ໃນວັນທີ 14 ຕຸລາ 2015 ທ່ານຊູຊອຍ ປະທານບໍລິສັດ ຈຟາມ ຂອງປະເທດ ສ.ເກົາຫຼີ ພ້ອມຄະນະໄດ້ເຂົ້າຢ້ຽມຢາມຂ່ຳນັບທ່ານບົວລິນ ວົງພະຈັນ ຮອງເຈົ້າແຂວງຈຳປາສັກ ໂດຍໄດ້ແຈ້ງຄວາມຄືບໜ້າໃນການສຶກສາສຳຫຼວດເບື້ອງຕົ້ນ ການກໍ່ສ້າງໂຮງງານແປຮູບໝາກມ່ວງຫິມະພານແຫ່ງທຳອິດຢູ່ເມືອງໂຂງ ແຂວງຈຳປາສັກ.
ທ່ານ ວຽງໄຊ ສີປະພອນ ຮອງຫົວໜ້າພະແນກກະສິກຳ ແລະ ປ່າໄມ້ແຂວງຈຳປາສັກລາຍງານວ່າ:ບໍລິສັດຈີຟາມ ສ ເກົາຫຼີ ມີຄວາມສົນໃຈເປັນຢ່າງສູງທີ່ຈະມາສ້າງຕັ້ງໂຮງງານແປຮູບໝາກມ່ວງຫິມະ ພານ ທີ່ເມືອງໂຂງ ເພື່ອເຮັດໃຫ້ເມືອງດັ່ງກ່າວກາຍເປັນຖານການຜະລິດ ແລະ ມີອຸດສາຫະກຳການປຸງແຕ່ງຂະໜາດໃຫຍ່,ປິ່ນອ້ອມເອົາຂົງເຂດສາມຫຼ່ຽມພັດທະນາເສດຖະກິດລາວ-ກຳປູເຈຍ-ຫວຽດນາມ.ສ້າງມູນຄ່າເພີ່ມແກ່ຜົນຜະລິດຂອງປະຊາຊົນ,ເຊິ່ງປັດຈຸບັນບໍລິສັດ ຈີຟາມ ໄດ້ເຊັນບົດບັນທຶນການຮ່ວມມືກັບໂຄງການສົ່ງເສີມການຜະລິດສິນຄ້າກະສິກຳ ແລະ ປ່າໄມ້ແບບຍືນຍົງ(ສສຄກປ) ເພື່ອກ້າວໄປເຖິງການສຶກສາຄວາມເປັນໄປໄດ້ໃນການສ້າງຕັ້ງໂຮງງານແປຮູບໝາກມ່ວງຫິມະພານ.
ທ່ານ ດຣ ຄີຮີຣິວ ຫົວໜ້າຄະນະທີມງານສຶກສາການລົງທຶນ ສ້າງຕັ້ງໂຮງງານແປຮູບໝາກມ່ວງ ຫິມະພານໃຫ້ຮູ້ວ່າ:ການສຶກສາສຳຫຼວດການກໍ່ສ້າງໂຮງງານຄາດວ່າຈະສຳເລັດໃນທ້າຍປີ 2015 ແລະ ເລີ່ມ ລົງມືກໍ່ສ້າງໂຮງງານແປຮູບໃນເດືອນມີນາ 2016 .ໃນນັ້ນເຮົາຈະບໍ່ເຮັດພຽງແຕ່ແປຮູບດ້ວຍການອົບແຫ້ງແລ້ວສົ່ງອອກເທົ່ານັ້ນ ແຕ່ຈະເນັ້ນກ່ຽວກັບຄຸນນະພາບເປັນຫຼັກ ດ້ວຍການນຳເອົາໝາກມ່ວງຫິມະພານມາອົບນ້ຳເຜິ້ງໃຫ້ມີລົດຊາດດີຂຶ້ນໄປອີກ ເພື່ອໄປບໍລິການໃນລະດັບສາຍການບິນສາກົນ,ໃຫ້ເຂົາເຈົ້າຮູ້ຈັກວ່ານີ້ແມ່ນຜະລິດຕະພັນທີ່ເປັນຂອງຄົນລາວ.ເຊິ່ງຕະຫຼາດສຳຄັນແມ່ນ ປະເທດ ສ.ເກົາຫຼີ,ຈີນ,ຫວຽດນາມ ແລະສະຫະລັດອາເມລິກາ.ປັດຈຸບັນພວກເຮົາມີສວນພໍ່ແມ່ພັນແລ້ວ 10 ເຮັກຕາ ,ໄດ້ຂະຫຍາຍ ແລະ ສົ່ງເສີມການປູກແລ້ວ 250 ເຮັກຕາ.ໃນອະນາຄົດທາງບໍລິສັດມີແຜນຈະຫຍາຍການປູກໃຫ້ໄດ້ 10 -15 ພັນເຮັກຕາ.ໂດຍປະຊາຊົນຈະເປັນແຮງງານ ແລະ ເນື້ອທີ່ດິນ,ສ່ວນບໍລິສັດຈະຊ່ວຍດ້ານເເຕັກໂນໂລຊີ ແລະ ເຕັກນິກທີ່ທັນສະໄໝແກ່ປະຊາຊົນ. ພາຍຫຼັງໄດ້ມີການປູກຢ່າງທົ່ວເຖິງ ແມ່ນໄດ້ວາງແຜນຍຸດທະສາດໄວ້ດ້ວຍການສ້າງຕັ້ງເປັນສະຫະກອນຜູ້ປູກ ແລະ ຜະລິດໝາກມ່ວງຫິມະພານ ທັງນີ້ກໍ່ເພື່ອຍົກສູງລາຄາຜົນຜະລິດຂອງປະຊາຊົນ.
ຫຼັງຈາກນັ້ນ ທ່ານ ບົວລິນ ວົງພະຈັນ ກໍ່ໄດ້ຕີລາຄາສູງຕໍ່ການຮ່ວມມືດັ່ງກ່າວ ແລະ ຍິນດີໃຫ້ການສະໜັບສະໜູນທຸກດ້ານເພື່ອເຮັດໃຫ້ໂຮງງານແປຮູບໝາກມ່ວງຫິມະພານໄດ້ຮັບການສ້າງຕັ້ງຂຶ້ນ.ເຊິ່ງມັນຈະກາຍເປັນທ່າແຮງໜຶ່ງຍູ້ໃນການພັດທະນາເສດຖະກິດ-ສັງຄົມຂອງແຂວງຈຳປາສັກ.ໂດຍສະເພາະເປັນການສ້າງວຽກເຮັດງານທຳ,ສ້າງລາຍຮັບໃຫ້ແກ່ປະຊາຊົນ ເພື່ອແກ້ໄຂຄວາມທຸກຍາກໃຫ້ແກ່ເຂົາເຈົ້າ.
*** ຂ່າວ-ພາບ: ຄຳຫຼ້າ ***
