ຂປລ. ພິທີມອບ-ຮັບໜ້າທີ່ ລະຫວ່າງ ທ່ານ ພົງສະຫວັດ ບຸບຜາ ລັດຖະມົນຕີ, ຫົວໜ້າຫ້ອງວ່າການປະທານປະເທດ (ຜູ້ເກົ່າ) ແລະ ທ່ານ ຄໍາເມິງ ພົງທະດີ ເປັນລັດຖະມົນຕີ, ຫົວໜ້າຫ້ອງວ່າການປະທານປະເທດ (ຜູ້ໃໝ່) ໄດ້ຈັດຂຶ້ນໃນວັນທີ 30 ຕຸລາ 2015 ທີ່ຫ້ອງວ່າການປະທານປະເທດ(ຫໍຄໍາ) ໂດຍມີ ທ່ານ ບຸນຍັງ ວໍລະຈິດ ກໍາມະການກົມການເມືອງສູນກາງພັກ ຜູ້ປະຈໍາການ ຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ມີບັນດາຄະນະພັກ, ຫົວໜ້າກົມຄຸ້ມຄອງພະນັກງານຄະນະຈັດຕັ້ງສູນກາງພັກ, ຕາງໜ້າຫ້ອງວ່າການລັດຖະບານ, ພ້ອມດ້ວຍພະນັກງານ-ລັດຖະກອນ ພາຍໃນຫ້ອງການດັ່ງກ່າວ ເຂົ້າຮ່ວມ.
ເພື່ອສືບຕໍ່ຊີ້ນຳນຳພາ ແລະ ຄຸ້ມຄອງບໍລິຫານວຽກງານຂອງ ຫ້ອງວ່າການປະທານປະເທດ ທີ່ການຈັດຕັ້ງພັກ-ລັດຖະບານມອບໝາຍໃຫ້ ທັງປະຕິບັດພາລະບົດບາດ, ໜ້າທີ່ ແລະ ຂອບເຂດສິດຂອງຕົນ ໃຫ້ປະສົບຜົນສຳເລັດນັ້ນ, ທ່ານ ບຸນຍັງ ວໍລະຈິດ ໄດ້ໃຫ້ກຽດໂອ້ລົມໂດຍກ່າວວ່າ: ການມອບ-ຮັບໜ້າທີ່ ລະຫວ່າງ ລັດຖະມົນຕີ, ຫົວໜ້າຫ້ອງວ່າການປະທານປະເທດ ຜູ້ເກົ່າ ແລະ ຜູ້ໃໝ່ໃນຄັ້ງນີ້ ແມ່ນມີຄວາມສຳຄັນເປັນຢ່າງຍິ່ງ ທີ່ລັດຖະມົນຕີຜູ້ໃໝ່ຈະໄດ້ສືບຕໍ່ນຳພາ, ຜັນຂະຫຍາຍເນື້ອໃນຈິດໃຈຂອງພັກ-ລັດ ໃຫ້ປາກົດຜົນເປັນຈິງ. ພ້ອມກັນນັ້ນກໍເພື່ອເປັນການຮອງຮັບບໍາລຸງຍົກລະດັບ ພະນັກງານການນໍາຜູ້ທີ່ມີຄວາມຮູ້, ຄວາມສາມາດ ເຂົ້າໃນພາລະກິດລວມຂອງຊາດ. ການໜູນວຽນ, ການຊັບຊ້ອນໜ້າທີ່ ເຊິ່ງແມ່ນເປັນເລື່ອງປົກກະຕິ, ທັງເປັນກົດເກນ ແລະ ທັງແມ່ນຫລັກການຂອງພັກເຮົາ ທີ່ເຄີຍປະຕິບັດກັນມາ.
ພ້ອມກັນນີ້, ທ່ານລັດຖະມົນຕີຜູ້ໃໝ່ ກໍຕ້ອງໄດ້ເອົາໃຈໃສ່ນຳພາ ເຕົ້າໂຮມຄວາມສາມັກຄີໃນໝູ່ຄະນະ, ໃນພະນັກງານ-ລັດຖະກອນໃຫ້ແໜ້ນແຟ້ນ; ເອົາໃຈໃສ່ສຶກສາອົບຮົມການເມືອງແນວຄິດພະນັກງານການນໍາ ພາຍໃນກົມ ລວມທັງພະນັກງານ-ລັດຖະກອນ ທົ່ວຫ້ອງວ່າການປະທານປະເທດ ໃຫ້ມີທັດສະນະຫລັກໝັ້ນການເມືອງໜັກແໜ້ນ, ສ້າງໃຫ້ພະນັກງານມີສະຕິເຄົາລົບລະບຽບ-ກົດໝາຍ, ມີສະຕິຕໍ່ການຈັດຕັ້ງ; ເພີ່ມທະວີຄວາມຮັບຜິດຊອບຕໍ່ການນຳພາສະມາຊິກພັກ-ພະນັກງານ ໃນຂົງເຂດທີ່ຕົນຮັບຜິດຊອບ ໃຫ້ມີຜົນສໍາເລັດ.
ແຫລ່ງຂ່າວ:
