ໂດຍຕອບສະໜອງຄຳເຊີນຂອງພັກປະຊາຊົນປະຕິວັດລາວ ຄະນະຜູ້ແທນຂັ້ນສູງພັກກອມມູນິດຝຣັ່ງ ນຳໂດຍສະຫາຍ ປີແອ ລໍຣອງ ເລຂາທິການໃຫຍ່ພັກກອມມູນິດຝຣັ່ງ ໄດ້ມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 25-26 ຕຸລາ 2015 ວັນທີ 26 ຕຸລາ ສະຫາຍ ປີແອ ລໍຣອງ ພ້ອມດ້ວຍຄະນະ ໄດ້ເຂົ້າຢ້ຽມຄຳນັບສະຫາຍ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ຢູ່ທຳນຽບປະທານປະເທດ.
ສະຫາຍ ຈູມມາລີ ໄຊຍະສອນ ກໍ່ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງຄະນະຜູ້ແທນຂັ້ນສູງພັກກອມມູນິດຝຣັ່ງໃນຄັ້ງນີ້ ເຊິ່ງເປັນການປະກອບສ່ວນສຳຄັນ ເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບ ການຮ່ວມມືລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຝຣັ່ງ ໃຫ້ນັບມື້ແໜ້ນແຟ້ນຍິ່ງຂຶ້ນ ພ້ອມນີ້ ສະຫາຍ ຈູມມາລີ ໄຊຍະສອນ ຍັງໄດ້ແຈ້ງສະພາບການອັນພົ້ນເດັ່ນຂອງ ສປປ ລາວ ໃຫ້ຄະນະຜູ້ແທນຂັ້ນສູງພັກກອມມູນິດຝຣັ່ງ ແລະ ໄດ້ຕີລາຄາສູງການພົວພັນຮ່ວມມືລະຫວ່າງສອງປະເທດໃນໄລຍະຜ່ານມາ ນອກນີ້ ຍັງໄດ້ຊົມເຊີຍຜົນການພົບປະເຮັດວຽກ ຂອງຄະນະຜູ້ແທນຂັ້ນສູງພັກກອມມູນິດຝຣັ່ງ ກັບຄະນະຜູ້ແທນຂັ້ນສູງພັກປະຊາຊົນປະຕິວັດລາວ ເຊິ່ງນຳໂດຍສະຫາຍ ບຸນຍັງ ວໍລະຈິດ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ.
ສະຫາຍ ປີແອ ລໍຣອງ ໄດ້ສະແດງຄວາມຊົມເຊີຍຕໍ່ຜົນສຳເລັດ ໃນການສ້າງສາ ແລະ ພັດທະນາຂອງ ສປປ ລາວ ພາຍໃຕ້ການຊີ້ນຳ-ນຳພາອັນຖືກຕ້ອງ ແລະ ສະຫຼາດສ່ອງໃສຂອງພັກປະຊາຊົນປະຕິວັດລາວ ໃນໄລຍະ 40 ປີຜ່ານມາ ພ້ອມທັງໄດ້ອວຍພອນໃຫ້ພັກ-ລັດ ກໍ່ຄືປະຊາຊົນລາວທຸກຖ້ວນໜ້າ ຈົ່ງໄດ້ຮັບຜົນສຳເລັດອັນໃໝ່ໃຫຍ່ຫຼວງກວ່າເກົ່າ ໃນການສ້າງສາພັດທະນາປະເທດຊາດ ສືບຕໍ່ປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກ ໃຫ້ປາກົດຜົນເປັນຈິງ ແລະ ກະກຽມກອງປະຊຸມໃຫຍ່ ຄັ້ງທີ X ຂອງພັກປະຊາຊົນປະຕິວັດລາວ ໃນປີ 2016 ໃຫ້ໄດ້ຮັບຜົນສຳເລັດ.
ໃນວັນດຽວກັນນີ້ ຄະນະຜູ້ແທນຂັ້ນສູງພັກກອມມູນິດຝຣັ່ງ ກໍ່ໄດ້ພົບປະ ແລະ ເຮັດວຽກກັບຄະນະຜູ້ແທນຂັ້ນສູງພັກປະຊາຊົນປະຕິວັດລາວ ຢູ່ທຳນຽບປະທານປະເທດ ເຊິ່ງການພົບປະຄັ້ງນີ້ ສອງຝ່າຍກໍ່ໄດ້ແຈ້ງໃຫ້ກັນ ແລະ ກັນຊາບກ່ຽວກັບສະພາບການພົ້ນເດັ່ນຂອງແຕ່ລະພັກ ແຕ່ລະປະເທດ ພ້ອມທັງໄດ້ຕີລາຄາສູງຕໍ່ມູນເຊື້ອ ການພົວພັນຮ່ວມມືລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຝຣັ່ງ ໃນໄລຍະຜ່ານມາ ແລະ ເປັນເອກະພາບກັນກ່ຽວກັບທິດທາງແຜນການຮ່ວມມືກັນໃນຕໍ່ໜ້າ.
ໃນໄລຍະການຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ຄະນະຜູ້ແທນຂັ້ນສູງພັກກອມມູນິດຝຣັ່ງ ຍັງໄດ້ໄປຢ້ຽມຊົມປູສະນິຍະສະຖານທາງປະຫວັດສາດ ແລະ ວັດທະນະທຳຈຳນວນໜຶ່ງ ຢູ່ນະຄອນຫຼວງວຽງຈັນ ຕື່ມອີກ.
ແຫລ່ງຂ່າວ:
