ສຳນັກຂ່າວຕ່າງປະເທດ ລາຍງານໃນວັນທີ 15 ຕຸລາຜ່ານມານີ້ວ່າ ອີຣ່ານຈະພິຈາລະນາສົ່ງທະຫານເຂົ້າຊີຣີ ເພື່ອຊ່ວຍສູ້ຮົບກັບກຸ່ມຕິດອາວຸດ ຖ້າຫາກລັດຖະບານຊີຣີຮ້ອງຂໍ ໂດຍທ່ານ ອະລາເອດິນ ໂບຣູເຈີດີ ປະທານກຳມາທິການນະໂຍບາຍດ້ານຄວາມໝັ້ນຄົງ ແລະ ການຕ່າງປະເທດ ແຫ່ງ ລັດຖະສະພາອີຣ່ານ ໄດ້ກ່າວໃນຂະນະຢ້ຽມຢາມປະເທດຊີຣີວ່າ ” ອີຣ່ານຈິງຈັງກັບການປາບປາມການກໍ່ການຮ້າຍ ໂດຍໄດ້ສົ່ງຄວາມຊ່ວຍເຫລືອດ້ານອາວຸດ ແລະ ທີ່ປຶກສາມາຊີຣີ ແລະ ອີຣັກແລ້ວ “
ທັງນີ້ ອີຣ່ານເປັນປະເທດພັນທະມິດທີ່ສຳຄັນຂອງປະທານາທິບໍດີ ບາຊາ ອັນ-ອັດຊາດ ຊຶ່ງການເຂົ້າຢ້ຽມຢາມຊີຣີຂອງ ທ່ານ ໂບຣູເຈີດີ ໃນຄັ້ງນີ້ ຍັງໄດ້ເຂົ້າພົບ ທ່ານ ອັດຊາດ ທີ່ນະຄອນຫລວງດາມັດກັດ ແລະ ທ່ານ ໂບຣູເຈີດີ ຍັງໄດ້ວິພາກວິຈານກຸ່ມພັນທະມິດ ຊຶ່ງນຳໂດຍສະຫະລັດອາເມຣິກາ ທີ່ປະຕິບັດການໂຈມຕີທາງອາກາດໃນຊີຣີ ຕັ້ງແຕ່ປີກາຍມານີ້ວ່າ ” ກຸ່ມນີ້ປະສົບກັບຄວາມຫລົ້ມເຫລວ ທັງໆທີ່ໃຊ້ເງິນໄປຫລາຍຕື້ໂດລາ “