ບໍລິສັດ ວິມເປວຄອມລາວ ຈຳກັດ (ບີລາຍ) ເປັນບໍລິສັດໜຶ່ງທີ່ໄດ້ດຳເນີນທຸລະກິດກ່ຽວກັບດ້ານໂທລະຄົມໂທລະສັບມືຖືຢູ່ ສປປ ລາວ ເຊິ່ງໃນແຕ່ລະປີທາງບໍລິສັດໄດ້ປະຕິບັດຕາມຂໍ້ຕົກລົງ ແລະ ລະບຽບການຕ່າງໆທີ່ທາງລັດຖະບານ ສປປ ລາວ ໄດ້ວາງອອກ.
ອີງຕາມຂໍ້ຕົກລົງຂອງລັດຖະມົນຕີວ່າການ ກະຊວງໄປສະນີໂທລະຄົມມະນາຄົມ ແລະ ການສື່ສານ ສະບັບເລກທີ 1368/ປທສ ລົງວັນທີ 10/7/2013 ວ່າດ້ວຍການຈັດຕັ້ງ ແລະ ເຄື່ອນໄຫວຂອງກົມການເງິນ ແລະ ອີງຕາມແຜນມອບລາຍຮັບໃຫ້ກະຊວງການເງິນສົກປີ 2012-2013 ຊຶ່ງທາງບໍລິສັດ ວິມເປວຄອມລາວ ຈຳກັດ ເຫັນດີທີ່ຈະປະຕິບັດຕາມຂໍ້ຕົກລົງທີ່ທາງກະຊວງວາງອອກ ໃນການມອບຄ່າທຳນຽມ ແລະ ຄ່ານຳໃຊ້ຄື້ນຄວາມຖີ່ວິທະຍຸສົກປີ 2012-2013 ເປັນຈຳນວນເງິນທັງໝົດ 7.984.000.000 ກີບ.
ພິທີມອບ-ຮັບເງິນຄ່າທຳນຽມ ແລະ ຄ່ານຳໃຊ້ຄື້ນຄວາມຖີ່ວິທະຍຸດັ່ງກ່າວ ໄດ້ຈັດຂຶ້ນວັນທີ 28 ພະຈິກ 2013 ນີ້ ທີ່ກະຊວງໄປສະນີໂທລະຄົມມະນາຄົມ ແລະ ການສື່ສານ ກ່າວມອບໂດຍແມ່ນທ່ານ ຢັດເຊີ ມາເຮີ ຜູ້ບໍລິຫານໃຫຍ່ ບໍລິສັດ ວິມເປວຄອມລາວ ຈຳກັດ ແລະ ກ່າວຮັບໂດຍແມ່ນທ່ານ ສົມລິດ ພູທອນສີ ຫົວໜ້າກົມໂທລະຄົມ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ມີພາກສ່ວນທີ່ກ່ຽວຂ້ອງທັງສອງຝ່າຍ ເຂົ້າຮ່ວມເປັນພະຍານ.