ສຳນັກຂ່າວຕ່າງປະເທດ ລາຍງານໃນວັນທີ 12 ຕຸລາຜ່ານມານີ້ວ່າ ທ່ານ ຄັດກາ ປຣາສາດ ໂອລີ ປະທານພັກກອມມູນິດເນປານ ໄດ້ຮັບເລືອກຕັ້ງຈາກສະມາຊິກລັດຖະສະພາ ໃຫ້ດຳລົງຕຳແໜ່ງເປັນນາຍົກລັດຖະມົນຕີຄົນໃໝ່ຂອງປະເທດ ດ້ວຍຄະແນນສຽງສະໜັບສະໜູນ 338 ສຽງ ຈາກຈຳນວນທັງໝົດ 597 ສຽງ ໃນວັນທີ 11 ຕຸລາຜ່ານມານີ້ ເຮັດໃຫ້ຜູ້ນຳຂອງພັກກອມມູນິດເນປານ ກາຍເປັນນາຍົກລັດຖະມົນຕີຄົນທຳອິດ ທີ່ເຂົ້າມາບໍລິຫານປະເທດ ພາຍຫລັງການປະກາດໃຊ້ລັດຖະທຳມະນູນແຫ່ງປະເທດເນປານສະບັບໃໝ່.

ທັງນີ້ ທ່ານ ຄັດກາ ປຣາສາດ ໂອລີ ໄດ້ຮັບການເລືອກຕັ້ງໃຫ້ເປັນປະທານພັກກອມມູນິດແຫ່ງປະເທດເນປານ ໃນເດືອນກໍລະກົດປີ 2014 ຊຶ່ງທ່ານເຄີຍດຳລົງຕຳແໜ່ງເປັນລັດຖະມົນຕີວ່າການກະຊວງພາຍໃນ ລະຫວ່າງປີ 1994 – 1995 ແລະ ເຄີຍດຳລົງຕຳແໜ່ງຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຂອງລັດຖະບານຊົ່ວຄາວໃນປີ 2006 ອີກດ້ວຍ.