ສຳນັກຂ່າວຕ່າງປະເທດ ລາຍງານໃນວັນທີ 19 ຕຸລາຜ່ານມານີ້ວ່າ ກໍລະນີທີ່ອົງການແພດໄຮ້ພົມແດນ (Medecins Sans Frontieres – MSF) ໄດ້ອອກມາລະບຸໃນວັນທີ 16 ຕຸລາ 2015 ກ່ຽວກັບລົດຕັງຂອງກອງທັບສະຫະລັດອາເມຣິກາ ໄດ້ຂັບບຸກພັງປະຕູໂຮງໝໍຂອງອົງການດັ່ງກ່າວ ໃນເມືອງກຸນດຸຊ (Kunduz) ປະເທດອັບການິສະຖານ ໂດຍບໍ່ໄດ້ຂໍອະນຸຍາດ ແລະ ສ້າງຄວາມເສຍຫາຍຕໍ່ກັບອາຄານໂຮງໝໍ ຊຶ່ງເປັນການບຸກເຂົ້າໄປຂອງທະຫານອາເມຣິກາ ທີ່ຄາດວ່າອາດເຂົ້າໄປທຳລາຍຫລັກຖານ ຈາກການກໍ່ເຫດໂຈມຕີທາງອາກາດ ໃສ່ໂຮງໝໍແຫ່ງດັ່ງກ່າວມາແລ້ວຄັ້ງໜຶ່ງ ເມື່ອຕົ້ນເດືອນທີ່ຜ່ານມານັ້ນ, ຫລ້າສຸດ ທ່ານ ຮ້ອຍເອກ ເຈບ ເດວິດ ໂຄສົກກະຊວງປ້ອງກັນປະເທດ ສະຫະລັດອາເມຣິກາ ໄດ້ອອກມາຢືນຢັນວ່າ ຍານພາຫະນະດັ່ງກ່າວບໍ່ແມ່ນລົດຕັງ (tank) ແຕ່ຫາກແມ່ນລົດສາຍພານຂະໜາດເບົາ (tracked vehicle) ຂອງກອງທັບອັບການິສະຖານ ທີ່ໃຊ້ຂົນທະຫານສະຫະລັດອາເມຣິກາ ເພື່ອເຂົ້າໄປກວດສອບ ສະພາບຄວາມເສຍຫາຍຂອງໂຮງໝໍດັ່ງກ່າວ ໃນວັນທີ 15 ຕຸລາຜ່ານມາ ໂດຍລະບຸວ່າ ທະຫານອາເມຣິກາເຂົ້າໃຈວ່າ ບໍ່ມີພະນັກງານແພດໝໍ ຢູ່ໃນໂຮງໝໍດັ່ງກ່າວແລ້ວ ຈຶ່ງຂັບລົດບຸກພັງເຂົ້າໄປເລີຍ ໂດຍບໍ່ໄດ້ແຈ້ງໃຫ້ຮັບຊາບລ່ວງໜ້າ.
ທັງນີ້ ສະຫະລັດອາເມຣິກາ ໄດ້ປະຕິບັດການໂຈມຕີທາງອາກາດ ໃສ່ໂຮງໝໍແຫ່ງດັ່ງກ່າວ ໃນວັນທີ 3 ຕຸລາຜ່ານມາ ສົ່ງຜົນເຮັດໃຫ້ພະນັກງານແພດໝໍ ແລະ ຄົນເຈັບຂອງ ອົງການແພດໄຮ້ພົມແດນ ເສຍຊີວິດໄປຢ່າງໜ້ອຍ 22 ຄົນ ຊຶ່ງຕໍ່ມາກອງທັບສະຫະລັດອາເມຣິກາ ກໍໄດ້ອອກມາຍອມຮັບຄວາມຜິດພາດດັ່ງກ່າວ ໂດຍອ້າງວ່າເປັນການບຸກໂຈມຕີໃສ່ກຸ່ມຕໍລິບັນ.
ແນວໃດກໍຕາມ ອົງການແພດໄຮ້ພົມແດນໄດ້ຢືນຢັນວ່າ ໃນໄລຍະຜ່ານມາ ພວກຕົນໄດ້ແຈ້ງໃຫ້ທຸກຝ່າຍຮັບຊາບ ເຖິງທີ່ຕັ້ງຂອງໂຮງໝໍແຫ່ງດັ່ງກ່າວນີ້ແລ້ວ ແລະ ທີ່ຜ່ານມາກໍບໍ່ປະກົດມີນັກຮົບກຸ່ມຕໍລີບັນ ເຂົ້າໄປໃນພື້ນທີ່ໂຮງໝໍດັ່ງກ່າວ ດັ່ງການກ່າວອ້າງຂອງທະຫານອັບການິສະຖານ ແລະ ສະຫະລັດອາເມຣິກາ ແຕ່ຢ່າງໃດ.
