ເວລາ 19 ໂມງ 30 ນາທີ ຂອງວັນທີ 27 ຕຸລານີ້, ໄດ້ເກີດເຫດໄຟ ໄໝ້ເຮືອນຫ້ອງແຖວທີ່ບ້ານ ໜອງແວງ ເມືອງ ຫາດຊາຍຟອງ ນະຄອນຫຼວງວຽງຈັນ, ສ້າງຄວາມເສຍຫາຍດ້ານຊັບສິນເປັນຈຳນວນຫລາຍ, ສົ່ງຜົນໃຫ້ຫຼາຍຄອບຄົວຂາດບ່ອນຢູ່ອາໄສ.
ທ່ານ ອຸທາ ແສງສຸວັນ ນາຍບ້ານໜອງແວງ ໃຫ້ຮູ້ວ່າ: ໃນເມື່ອກ່ອນເຮືອນຫ້ອງແຖວຫຼັງດັ່ງກ່າວເປັນຂອງບໍລິສັດໄມ້ອັດສ້າງຂຶ້ນເພື່ອໃຫ້ພະນັກງານຂອງບໍລິສັດອາໄສຢູ່, ຕໍ່ມາແມ່ນການຄຸ້ມຄອງຂອງກະຊວງການເງິນ, ຈາກນັ້ນໄດ້ມີນາຍທຶນມາສຳປະທານ ແລະໄດ້ເຮັດເປັນຫ້ອງແຖວໃຫ້ເຊົ່າມີ 10 ຫ້ອງ ແລະມີ 10 ຄອບຄົວອາໃສຢູ່ ພາຍ ຫລັງເກີດເຫດອຳນາດການປົກຄອງບ້ານໄດ້ແຈ້ງໃຫ້ໜ່ວຍກູ້ໄຟ ນະຄອນຫຼວງເຂົ້າມາຊ່ວຍມອດໄຟທັນທີ. ແຕ່ຍ້ອນໂຄງຫຼັງຄາ ແລະ ເພດານທີ່ເຮັດດ້ວຍໄມ້ອັດ ຊຶ່ງເປັນວັດຖຸໄຟໃໝ້ໄດ້ງ່າຍ ຈຶ່ງເຮັດໃຫ້ການດັບມອດໄຟຂອງເຈົ້າໜ້າທີ່ດຳເນີນໄປໄດ້ຍາກ ແລະ ໃຊ້ເວລາເກືອບ 1 ຊົ່ວໂມງຈຶ່ງສາມາດສະກັດກັ້ນໄຟໄວ້ໄດ້.
ທ່ານ ອຸທາ ແສງສຸວັນ ໃຫ້ຮູ້ຕື່ມວ່າ: ສາເຫດຂອງໄຟໄໝ້ໃນຄັ້ງນີ້ອາດແມ່ນເກີດຈາກໄຟຟ້າລັດວົງຈອນ.
ຂ່າວຈາກ ໜັງສືພິມລາວພັດທະນາ
