MasterCard ເປີດຕົວເທກໂນໂລຍີຢືນຢັນຕົວຕົນດ້ວຍເຊລຟີ່ ສຳລັບການເຮັດການຄ້າຂາຍທາງອອນໄລນ໌ເທິງສະມາດໂຟນ
ເມື່ອວັນທີ່ 9 ຕຸລາ MasterCard ໄດ້ເປີດຕົວເທກໂນໂລຍີໃໝ່ໃນການເຮັດວຽກອອນໄລນ໌ເທິງສະມາດໂຟນ ສຳລັບຢືນຢັນຕົວຕົນດ້ວຍການຖ່າຍເຊລຟີ່ ຊຶ່ງຈະສະດວກແລະປອດໄພຫລາຍກວ່າການໃຊ້ລະຫັດຜ່ານຫລື PIN ແບບເກົ່າ ໂດຍເມື່ອຜູ້ໃຊ້ເລືອກເຮັດວຽກຜ່ານແອັບພິເຄຊັ່ນທີ່ເຊື່ອມກັບບັດເຄດິດ ລະບົບກໍຈະໃຫ້ຢືນຢັນຕົວ ຊຶ່ງສາມາດເລືອກໄດ້ວ່າຈະຢືນຢັນຕົວຕົນດ້ວຍການສະແກນລາຍນິ້ວມືຫລືສະແກນໃບໜ້າ (ໃນກໍລະນີທີ່ສະມາດໂຟນສາມາດສະແກນລາຍນິ້ວມືໄດ້) ໂດຍການສະແກນໃບໜ້ານັ້ນຈະເປັນການໃຊ້ກ້ອງໜ້າເຊັ່ນດຽວກັບການຖ່າຍເຊລຟີ່ທົ່ວໄປ
ສຳລັບການເຮັດວຽກງານຂອງລະບົບຢືນຢັນຕົວຕົນດ້ວຍໃບໜ້ານັ້ນ ຜູ້ໃຊ້ຈະຕ້ອງຕັ້ງກ້ອງໃຫ້ໃບໜ້າຢູ່ໃນຂອບວົງມັນ ຈາກນັ້ນໃຫ້ກະພິບຕາ ໂດຍການກະພິບຕາຈະເປັນການກວດສອບວ່າເປັນໃບໜ້າແທ້ໆ ຫລື ບໍ່ແມ່ນພາບຖ່າຍທີ່ເອົາມາຕົວະໃຫ້ລະບົບເຊື່ອ ເມື່ອລະບົບກວດສອບຮຽບຮ້ອຍແລ້ວກໍຈະສາມາດເຮັດວຽກໄດ້ທັນທີ
ທາງ MasterCard ໄດ້ລະບຸວ່າ ຈະບໍ່ມີການຈັດເກັບຂໍ້ມູນເຊລຟີ່ຂອງຜູ້ໃຊ້ເອົາໄວ້ເທິງ ເຊີບເວີລ໌ ຊຶ່ງຖ້າຫາກ ເຊີບເວີລ໌ຖືກແຮັກ ກໍຈະບໍ່ສາມາດປອມໃບໜ້າຂອງຜູ້ໃຊ້ຂຶ້ນມາໃໝ່ໄດ້
ຢ່າງໃດກໍຕາມເທກໂນໂລຍີດັ່ງກ່າວກຳລັງຢູ່ໃນລະຫວ່າງການທົດສອບໃນບາງປະເທດ ເຊັ່ນ ເນເທີແລນດ໌ ແລະ ສະຫະລັດອະເມຣິກາ ແລະ ຄາດວ່າໜ້າຈະໄດ້ນຳມາໃຊ້ງານຢ່າງແພ່ຫລາຍໃນອະນາຄົດ