ແຈ້ງເຕືອນໄພເຫດບໍ່ປົກກະຕິໃນ ຂອນແກ່ນ ປະເທດເພື່ອນບ້ານ ໄດ້ມີກຸ່ມມິດສາຊີບ ເຂົ້າມາຕິດຕັ້ງເຄື່ອງສະກິມເມີລ໌ທີ່ຕູ້ ATM ພາຍໃນເຂດ ອຳເພີເມືອງຂອນແກ່ນ ແລະລັກຂໍ້ມູນພາຍໃນບັດໄປກົດເງີນແລ້ວຫລາຍລາຍ ເມືອງຂອນແກ່ນ ຈຶ່ງຂໍຝາກມາຍັງພີ່ນ້ອງປະຊາຊົນ ກ່ອນທີ່ຈະກົດເງີນທີ່ຕູ້ ATM ກະລຸນາສັງເກດຄວາມຜິດປົກກະຕິດັ່ງນີ້ ກວດເບິ່ງສິ່ງຜິດປົກກະຕິຮອບຕູ້ເອທີເອັມກ່ອນໃຊ້ງານ ເພື່ອເບິ່ງວ່າມີກ້ອງຕົວນ້ອຍເຊື່ອງຢູ່ຫລືບໍ່
ໂດຍມິດສາຊີບອາດຕິດກ່ອງໃສ່ໃບປິວໄວ້ບໍລິເວນເຄື່ອງ ເພື່ອໃຊ້ເຊື່ອງກ້ອງ ຖ້າພົບເຫັນກ່ອງໃສ່ໃບປິວແປກໆ ບໍ່ຄວນໃຊ້ເຄື່ອງດັ່ງກ່າວ ແລະ ຄວນແຈ້ງໃຫ້ທະນາຄານຮູ້ທັນທີ ກວດສອບບໍລິເວນທີ່ປ່ອນບັດ ຫລືບ່ອນແປ້ນກົດຕົວເລກວ່າມີອຸປະກອນແປກປອມຕິດຢູ່ຫລືບໍ່ ຫາກສັງເກດເຫັນອຸປະກອນແປກປອມ ໃຫ້ຮີບແຈ້ງໃຫ້ທະນາຄານຮູ້ ລອງສັ່ນຕູ້ເບີ່ງ ເພາະຫາກມີຕົວສະກິມເມີລ໌ຕິດຢູ່ ການສັ່ນອາດຈະເຮັດໃຫ້ຕົວສະກິມເມີລ໌ຫລຸດອອກມາໄດ້
ເນື່ອງຈາກປົກກະຕິແລ້ວ ຄົນຮ້າຍຈະບໍ່ຕິດຕັ້ງເຄື່ອງນີ້ໄວ້ຢ່າງແໜ້ນໜາ ເພາະຕ້ອງຖອດເຄື່ອງສະກິມເມີລ໌ໄປໃຊ້ຕິດຕັ້ງຕູ້ອື່ນໆອີກດ້ວຍ ຖ້າຫາກເຄື່ອງເອທີເອັມເກີດຂັດຂ້ອງ ແລະ ບັດຕິດຢູ່ໃນເຄື່ອງ ໃຫ້ຮີບແຈ້ງທະນາຄານເພື່ອປິດບັດທັນທີ ເພາະການທີ່ເຄື່ອງຂັດຂ້ອງອາດເປັນເລ່ຫລ່ຽມຂອງຄົນຮ້າຍທີ່ໃຊ້ເສດໄມ້ ຫລືໄມ້ຈີ້ມແຂ້ວໃສ່ເຂົ້າໄປໃນຊ່ອງອ່ານບັດ ເພື່ອໃຫ້ບັດຂອງຜູ້ໃຊ້ບໍລິການຕິດຢູ່ທີ່ເຄື່ອງ ແລ້ວຈະທຳທ່າເຂົ້າມາຊ່ວຍເຫລືອກົດລະຫັດໃຫ້ ຫາກໃສ່ບັດໄປໃນເຄື່ອງແລ້ວບໍ່ມີໄຟກະພິບຮອບບ່ອນສຽບບັດຄວນປ່ຽນໄປໃຊ້ຕູ້ອື່ນ ເພາະຕູ້ນັ້ນອາດມີການຕິດຕົວສະກິມເມີລ໌ໄວ້ດູດຂໍ້ມູນ ຊຶ່ງເບື້ອງຕົ້ນ ເມືອງຂອນແກ່ນໄດ້ໃຫ້ສາຍກວດປະສານງານກັບທຸກທະນາຄານອອກກວດສອບຄວາມຜິດປົກກະຕິຂອງຕູ້ ATM ທຸກຕູ້ໃນພື້ນທີ່ຮັບຜິດຊອບ ປະຊຸມທີມສືບສວນເພື່ອຕິດຕາມຈັບກຸມກຸ່ມຄົນຮ້າຍ ແລະປະຊາສຳພັນໃຫ້ພີ່ນ້ອງປະຊາຊົນຮູ້ເຖິງວິທີການສັງເກດແລະປ້ອງກັນຕົວ
ວິທີສັງເກດ ຕູ້ເອທີເອັມປອດຈາກເຄື່ອງສະກິມເມີລ໌ຫລືບໍ່
ສຳລັບ ເຄື່ອງສະກິມເມີລ໌ (skimmer ເຄື່ອງດູດຫລືກວາດຂໍ້ມູນ) ນັ້ນ ເປັນສິ່ງປະດິດທີ່ຄົນຮ້າຍສ້າງຂຶ້ນ ໂດຍນຳເຄື່ອງອ່ານແຖບແມ່ເຫລັກ ວົງຈອນຖອດລະຫັດ ແລະວົງຈົນຫນ່ວຍຄວາມຈຳມາປະກອບເຂົ້ານຳກັນ ສະກິມເມີລ໌ມີຫລາຍຂະໜາດຕັ້ງແຕ່ເທົ່າກັບກ່ອງໃສ່ເກີບໄປຈົນເຖິງຂະໜາດເທົ່າຊອງຢາສູບທີ່ຄົນຮ້າຍເຊື່ອງໄວ້ໃນມືໄດ້ ໃຊ້ພະລັງງານຈາກແບດເຕີຣີ່ຈຶ່ງສາມາດພົກພາໄດ້ສະດວກ ເມື່ອນຳບັດ ATM ມາກົດ ສະກິມເມີລ໌ຈະອ່ານຂໍ້ມູນຈາກແຖບແມ່ເຫລັກແລະນຳໄປເກັບໄວ້ໃນຫນ່ວຍຄວາມຈຳ
ສະກິມເມີລ໌ທີ່ມີຫນ່ວຍຄວາມຈຳໜ້ອຍຈະເກັບຂໍ້ມູນບັດລະເຄດິດໄດ້ 50 ໃບ ສ່ວນສະກິມເມີລ໌ທີ່ມີຫນ່ວຍຄວາມຈຳຫລາຍອາດເກັບຂໍ້ມູນໄດ້ຫລາຍໝື່ນໃບ ແລະເມື່ອລັກລອບດູດຂໍ້ມູນຈາກບັດເຄດິດໄປແລ້ວ ຄົນຮ້າຍກໍຈະນຳໄປສ້າງບັດປອມຊຶ່ງມີຢູ່ 2 ແບບ ແບບທຳອິດຮຽກວ່າ “ບັດສີ” ເປັນບັດລະເຄດິດປອມທີ່ມີສີ ມີລວດລາຍ ແລະມີຕົວພິມຄືກັບຂອງແທ້ທຸກຢ່າງ
ລວມທັງມີຂໍ້ມູນໃນແຖບແມ່ເຫລັກຢ່າງຖືກຕ້ອງອີກດ້ວຍ ບັດແບບນີ້ສາມາດນຳໄປໃຊ້ໄດ້ທຸກແຫ່ງເຊັ່ນດຽວກັບບັດແທ້ ບັດປອມອີກແບບເອີ້ນວ່າ “ບັດຂາວ” ເປັນບັດພາດສ໌ຕິກສີຂາວມີພຽງແຕ່ແຖບແມ່ເຫລັກເກັບຂໍ້ມູນ ຊຶ່ງພຽງພໍທີ່ຈະນຳໄປໃຊ້ໃນຫລາຍໆແຫລ່ງ ເຊັ່ນນຳໄປກົດເງີນສົດຈາກຕູ້ ATM ຄົນຮ້າຍບາງຄົນບໍ່ເຮັດບັດປອມ ແຕ່ນຳຂໍ້ມູນບັດຂອງເຮົາໄປຂາຍໃນອິນເຕີລ໌ເນັດກໍມີ