ້​ລູກ​ທີມ​ປ່ຽນ​ໄປ​ໃຊ້ Android ​ພວກເຂົາ​ກໍ​​ຈະ​ໃຊ້​ແຕ່ iPhone ກັນ​ໝົດ