ຄະນະຜູ້ແທນຂັ້ນສູງ ກະຊວງສຶກສາທິການ ແລະ ກິລາລາວ ນຳໂດຍ ທ່ານ ລີຕູ້ ບົວປາວ ລັດຖະມົນຕີຊ່ວຍວ່າ ການກະຊວງສຶກສາທິການ ແລະ ກິລາ, ກຳມະການກອງທຶນສາກົນເພື່ອການສຶກສາ, ຜູ້ຕາງໜ້າ 9 ປະເທດຈາກຂົງເຂດ ອາຊີ-ປາຊີຟີກ ໄດ້ໄປຮ່ວມກອງປະຊຸມປຶກສາຫາລືການສ້າງແຜນການພັດທະນາການສຶກສາຂອງຄະນະບໍລິຫານງານກອງທຶນສາກົນເພື່ອການສຶກສາ ທີ່ນະຄອນຫຼວງວໍຊິງຕັນ ສະຫະລັດອາເມຣິກາ ລະຫວ່າງວັນທີ 14-16 ຕຸລາ ຜ່ານມາ, ໂດຍພາຍໃຕ້ການເປັນປະທານຂອງ ທ່ານ ນາງ ຈູລີເອຍ ກີຢາ ອະດີດນາຍົກລັດຖະມົນຕີແຫ່ງປະເທດອົດສະຕາລີ, ປະທານກອງທຶນສາກົນເພື່ອການສຶກສາ, ມີບັນດາກຳມະການກອງທຶນສາກົນເພື່ອການສຶກສາ ທີ່ເປັນຜູ້ຕາງໜ້າໃຫ້ຜູ້ໃຫ້ທຶນຂອງແຕ່ລະຂົງເຂດໃນ ອາຊີ-ປາຊີຟີກ, ອາຟຣິກາ, ອາເມຣິກາລາຕີນ ແລະ ບັນດາອົງການຈັດຕັ້ງສັງຄົມເຂົ້າຮ່ວມ.
ການຈັດກອງປະຊຸມປຶກສາຫາລືຄັ້ງນີ້ ແມ່ນເພື່ອພິຈາລະນາ ແລະ ຮັບຮອງເອົາບົດລາຍງານ ການປະເມີນຜົນການປະຕິບັດວຽກງານຂອງຄະນະບໍລິຫານງານກອງທຶນສາກົນເພື່ອການສຶກສາ, ນັບທັງຂໍ້ສະເໜີແນະຂອງທີມງານການປະເມີນ, ຕົວແບບການປະຕິບັດງານຂອງຄະນະບໍລິຫານງານກອງທຶນສາກົນເພື່ອການສຶກສາ, ການປັບປຸງແຜນຍຸດທະສາດການພັດທະນາການສຶກສາໃຫ້ສອດຄ່ອງກັບເປົ້າໝາຍ 4 ຂອງເປົ້າໝາຍການພັດທະນາແບບຍືນຍົງ, ການແລກປ່ຽນບົດຮຽນ ແລະ ພຶດຕິກໍາທີ່ດີເລີດໃນການວາງແຜນພັດທະນາການສຶກສາ, ການກຳນົດວິໄສທັດ, ພາລະບົດບາດ, ຈຸດປະສົງ, ຄາດໝາຍ ແລະ ຫຼັກການ ລວມທັງທິດສະດີແຫ່ງການປ່ຽນແປງໃໝ່ທີ່ເນັ້ນຜົນໄດ້ຮັບເປັນຫຼັກ ເພື່ອປະຕິບັດຈຸດປະສົງ ແລະ ເປົ້າໝາຍການສຶກສາແບບຍືນຍົງໃຫ້ “ຮັບປະກັນການສຶກສາຮຽນຮ່ວມທີ່ມີຄຸນະພາບ, ເປັນທຳ ແລະ ຕະຫຼອດຊີວິດ”. ສຳລັບທຸກຄົນ, ການລະດົມທຶນຈາກແຫຼ່ງຕ່າງໆມາຮັບໃຊ້ການພັດທະນາການສຶກສາຂັ້ນພື້ນຖານເປັນຫຼັກ ທັງໃຫ້ຄວາມສຳຄັນແກ່ການສຶກສາກ່ອນໄວຮຽນຢ່າງນ້ອຍ 1 ປີ ແລະ ມັດທະຍົມສຶກສາຕອນປາຍນັບທັງກໍລະນີສຸກເສີນ.
ນອກຈາກນີ້, ກອງປະຊຸມຍັງໄດ້ເປັນເອກະສັນກັນຮັບຮອງເອົາເນື້ອໃນຕ່າງໆດັ່ງກ່າວນັ້ນ ເພື່ອນຳໄປຜ່ານກອງປະຊຸມຄະນະບໍລິຫານງານກອງທຶນສາກົນເພື່ອການສຶກສາ ທີ່ຈະຈັດຂຶ້ນໃນຕົ້ນເດືອນ ທັນວາ 2015 ທີ່ປະເທດເຊເນການ ທະວີບອາຟຣິກາ.