ຂປລ. ໃນວັນທີ 20 ຕຸລາ 2015 ນີ້ ຢູ່ກະຊວງການຕ່າງປະເທດ ໄດ້ຈັດພິທິມອບ-ຮັບ ຕໍາແໜ່ງຜູ້ບໍລິຫານ ລະດັບສູງຫລາຍຕໍາແໜ່ງ ລະຫວ່າງ ທ່ານ ນາງ ພາວັນ ນວນທະສິງ ຫົວໜ້າກົມອົງການຈັດຕັ້ງສາກົນຜູ້ເກົ່າ ແລະ ທ່ານ ຄໍາອິນ ຄິດຈະເດດ ຫົວໜ້າກົມອົງການຈັດຕັ້ງສາກົນຜູ້ໃໝ່ ໂດຍໃຫ້ກຽດເຂົ້າຮ່ວມຂອງ ທ່ານ ສະເຫລີມໄຊ ກົມມະສິດ ເລຂາຄະນະບໍລິຫານງານພັກ, ລັດຖະມົນຕີຊ່ວຍວ່າການ ກະຊວງການຕ່າງປະເທດ, ມີບັນດາຫົວໜ້າກົມ, ຮອງກົມ ແລະ ພະນັກງານກ່ຽວຂ້ອງ ເຂົ້າຮ່ວມ.
ກ່ອນໜ້ານີ້ກໍໄດ້ມີການແຕ່ງຕັ້ງ ທ່ານ ແສງ ສຸຂະທິວົງ ເປັນຫົວໜ້າກົມພິທີການທູດ ປ່ຽນແທນ ທ່ານ ທອງພັນ ສີອັກຄະພົມ ທີ່ອອກຮັບບໍານານ, ແຕ່ງຕັ້ງ ທ່ານ ບຸນເຫລືອ ພັນດານຸວົງ ເປັນຜູ້ຮັກສາການຫົວໜ້າ ຫ້ອງການກະຊວງ ແລະ ແຕ່ງຕັ້ງ ທ່ານ ຕິ່ງ ສຸກສັນ ເປັນຜູ້ຮັກສາການຫົວໜ້າ ກົມຈັດຕັ້ງ–ພະນັກງານ.
ໃນໂອກາດດັ່ງກ່າວ ທ່ານ ສະເຫລີມໄຊ ກົມມະສິດ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາແກ່ບັນດາ ຜູ້ທີ່ໄດ້ຖືກແຕ່ງຕັ້ງໃນຄັ້ງນີ້ ຈົ່ງເອົາໃຈໃສ່ຊີ້ນໍາໆພາ ດ້ານການເມືອງແນວຄິດ ໃຫ້ເກ່ພະນັກງານ ໃຫ້ມີຫລັກໝັ້ນການເມືອງໜັກແໜ້ນ, ເອົາໃຈໃສ່ຊີ້ນໍາໆພາ ວຽກງານວິຊາສະເພາະ, ວຽກງານຄົ້ນຄ້ວາ ໃນການເປັນເສນາທິການ ໃຫ້ຂັ້ນເທິງ ໃນການຈັດຕັ້ງຜັນຂະຫຍາຍ ແນວທາງນະໂຍບາຍຂອງ ພັກ–ລັດ ກໍຄື ການຈັດຕັ້ງປະຕິບັດ ມະຕິຂອງກອງປະຊຸມ ວຽກງານການຕ່າງປະເທດ ຄັ້ງທີ 12 ແລະ ກອງປະຊຸມໃຫຍ່ ຄັ້ງທີ III ຂອງອົງຄະນະພັກ ກະຊວງການຕ່າງປະເທດ ໃຫ້ປະກົດຜົນເປັນຈິງ ແນໃສ່ປະກອບສ່ວນເຂົ້າໃນພາລະກິດ ປົກປັກຮັກສາ ແລະ ສ້າງສາພັດທະນາ ປະເທດຊາດ ແລະ ການເຊື່ອມໂຍງເຂົ້າໃນພາກພື້ນ ແລະ ສາກົນຂອງປະເທດເຮົາ ໃນໄລຍະໃໝ່.
ແຫລ່ງຂ່າວ:
