ວັນທີ 13 ຕຸລາ 2015 ຄະນະຮັບຜິດຊອບບູລະນະປະຕິສັງຂອນ ພິພິທະພັນຫໍພະແກ້ວ ຄັ້ງທີ III ນຳໂດຍທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ໄດ້ລົງຕິດຕາມຄວາມຄືບໜ້າຂອງໜ້າວຽກປະຕິສັງຂອນໂຄງການດັ່ງກ່າວ ໄດ້ຮັບຟັງການລາຍງານຈາກທ່ານ ບຸນມີ ສອນມີໄຊ ຜູ້ອຳນວຍການບໍລິສັດ ມີພູນຊັບກໍ່ສ້າງ ທີ່ເປັນບໍລິສັດຜູ້ຮັບເໝົາ ເຫັນໄດ້ວ່າໜ້າວຽກແມ່ນມີຄວາມຄືບໜ້າ ແລະ ມີຜົນສຳເລັດຫຼາຍກວ່າ 60% ໃນ 4 ໜ້າວຽກຕົ້ນຕໍຄື: ວຽກຮື້ຖອນ ແລະ ສ້ອມແປງຄືນໂຄງຫຼັງຄາ ສ້ອມແປງເພດານດ້ານໃນ ຕີເພດານນອກໃໝ່ ສີໜ້າ 2 ດ້ານ ວຽກສ້ອມແປງຊຸ້ມປະຕູ ປ່ອງຢ້ຽມ ພ້ອມບານ ແລະ ວຽກສີ.
ສຳລັບວຽກທີ່ຄົງຄ້າງຈະສືບຕໍ່ປະຕິບັດໃນຕໍ່ໜ້າມີຄື: ຕິດຕັ້ງລະບົບປ້ອງກັນອັກຄີໄພ ຕິດຕັ້ງລະບົບສັນຍານເຕືອນໄພ ວຽກດອກດວງເພດານ ດ້ານນອກ ດ້ານໃນ ວຽກສ້ອມແປງຊຸ້ມປະຕູ ປ່ອງຢ້ຽມ ໂບກເສົາ ແລະ ຝາ ທາສີຝາດ້ານໃນດ້ານນອກຂອງສິມ ທາສີຂອບປະຕູປ່ອງຢ້ຽມ ຕິດມຸກແກ້ວໃສ່ບານປະຕູປ່ອງຢ້ຽມ ສ່ວນວຽກພື້ນແມ່ນຮື້ ແລະ ສ້ອມແປງເປັນຈຸດ ຖ້ານ 1 ຖ້ານ 2 ຮື້ ແລະ ສ້ອມແປງພື້ນດ້ານນອກ ຖ້ານ 3 ແລະ ສ້ອມແປງຂັ້ນໄດທາງຂຶ້ນ ຖ້ານ 1 ຖ້ານ 2 ດ້ວຍກະໂລ້ດິນເຜົາ ຄາດວ່າຈະໃຫ້ສຳເລັດຕາມແຜນການທີ່ວາງໄວ້.
ພາຍຫຼັງຮັບຟັງການລາຍງານ ທ່ານ ສາຍທອງ ແກ້ວດວງດີ ໄດ້ຍ້ອງຍໍຊົມເຊີຍຕໍ່ຄວາມບຸກບືນຫ້າວຫັນຂອງບໍລິສັດຜູ້ຮັບເໝົາ ເຮັດໃຫ້ໜ້າວຽກສຳເລັດໄປຕາມແຕ່ລະບາດກ້າວ ແລະ ຂັ້ນຕອນທີ່ວາງໄວ້ ພ້ອມນີ້ ທ່ານຍັງໄດ້ມີຄຳເຫັນແນະນຳໃຫ້ທິດທາງ ໃນການບູລະນະປະຕິສັງຂອນພິພິທະພັນຫໍພະແກ້ວ ແມ່ນໃຫ້ມີເອກະລັກຮັກສາຊົງເດີມໄວ້ ຈາກນັ້ນ ທ່ານຮອງເຈົ້າຄອງນະຄອນຫຼວງວຽງຈັນ ຍັງໃຫ້ຮູ້ຕື່ມອີກວ່າ: ປັດຈຸບັນດ້ານງົບປະມານໃນໄລຍະທີໜຶ່ງແມ່ນ 7 ຕື້ກີບ ແຕ່ໃຫ້ສົມບູນທັງໝົດແມ່ນຕ້ອງການງົບປະມານ 15 ຕື້ກີບ ດັ່ງນັ້ນ ຮຽກຮ້ອງມາຍັງບັນດາບໍລິສັດ ຫົວໜ່ວຍທຸລະກິດ ພະນັກງານ-ລັດຖະກອນ ຕະຫຼອດຮອດປະຊາຊົນບັນດາເຜົ່າ ຜູ້ທີ່ມີຈິດໃຈເຫຼື້ອມໃສສັດທາ ຈົ່ງສືບຕໍ່ບໍລິຈາກ ເພື່ອເປັນການປະກອບສ່ວນເຂົ້າໃນການບູລະນະປະຕິສັງຂອນ ພິພິທະພັນຫໍພະແກ້ວຕື່ມ ແລະ ຜູ້ທີ່ຈະບໍລິຈາກສາມາດພົວພັນນຳກອງບໍລິຈາກໄດ້.
ແຫລ່ງຂ່າວ:
