ສຳນັກຂ່າວຕ່າງປະເທດ ລາຍງານໃນວັນທີ 29 ຕຸລານີ້ວ່າ ສະມາຊິກລັດຖະສະພາເນປານ ໄດ້ສ້າງປະຫວັດສາດໜ້າໃໝ່ ທາງດ້ານການເມືອງຂອງປະເທດ ຫລັງຈາກໄດ້ລົງຄະແນນເລືອກເອົາ ທ່ານ ນາງ ພິທະຍາ ເທວີ ພັນທາຣີ ອາຍຸ 54 ປີ ຮອງປະທານພັກຢູໄນເຕັດ ມາກຊິດ ເລນິນນິດ ຫລື ພັກກອມມູນິດເນປານ ໃຫ້ດຳລົງຕຳແໜ່ງ ປະທານາທິບໍດີຄົນໃໝ່ ໃນວັນທີ 28 ຕຸລາຜ່ານມາ ແລະ ໄດ້ກາຍເປັນປະທານາທິບໍດີເພດຍິງຄົນທຳອິດຂອງປະເທດ ຕໍ່ຈາກທ່ານ ຣາມ ພາຣັນ ຍາເທບ ປະທານາທິບໍດີຄົນທຳອິດຂອງເນປານ ທີ່ເຂົ້າດຳລົງຕຳແໜ່ງ ພາຍຫລັງທີ່ເນປານ ໄດ້ປ່ຽນແປງລະບອບການປົກຄອງ ຈາກລະບອບລາຊາທິປະໄຕ ທີ່ມີກະສັດເປັນປະມຸກລັດເປັນຕົ້ນມາ.

ທັງນີ້ ໃນວັນທີ 11 ຕຸລາຜ່ານມາ ສະມາຊິກລັດຖະສະພາ ຫາກໍໄດ້ລົງຄະແນນເລືອກເອົາ ທ່ານ ຄັດກາ ປຣາສາດ ໂອລີ ປະທານພັກກອມມູນິດເນປານ ໃຫ້ດຳລົງຕຳແໜ່ງ ນາຍົກລັດຖະມົນຕີຄົນໃໝ່ຂອງປະເທດ ຊຶ່ງການກ້າວຂຶ້ນສູ່ຕຳແໜ່ງສູງສຸດ ຂອງສະມາຊິກພັກກອມມູນິດເນປານ ໄດ້ເປັນການເປີດສາກໃໝ່ ໃຫ້ແກ່ປະເທດ ພາຍໃຕ້ການນຳພາຂອງພັກ ທີ່ມີອຸດົມການລັດທິກອມມູນິດນິຍົມ.