ຂປລ. ກອງປະຊຸມໃຫຍ່ ຜູ້ແທນອົງຄະນະພັກ ແຂວງອຸດົມໄຊ ຄັ້ງທີ VIII ໄດ້ໄຂຂຶ້ນຢ່າງເປັນທາງການ ໃນວັນທີ 2-3 ພະຈິກ 2015 ນີ້ ທີ່ສະໂມສອນ ແຂວງອຸດົມໄຊ ໂດຍພາຍໃຕ້ການເປັນປະທານ ຂອງສະຫາຍ ເພັດສາຄອນ ຫລວງອາໄພ ເລຂາພັກແຂວງ, ເຈົ້າແຂວງອຸດົມໄຊ, ໃຫ້ກຽດເຂົ້າຮ່ວມ ຂອງສະຫາຍ ດຣ. ບຸນປອນ ບຸດຕະນະວົງ ກຳມະການ ກົມການເມືອງສູນກາງພັກ, ຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ມີອະດີດການນຳ ແຂວງ, ພະນັກງານ ປະຕິວັດອາວຸໂສ, ວິລະຊົນແຫ່ງຊາດ, ນັກຮົບແຂ່ງຂັນ, ຜູ້ຊົງຄຸນວຸດທິ, ພ້ອມດ້ວຍແຂກຖືກເຊີນ ແລະ ບັນດາສະຫາຍ ຜູ້ແທນສົມບູນ 223 ສະຫາຍ, ຍິງ 23 ສະຫາຍ ເປັນຕົວແທນໃຫ້ແກ່ບັນດາສະຫາຍ ສະມາຊິກພັກ ຈໍານວນ 12.757 ສະຫາຍໃນທົ່ວແຂວງເຂົ້າຮ່ວມ ຢ່າງພ້ອມພຽງ.
ກອງປະຊຸມໃຫຍ່ ຜູ້ແທນອົງຄະນະພັກ ແຂວງອຸດົມໄຊ ຄັ້ງນີ້ ໄດ້ຮັບຟັງບົດລາຍງານການເມືອງກອງປະຊຸມໃຫຍ່ ຂອງຄະນະບໍລິຫານງານພັກ ແຂວງອຸດົມໄຊ ຄັ້ງທີ VII ແຕ່ ປີ 2011-2015, ວິໄສທັດຮອດປີ 2030 ແລະ ຍຸດທະສາດຮອດປີ 2025 ລວມທັງການປະກອບຄຳຄິດເຫັນຈາກບັນດາ ພະແນກການ, ເມືອງ ແລະ ຄອບຄົວຕົວແບບ ເຊິ່ງບັນດາຜູ້ແທນໄດ້ຄົ້ນຄວ້າ, ປະກອບຄໍາເຫັນ ແລະ ຮັບຮອງເອົາແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII; ຮັບຮອງເອົາບົດສຳຫລວດ ການນໍາພາຂອງຄະນະບໍລິຫານງານພັກແຂວງ ຊຸດທີ VII; ພ້ອມທັງຈະປ່ອນບັດຄັດເລືອກເອົາຄະນະບໍລິຫານງານພັກແຂວງຊຸດທີ VIII; ປ່ອນບັດຄັດເລືອກເອົາຄະນະປະຈຳພັກແຂວງ, ເລືອກເອົາເລຂາ-ຮອງ ເລຂາພັກແຂວງ, ປະທານ-ຮອງປະທານກວດກາພັກ ແລະ ປ່ອນບັດຄັດເລືອກເອົາ ຜູ້ແທນສົມບູນ-ສຳຮອງ ໄປຮ່ວມກອງປະຊຸມໃຫຍ່ ຄັ້ງທີ X ຂອງພັກ. ພິເສດ ກອງປະຊຸມຈະໄດ້ຮັບຟັງ ການໂອ້ລົມຂອງສະຫາຍ ດຣ. ບຸນປອນ ບຸດຕະນະວົງ ອີກດ້ວຍ.
ສະຫາຍ ເພັດສາຄອນ ຫລວງອາໄພ ໄດ້ກ່າວໄຂກອງປະຊຸມ ໂດຍໄດ້ຍົກໃຫ້ເຫັນຜົນສຳເລັດ ໃນຫລາຍດ້ານໃນໄລຍະ 5 ປີຜ່ານມາ ໂດຍສະເພາະການພັດທະນາເສດຖະກິດ, ການແກ້ໄຂຄວາມທຸກຍາກ, ການຫັນເສດຖະກິດທຳມະຊາດ ໄປສູ່ເສດຖະກິດສິນຄ້າເທື່ອລະກ້າວ ເຮັດໃຫ້ເສດຖະກິດແຂວງອຸດົມໄຊ ຂະຫຍາຍຕົວຢ່າງຕໍ່ເນື່ອງໃນລະດັບສະເລ່ຍ 10,3% ຕໍ່ປີ, ລວມຍອດຜະລິດຕະພັນພາຍໃນມີມູນຄ່າລວມ 3.000 ກວ່າຕື້ກີບ, ສະເລ່ຍລາຍຮັບຂອງປະຊາກອນ 9 ລ້ານກວ່າກີບ ຕໍ່ຄົນຕໍ່ປີ ຫລື 1.200 ໂດລາສະຫະລັດ. ໃນໂອກາດດຽວກັນນີ້ ສະຫາຍ ເພັດສາຄອນ ຫລວງອາໄພ ໄດ້ຮຽກຮ້ອງໃຫ້ບັນດາຜູ້ແທນກອງປະຊຸມຈົ່ງເຊີດຊູຄວາມຮັບຜິດຊອບ, ເສີມຂະຫຍາຍປະຊາທິປະໄຕ, ພ້ອມກັນຄົ້ນຄວ້າປະກອບຄຳເຫັນ ແລະ ຕົກລົງບັນຫາຕ່າງໆໃຫ້ຖືກຕ້ອງ ແລະ ສອດຄ່ອງກັບສະພາບຄວາມເປັນຈິງ ເຮັດໃຫ້ການດຳເນີນກອງປະຊຸມໄດ້ຮັບຜົນສຳເລັດຢ່າງຈົບງາມ.
ແຫລ່ງຂ່າວ:
