ເພື່ອເຮັດໃຫ້ການສະໜອງນ້ຳປະປາໃນອະນາຄົດ ໃຫ້ພຽງພໍກັບຄວາມຕ້ອງການ ໂດຍຕອບສະໜອງນ້ຳກິນ ນ້ຳໃຊ້ຂອງປະຊາກອນ ໃນນະຄອນຫຼວງວຽງຈັນ ໃຫ້ໄດ້ 95% ໃນປີ 2020 ແລະ ເພື່ອຕອບສະໜອງໄດ້ກັບການຂະຫຍາຍຕົວຂອງປະຊາກອນ ລວມທັງຫຼາຍເຂດເສດຖະກິດຂອງນະຄອນຫຼວງວຽງຈັນ ທີ່ກຳລັງຂະຫຍາຍຕົວໃນປັດຈຸບັນ.
ອີງໃສ່ການເກັບກຳຂໍ້ມູນຂອງຄະນະປະເມີນຜົນຂອງອົງການໄຈກາ ໃນໄລຍະຜ່ານມາ ສຶກສາ ແລະ ສຳຫຼວດຄວາມເປັນໄປໄດ້ເບື້ອງຕົ້ນ ແຕ່ວັນທີ 20/8/2014 ສຳເລັດການປະເມີນຄວາມເປັນໄປໄດ້ຂອງໂຄງການດັ່ງກ່າວ ເມື່ອບໍ່ດົນຜ່ານມານີ້ ຢູ່ທີ່ກົມເຄຫາຜັງເມືອງ ກະຊວງໂຍທາທິການ ແລະ ຂົນສົ່ງ ໄດ້ມີເຊັນສັນຍາບົດບັນທຶກ ປຶກສາຫາລືໂຄງການຂັ້ນສຸດທ້າຍ ສຳລັບໂຄງການຂະຫຍາຍລະບົບນ້ຳປະປາ ນະຄອນຫຼວງວຽງຈັນ ໂດຍມີທ່ານ ຄຳທະວີ ໄທພະຈັນ ຫົວໜ້າກົມເຄຫາຜັງເມືອງ ກະຊວງໂຍທາທິການ ແລະ ຂົນສົ່ງ Mr. Yusuke MURAYAMA ຜູ້ຕາງໜ້າອົງການໄຈກາ ປະຈຳ ສປປ ລາວ ທ່ານ ຄຳເຜີຍ ວົງສາຄຳຜຸຍ ອຳນວຍການລັດວິສາຫະກິດນ້ຳປະປານະຄອນຫຼວງ ມີຮອງຫົວໜ້າພະແນກ ຍທຂ ນະຄອນຫຼວງ ບັນດາພາກສ່ວນທີ່ກ່ຽວຂ້ອງຈາກກະຊວງ ພະນັກງານທັງສອງຝ່າຍເຂົ້າຮ່ວມ.
ການອອກແບບເບື້ອງຕົ້ນຂອງໂຄງການ ປະກອບມີຢູ່ທີ່ນ້ຳປະປາຈີ່ນາຍໂມ້ ໜ້າວຽກທີ 1 ຈະສ້າງສະຖານີດູດນ້ຳດິບໃໝ່ ຕິດຕັ້ງໂປ້ມສູບນ້ຳ ຂະໜາດ 120.000 ມ3/ມື້ ຂະຫຍາຍກຳລັງການຜະລິດ 10.000 ແມັດກ້ອນ/ວັນ ສ້າງອາຄານຫ້ອງການ ສ້າງຫ້ອງການເຄມີຫຼັງໃໝ່ ສ້າງອ່າງນ້ຳໃຕ້ດິນໃໝ່ ລວມທັງປັບປຸງລະບົບໂຮງງານຜະລິດນ້ຳເກົ່າ ຕິດຕັ້ງສະຖານີຈ່າຍໄຟຟ້າຍ່ອຍ ໜ້າວຽກທີ 2 ມີຕິດຕັ້ງໂປ້ມສູບນ້ຳຕື່ມອີກຂະໜາດ 40.000 ແມັດກ້ອນ/ມື້ ທີ່ສູນຈ່າຍນ້ຳສາລາຄຳ ກໍ່ສ້າງລະບົບອ່າງເກັບນ້ຳໃຕ້ດິນ ແລະ ອ່າງນ້ຳສູງ ກໍ່ສ້າງລະບົບສູບສົ່ງໃໝ່ ຕິດຕັ້ງໂປ້ມສູບນ້ຳແຮງສູງ ປັບປຸງລະບົບທໍ່ສົ່ງ ແລະ ປ່ຽນຖ່າຍທໍ່ແຈກຢາຍໃນບາງເຂດ ຄາດຄະເນການນຳໃຊ້ທຶນທັງໝົດ 11.800 ຕື້ເຢັນ ຫຼື ປະມານ 95.757 ລ້ານໂດລາສະຫະລັດ ແລະ ຄາດຄະເນການດຳເນີນງານ ໄລຍະທີ 1 ສັນຍາເງິນກູ້ 2/2016 ຄັດເລືອກທີ່ປຶກສາ 11/2015 ຄັດເລືອກຜູ້ຮັບເໝົາ 8/2017 ແຜນການກໍ່ສ້າງ 11/2018-4/2021 ແລະ ການດຳເນີນງານໄລຍະທີ 2 ແຕ່ປີ 2023-2025.
ແຫລ່ງຂ່າວ:
