ສຳນັກຂ່າວຕ່າງປະເທດ ລາຍງານໃນວັນທີ 2 ພະຈິກນີ້ວ່າ ທ່ານ ວິກເຕີ ໂຊໂຣເຊນໂກ ປະທານຄະນະກຳມະການ ການບິນລະຫວ່າງລັດຂອງຣັດເຊຍ ໄດ້ເປີດເຜີຍວ່າ ຈາກເຫດເຮືອບິນແອບັສ A320 ຖ້ຽວບິນ KGL9262 ຂອງຣັດເຊຍ ຕົກຢູ່ປະເທດອີຢິບ ຈົນເຮັດໃຫ້ມີຜູ້ໂດຍສານ ແລະ ລູກເຮືອ ເສຍຊີວິດຍົກລຳ 224 ຄົນ ໃນມື້ວັນເສົາທີ 31 ຕຸລາຜ່ານມານີ້ວ່າ ເຮືອບິນລຳດັ່ງກ່າວ ແຕກກະຈາຍກາງອາກາດ ກ່ອນທີ່ຈະຕົກລົງພື້ນ ໂດຍເຈົ້າໜ້າທີ່ພົບຊາກເຮືອບິນຫລາຍຈຸດ ໃນພື້ນທີ່ 20 ກິໂລແມັດມົນທົນ ຊຶ່ງປັດຈຸບັນສາມາດເກັບກູ້ສົບໄດ້ແລ້ວ 162 ສົບ.
ກ່ອນໜ້ານີ້ ກຸ່ມຕິດອາວຸດທີ່ເປັນເຄືອຂ່າຍຂອງ ກຸ່ມລັດອິດສະລາມ ຫລື ໄອເອັສ ຢູ່ເຂດໄຊນາຍ ປະເທດອີຢິບ ໄດ້ອອກມາອ້າງວ່າ ພວກເຂົາເປັນຜູ້ລົງມືຍິງ ເຮືອບິນລຳດັ່ງກ່າວ, ແນວໃດກໍຕາມ ນາຍົກລັດຖະມົນຕີ ເອຣິບ ອິສມາອິນ ແຫ່ງອີຢິບ ໄດ້ອອກມາຢືນຢັນວ່າ ອາວຸດທີ່ກຸ່ມຕິດອາວຸດດັ່ງກ່າວຄອບຄອງຢູ່ ບໍ່ມີຄວາມສາມາດຍິງເຮືອບິນລຳດັ່ງກ່າວນີ້ໄດ້ ຊຶ່ງທາງດ້ານຣັດເຊຍເອງ ກໍໄດ້ອອກມາປະຕິເສດ ບໍ່ເຊື່ອຄຳກ່າວອ້າງຂອງກຸ່ມຕິດອາວຸດດັ່ງກ່າວ ແຕ່ຢ່າງໃດ.