ທ່ານ ຄຳເພັງ ທິນນະກອນ ຜູ້ອຳນວຍການບໍລິສັດ ລັດວິສາຫະກິດຫວຍພັດທະນາ ໄດ້ໃຫ້ສຳພາດວ່າ: ໂດຍປະຕິບັດຕາມການເຫັນດີຂອງຂັ້ນເທິງ ກໍ່ຄືກອງປະຊຸມສາມັນສະພາບໍລິຫານຂອງບໍລິສັດ ລັດວິສາຫະກິດຫວຍພັດທະນາ ທີ່ຈັດຂຶ້ນວັນທີ 20 ຕຸລາ 2015 ຜ່ານມານີ້ ໂດຍເປັນປະທານຂອງທ່ານ ບຸນຊຸມ ສີສະຫວັດ ຜູ້ຊ່ວຍຄະນະນຳກະຊວງການເງິນ ປະທານສະພາບໍລິຫານ ເຊິ່ງກອງປະຊຸມຄັ້ງນີ້ ຄະນະສະພາບໍລິຫານໄດ້ຄົ້ນຄວ້າປຶກສາຫາລື ແລະ ເຫັນດີເປັນເອກະພາບຮັບຮອງເອົາຫຼາຍບັນຫາສຳຄັນ ກ່ຽວກັບທຸລະກິດຫວຍພັດທະນາ ໂດຍສະເພາະ ໄດ້ພິຈາລະນາ ແລະ ຮັບຮອງເອົາແຜນການດຳເນີນທຸລະກິດ ປະຈຳປີ 2016 ແລະ ບາງວຽກງານອັນຈຳເປັນຮີບດ່ວນຈຳນວນໜຶ່ງ ເປັນຕົ້ນ ໄດ້ປັບປຸງການບໍລິການອອກເລກລາງວັນຫວຍພັດທະນາ ທີ່ເປັນທຸລະກິດຂອງລັດ ຈາກ 2 ຄັ້ງຕໍ່ອາທິດ ມາເປັນ 3 ຄັ້ງຕໍ່ອາທິດ ເຊິ່ງຈະເລີ່ມຈັດຕັ້ງປະຕິບັດນັບແຕ່ເດືອນພະຈິກເປັນຕົ້ນໄປ.
ສຳລັບທິດທາງແຜນການປະຈຳງວດ IV (3 ເດືອນທ້າຍປີ 2015) ຂັ້ນເທິງ ກໍ່ຄືກະຊວງການເງິນ ໄດ້ຕົກລົງເຫັນດີໃຫ້ບໍລິສັດ ລັດວິສາຫະກິດຫວຍພັດທະນາ ພິມ-ຈຳໜ່າຍຫວຍພັດທະນາ ແລະ ຫວຍກອງທຶນຊ່ວຍເຫຼືອສັງຄົມ ດ້ວຍຮູບການຈຳໜ່າຍນຳໃຊ້ລະບົບເອເລັກໂຕຣນິກແບບທັນສະໄໝ ໂດຍໄດ້ມີການປັບປຸງມື້ອອກເລກລາງວັນ ສະເລ່ຍ 8 ຄັ້ງຕໍ່ເດືອນ ມາເປັນ 12 ຄັ້ງຕໍ່ເດືອນ ໂດຍກຳນົດມື້ອອກເລກລາງວັນດັ່ງນີ້: ທຸກໆວັນຈັນ ແລະ ວັນສຸກ ແມ່ນອອກເລກຫວຍພັດທະນາປົກກະຕິ ໂດຍສະເລ່ຍ 8 ຄັ້ງຕໍ່ເດືອນ ແລະ ທຸກໆວັນພຸດເປັນມື້ອອກຫວຍກອງທຶນຊ່ວຍເຫຼືອສັງຄົມ ຫຼື ເພື່ອຮັບໃຊ້ວັນສຳຄັນຕ່າງໆຂອງຊາດ ໂດຍສະເລ່ຍ 4 ຄັ້ງຕໍ່ເດືອນ.
ທ່ານ ຄຳເພັງ ທິນນະກອນ ຍັງໃຫ້ຮູ້ຕື່ມວ່າ: ນອກຈາກບັນຫາສຳຄັນນີ້ແລ້ວ ກອງປະຊຸມຍັງໄດ້ຕົກລົງເຫັນດີ ກ່ຽວກັບການຖ່າຍທອດສົດອອກອາກາດ ທາງໂທລະພາບປ້ອງກັນຄວາມສະຫງົບ ໃນການອອກລາງວັນແມ່ນຈະໄດ້ປະຕິບັດເດືອນໜຶ່ງສອງຄັ້ງ ສ່ວນທີ່ເຫຼືອນັ້ນແມ່ນຈະມີການຖ່າຍບັນທຶກພາບໄວ້ ແລ້ວມາອອກມື້ຕໍ່ມາ ທາງໂທລະພາບ ປກສ ເຊັ່ນດຽວກັນ ທັງນີ້ກໍ່ເພື່ອເປັນການຕີຖອຍຫາງສຽງຈົ່ມວ່າ ໄປໃນແນວທາງທີ່ບໍດີຂອງສັງຄົມ ຕໍ່ກັບຫວຍພັດທະນາໃນໄລຍະຜ່ານມານັ້ນ.
ແຫລ່ງຂ່າວ:
