ຂປລ. ພາຍຫລັງດຳເນີນມາເປັນເວລາ 1 ມື້, ກອງປະຊຸມໃຫຍ່ຜູ້ແທນ ອົງຄະນະພັກກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ ຄັ້ງທີ V ໄດ້ອັດລົງ ດ້ວຍຜົນສຳເລັດຢ່າງຈົບງາມ ໃນວັນທີ 26 ຕຸລາ 2015 ນີ້, ໂດຍ ສະຫາຍ ​ພັນຄໍາ ວິພາ​ວັນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ, ພ້ອມດ້ວຍຜູ້ແທນສົມບູນ 125 ສະຫາຍ, ຍິງ 31 ສະຫາຍ ທີ່ຕາງໜ້າສະມາຊິກ ທົ່ວກະຊວງ ກວ່າ 300 ສະຫາຍ, ຍິງ 83 ສະຫາຍ ແລະ ຕາງໜ້າຄະນະ ບໍລິຫານງານພັກ ​ແຕ່​ລະ​ກະຊວງ ເຂົ້າຮ່ວມ.

ໂດຍກອງປະຊຸມໃຫຍ່ດັ່ງກ່າວ, ຜູ້ແທນໄດ້ເປັນເຈົ້າການ ຄົ້ນຄວ້າພິຈາລະນາຄືນ ການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ IV ຂອງອົງ ຄະນະພັກ ກະຊວງຜ່ານມາ ພ້ອມທັງ​ໄດ້ຮັບຮອງ ເອົາຄາດໝາຍສູ້ຊົນ ແລະ ໜ້າທີ່ວຽກງານ ໃນຊຸມປີຕໍ່ໜ້າ.

ເພື່ອບັນລຸເປົ້າໝາຍສຳຄັນດັ່ງກ່າວ, ຜູ້ແທນກອງປະຊຸມໃຫຍ່ ໄດ້ເລືອກຕັ້ງ ເອົາຄະນະບໍລິຫານງານພັກ ກະຊວງ 15 ສະຫາຍ, ຍິງ 2 ສະຫາຍ ແລະ ກອງປະຊຸມຄັ້ງປະຖົມມະລຶກ ໄດ້ເປັນເອກະພາບກັນ ເລືອກເອົາສະຫາຍ ດຣ. ຄໍາ​ແພງ ​ໄຊ​ສົມ​ແພງ ເປັນເລຂາຄະນະບໍລິຫານງານພັກກະຊວງ, ສະຫາຍນາງ ​ໃບ​ຄໍາ ຂັດ​ທິຍະ ເປັນຮອງເລຂາຄະນະບໍລິຫານງານພັກ, ສະຫາຍ ດຣ. ຄໍາ​ແກ້ວ ສານ​ບຸນຄຸນ​ໄຊ ເປັນປະທານກວດກາພັກ, ສ່ວນຮອງ ປະທານກວດກາພັກ ປະກອບມີ ສະຫາຍ ສອນ​ໄຊ ​ໃບ​ຍາ​ວົງ, ສະຫາຍ  ສະຫລອງ ມະນີ​ວັນ, ພ້ອມດຽວກັນ ກໍໄດ້ເລືອກເອົາຜູ້ແທນສົມບູນ 5 ສະຫາຍ  ໄປຮ່ວມກອງປະຊຸມໃຫຍ່ ຄັ້ງທີ X ຂອງພັກ ທີ່ຈະໄຂຂຶ້ນໃນຕໍ່ໜ້າ.

ແຫລ່ງຂ່າວ: