ສະພາການຄ້າ ແລະ ອຸດສາຫະກຳແຫ່ງຊາດລາວ ຮ່ວມກັບສະມາຄົມຫັດຖະກຳລາວ ໄດ້ຈັດງານມະຫະກຳສີມືຫັດຖະກຳລາວ ຄັ້ງທີ 14 ປະຈຳປີ 2015 ຂຶ້ນລະຫວ່າງວັນທີ 30 ຕຸລາ ຫາ 3 ພະຈິກ 2015 ທີ່ສູນການຄ້າລາວ-ໄອເຕັກ ໂດຍການເປັນປະທານຮ່ວມຂອງທ່ານ ສີສະຫວາດ ທິຣະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ ທ່ານ ຫານຊະນະ ສີສານ ປະທານສະມາຄົມຫັດຖະກຳລາວ ເປັນກຽດເຂົ້າຮ່ວມຂອງທ່ານ ບຸນມີ ມະນີວົງ ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ທ່ານ ອານຸພາບ ຕຸນາລົມ ຮອງເຈົ້າຄອງນະຄອນຫຼວງ ພ້ອມດ້ວຍລັດຖະມົນຕີ ຫົວໜ້າກົມ ຮອງກົມ ທູຕານຸທູດ ແລະ ຂະແໜງການກ່ຽວຂ້ອງ.
ທ່ານປະທານສະມາຄົມຫັດຖະກຳລາວ ກ່າວວ່າ: ການຈັດງານໃນຄັ້ງນີ້ ເພື່ອເປັນການຮັບຕ້ອນ 2 ວັນປະຫວັດສາດ ກໍ່ຄືການສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ ວັນສະຖາປະນາ ສປປ ລາວ ຄົບຮອບ 40 ປີ ທັງເປັນການສ້າງໂອກາດໃຫ້ຊາວຊ່າງຫັດຖະກຳໃນທົ່ວປະເທດ ໄດ້ພົບປະແລກປ່ຽນບົດຮຽນ ພ້ອມທັງນຳເອົາຜະລິດຕະພັນຂອງຕົນມາວາງສະແດງ ຂາຍ ເພື່ອເຮັດການຕະຫຼາດຄືການຊອກຫາຄູ່ຄ້າ ຫຼື ຜູ້ຮ່ວມທຶນຮ່ວມທຸລະກິດ.
ໃນງານມະຫະກຳສີມືຫັດຖະກຳລາວຄັ້ງນີ້ ໄດ້ກຳນົດເອົາຫົວຂໍ້ປະຊາຄົມເສດຖະກິດອາຊຽນ ເປັນຫົວຂໍ້ງານເຄື່ອງຫັດຖະກຳທີ່ນຳມາສະແດງ ມີຈຳນວນ 2 ຮ້ອຍກວ່າຮ້ານ ແລະ ຍັງໄດ້ເຊື້ອເຊີນເອົາບັນດາປະເທດອາຊຽນ ແລະ ຄູ່ຮ່ວມສັນຍາເຂົ້າຮ່ວມວາງສະແດງ ເປັນຕົ້ນແມ່ນ ປະເທດກຳປູເຈຍ ມຽນມາ ໄທ ຫວຽດນາມ ແລະ ສປ ຈີນ ນອກຈາກນີ້ ຍັງໄດ້ຈັດກິດຈະກຳຮ່ວມກັບອາຊຽນ ເຊັ່ນ: ການເດີນແບບຊຸດນຸ່ງຫົ່ມປະຈຳຊາດຂອງບັນດາປະເທດອາຊຽນ ການສຳມະນາກ່ຽວກັບອາຊຽນ ໂດຍບັນຍາຍຈາກກົມນະໂຍບາຍ ກະຊວງອຸດສາຫະກຳ ແລະ ການຄ້າ ສະພາອຸດສາຫະກຳ ແລະ ການຄ້າແຫ່ງຊາດລາວ.
ພາຍໃນງານດັ່ງກ່າວ ຍັງມີກິດຈະກຳສຳມະນາໃຫ້ຄວາມຮູ້ແກ່ຊາວຊ່າງຫັດຖະກຳລາວ ງານສາທິດຜະລິດຕະພັນເຄື່ອງຫັດຖະກຳ ງານແຂ່ງຂັນຜະລິດຕະພັນດີເດັ່ນ ທັງນີ້ກໍ່ເພື່ອສົ່ງເສີມຫັດຖະກຳລາວໃຫ້ມີຫຼາຍຮູບແບບ ທັງປະລິມານ ແລະ ຄຸນະພາບ ພ້ອມນີ້ສະມາຄົມຫັດຖະກຳລາວ ຍັງຮ່ວມກັບອົງການ JETRO ປະເທດຍີ່ປຸ່ນ ຈັດກິດຈະກຳການແຂ່ງຂັນເຄື່ອງທີ່ລະນຶກທີ່ເປັນເຄື່ອງຫັດຖະກຳລາວ ເພື່ອກະກຽມໃຫ້ແກ່ກອງປະຊຸມສຸດຍອດອາຊຽນທີ່ ສປປ ລາວ ເປັນເຈົ້າພາບໃນປີ 2016 ແລະ ຍັງມີການວາງສະແດງຮູບພາບຜ້າໄໝ ທີ່ເປັນເອກະລັກຂອງແຕ່ລະປະເທດອີກດ້ວຍ.
ແຫລ່ງຂ່າວ:
