ຂປລ. ບັນດາອະນຸກຳມະການ ແຕ່ລະພາກສ່ວນ ຂອງເມືອງທ່າແຂກ ແຂວງຄຳມ່ວນ ໄດ້ລາຍງານຄວາມພ້ອມ ໃນການກະກຽມຈັດງານ ບຸນປະເພນີ ອອກພັນສາ ແລະ ຊ່ວງເຮືອປະຈຳປີ 2015 ໃນກອງປະຊຸມຈັດຂຶ້ນວັນທີ 12 ຕຸລາ 2015 ຢູ່ສະໂມສອນ ຫ້ອງວ່າການປົກຄອງເມືອງ ໂດຍການເປັນປະທານ ຂອງ ທ່ານ ສົມໃຈ ເພັດສີນວນ ຮອງເຈົ້າແຂວງໆຄຳມ່ວນ ທັງເປັນຄະນະປະທານ ຈັດງານບຸນປະເພນີ ອອກພັນສາ ແລະ ຊ່ວງເຮືອປະຈຳປີ, ມີ ທ່ານ ຈັນ ບຸບຜາລີວັນ ເຈົ້າເມືອງໆ ທ່າແຂກ, ພ້ອມດ້ວຍບັນດາ ຫົວໜ່ວຍທຸລະກິດ ແລະ ນັກທຸລະກິດ ເຂົ້າຮ່ວມ.
ກອງປະຊຸມ ບັນດາອະນຸກຳມະການທັງ 10 ປະກອບມີ ອະນຸກໍາມະການຮັບຜິດຊອບ ທາງສາສະໜາ, ກອງເລຂາ, ລະດົມທຶນເກັບຄ່າບໍລິການຕ່າງໆ, ພິທີການ ຮັບແຂກໂຄສະນາ ຈັດສະຖານທີ່, ບໍລິການ,ໄຫລເຮືອໄຟ, ເສັງກອງ, ຈັດການແຂ່ງຂັນເຮືອຊ່ວງ, ອະນາໄມເກັບມ້ຽນຂີ້ເຫຍື້ອ ແລະ ອະນຸກຳມະການປ້ອງ ໄດ້ລາຍງານຄວາມພ້ອມ ໃນການກະກຽມ ບັນດາໜ້າວຽກຂອງຕົນ ເປັນຕົ້ນແຜນວຽກ, ແຜນງານ ແລະ ແຜນງົບປະມານໃຊ້ຈ່າຍ ເພື່ອຮັບປະກັນໃຫ້ງານບຸນ ຮັກສາໄດ້ຮີດຄອງປະເພນີທີ່ດີງາມ, ສ້າງຄວາມສາມັກຄີ, ຄວາມເບີກບານມ່ວນຊື່ນ, ຮັບປະກັນຄວາມສະຫງົບປອດໄພ ແລະ ມີໝາກຜົນທີ່ສົມບູນ, ຈົບງາມ ຂຶ້ນກວ່າເກົ່າ.
ແຫລ່ງຂ່າວ:
