ຂປລ. ກອງປະຊຸມໃຫຍ່ ຜູ້ແທນສະຫະພັນ ກຳມະບານລາວ ທົ່ວປະເທດ ຄັ້ງທີ VII ໄຂຂຶ້ນຢ່າງເປັນທາງການ ໃນວັນທີ 14 ຕຸລາ 2015 ນີ້, ຢູ່ ນະຄອນ ຫລວງວຽງຈັນ ໂດຍເປັນກຽດເຂົ້າຮ່ວມຂອງ ທ່ານ ບຸນຍັງ ວໍລະຈິດ ຮອງປະທານປະເທດ ແຫ່ງ ສປປ ລາວ, ບັນດາການນຳ ພັກ-ລັດ ແລະ ຕາງໜ້າຈາກສະມາຊິກ ກຳມະບານລາວ ໃນທົ່ວປະເທດ ເຂົ້າຮ່ວມ.
ທ່ານ ປ້ານ ນ້ອຍມະນີ ປະທານສູນກາງສະຫະພັນກຳມະບານລາວ ໄດ້ຂຶ້ນຜ່ານບົດລາຍງານການເມືອງ ໂດຍຍົກໃຫ້ເຫັນ ໃນບາງຕອນວ່າ: ໄລຍະ 5 ປີ ຜ່ານມາ ສະຫະພັນ ກຳມະບານລາວ ໄດ້ຮັບການພັດທະນາ ໃຫ້ເຕີບໃຫຍ່ເຂັ້ມແຂງ ເປັນກ້າວໆມາ, ບົດບາດຂອງສະຫະພັນກຳມະບານລາວ ໄດ້ຮັບການຍົກສູງຂຶ້ນເລື້ອຍໆ, ໄດ້ເປັນໃຈກາງເຕົ້າໂຮມ ຄວາມສາມັກຄີ, ສຶກສາອົບຮົມ ແລະ ປົກປ້ອງສິດຜົນປະໂຫຍດ ອັນຊອບທຳຂອງຊົນຊັ້ນກຳມະກອນ-ຊາວຜູ້ອອກແຮງງານລາວບັນດາເຜົ່າ, ເຄື່ອນໄຫວຖືກຕ້ອງຕາມສິດຂອບເຂດ ຄວາມຮັບຜິດຊອບຂອງຕົນ, ຍົກສູງບົດບາດ ແລະ ຄວາມເຊື່ອໝັ້ນ ຂອງຖັນແຖວພະນັກງານ, ລັດຖະກອນ, ສະມາຊິກກຳມະບານ, ກຳມະກອນ-ຊາວຜູ້ອອກແຮງງານ ໃນທຸກຂົງເຂດວຽກງານ, ການຈັດຕັ້ງກຳມະບານ ໄດ້ຮັບການສ້າງຕັ້ງຂຶ້ນ ຕາມບັນດາຫົວໜ່ວຍແຮງງານ ນັບທັງພາກລັດ ແລະ ເອກະຊົນ ແລະ ຜົນປະໂຫຍດຂອງ ກຳມະກອນ-ຊາວຜູ້ອອກແຮງງານ ນັບມື້ນັບໄດ້ຮັບການຄ້ຳປະກັນດີຂຶ້ນ.
ຈາກນັ້ນ ກອງປະຊຸມ ຍັງໄດ້ພ້ອມກັນ ສັງເກດຕີລາຄາ ແລະ ຮັບຮອງເອົາບົດລາຍງານການເມືອງ ການຈັດຕັ້ງປະຕິບັດ ມະຕິກອງປະຊຸມໃຫຍ່ ຜູ້ແທນສະຫະພັນ ກຳມະບານລາວ ທົ່ວປະເທດ ຄັ້ງທີ VI ໃນຕະຫລອດໄລຍະ 5 ປີ ຜ່ານມາ ແລະ ວາງທິດທາງແຜນການໃນ 5 ປີ ໃນຕໍ່ໜ້າ (2016-2020), ຮັບຮອງເອົາກົດລະບຽບ ຂອງສະຫະພັນກຳມະບານລາວ ສະບັບປັບປຸງໃໝ່, ຮັບຮອງເອົາບົດສຳຫລວດ ຂອງຄະນະບໍລິຫານງານ ສູນກາງສະຫະພັນກຳມະບານລາວ ຊຸດທີ VI, ຮັບຮອງເອົາແຜນຍຸດທະສາດ ພັດທະນາກຳມະບານລາວ ແຕ່ປີ 2016-2020 ແລະ ແຕ່ປີ 2020-2025, ວິໄສທັດໃນການພັດທະນາ ກຳມະບານລາວ ເຖິງປີ 2030 ແລະ ຮັບຮອງເອົາຮ່າງຂໍ້ແຂ່ງຂັນ 2 ດີ 5 ເປັນເຈົ້າ. ນອກຈາກນັ້ນ ຍັງໄດ້ດຳເນີນ ການເລືອກຕັ້ງເອົາຄະນະບໍລິຫານງານ ສູນກາງສະຫະພັນ ກຳມະບານລາວ ຊຸດໃໝ່.
ໃນໂອກາດ ດຽວກັນນີ້, ທ່ານ ບຸນຍັງ ວໍລະຈິດ ໄດ້ໃຫ້ທິດເຍືອງທາງ ໃຫ້ບັນດາ ພະນັງານ-ລັດຖະກອນ ກໍຄື ສະຫະພັນ ກຳມະບານລາວ ເອົາໃຈໃສ່ສືບຕໍ່ຈັດຕັ້ງ ປະຕິບັດໜ້າທີວຽກງານ ວິຊາສະເພາະຂອງຕົນ ໃຫ້ໄດ້ຮັບໝາກຜົນ ແລະ ໄດ້ຮັບການພັດທະນາ ຂຶ້ນຢ່າງຕໍ່ເນື່ອງ.
ແຫລ່ງຂ່າວ:
