ອາເຊນອນ ຕໍ່ລົມຫາຍໃຈໃນການແຂ່ງຂັນ ຢູຟາ ແຊ້ມປຽນລີກ ຮອບແບ່ງກຸ່ມ ເອົາຊະນະ ບາເຢິນ ມິວນິກ 2-0 ປະຕູ ຈາກການຍິງຂອງ ໂອລິເວີ ຊີຣູດ ກັບ ເມຊຸດ ໂອຊິວ ທີ່ສະໜາມ ເອມິເຣສ ສະເຕດຽມ ໃນມື້ວັນອັງຄານວັນທີ 20 ຕຸລາ 2015 ທີ່ຜ່ານມາ

ອາແຊນ ເວນເກີ ຜູ້ຈັດການທີມ ອາເຊນອນ ຈັດທັບແບບເຕັມທີ່ຕ້ອງການ 3 ຄະແນນເທົ່ານັ້ນ ໂດຍໃຫ້ ທີໂອ ວັລຄອດ ຮັບເປັນກອງໜ້າປະສານງານກັບ 3 ຕົວບຸກມີ ອາເລັກຊິສ ຊານເຊຊ, ເມຊຸດ ໂອຊິວ ແລະ ອາຣອນ ແຣມຊີ ຮັບມືກັບ ບາເຢິນມິວນິກ ທີ່ມີ ໂຮເບີດ ເລວານດອຟສະກີ, ໂທມັສ ມຸນເລີ ແລະ ດັກລາສ ຄອສຕ້າ ເປັນຕົວອັນຕະລາຍແດນໜ້າ

ໃນເກມການແຂ່ງຂັນບໍ່ສາມາດຍິງປະຕູກັນໄດ້ໃນເຄີ່ງເວລາທຳອິດ, ແຕ່ກໍ່ບໍ່ເໜືອຄວາມພະຍາຍາມເມື່ອໃນນາທີ 77 ຊານຕິ ກາຊໍໍລາ ເຕະປັ່ນສາມລໍ້ສົ່ງເຂົ້າເຂດໂທດ ມານູເອວ ນອຍເອີ ສະກັດບານບໍ່ຖືກບານຕົກໃສ່ຫົວ ໂອລິເວີ ຊີຣູດ ໂດດໂໝ່ງເຂົ້າປະຕູໄປຢ່າງສວຍງາມ
ໃນໄລຍະທົດເວລາບາດເຈັບ ອາເຊນອນ ຕອກຢ້ຳໄຊຊະນະ ເມື່ອ ເຮັກເຕີ ເບວເລຣິນ ຕັດບານໄດ້ຈາກກາງສະໜາມລາກບານເຂົ້າເຂດໂທດແລ້ວເປີດມາເສົາສອງ ເມຊຸດ ໂອຊິວ ແປເຂົ້າໄປແບບເນັ້ນໆ ມານູເອວ ນອຍເອີ ທຸບອອກມາໄດ້ ແຕ່ຜູ້ຕັດສິນດ້ານຫຼັງປະຕູໃຫ້ສັນຍານບອກວ່າກາຍເສັ້ນເຂົ້າໄປແລ້ວ ຈົບເກມອາເຊນອນ ເອົາຊະນະ ບາເຢິນມິວນະກ 2-0 ປະຕູ ເກັບ 3 ຄະແນນເພີ່ມໄດ້