ຂປລ. ເປີດຫ້ອງມູນເຊື້ອວຽກງານການຕ່າງປະເທດ ໃນໂອກາດສະເຫລີມສະຫລອງ ວັນການທູດລາວ ຄົບຮອບ 70 ປີ (12/10/1945-12/10/2015) ທີ່ກະຊວງການຕ່າງປະເທດ ໂດຍມີທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ, ມີບັນດາຮອງນາຍົກ ລັດຖະມົນຕີ, ລັດຖະມົນຕີວ່າການ-ຊ່ວຍວ່າການ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ສະເຫລີມໄຊ ກົມມະສິດ ລັດຖະມົນຕີຊ່ວຍວ່າການ ກະຊວງການຕ່າງປະເທດ ກ່າວວ່າ: ການສ້າງຫ້ອງມູນເຊື້ອ ການເຄື່ອນໄຫວວຽກງານ ການຕ່າງປະເທດ ແມ່ນເພື່ອເຕົ້າໂຮມເອົາຜົນງານ ການຈັດຕັ້ງປະຕິບັດ ແນວທາງການຕ່າງປະເທດ ຂອງພັກ-ລັດ ກໍຄືຂະແໜງການຕ່າງປະເທດ ໃນແຕ່ລະໄລຍະ ເພື່ອເປັນອະນຸສອນ ປະໄວ້ໃຫ້ແກ່ນັກການທູດລຸ້ນໜຸ່ມ, ກໍຄືພະນັກງານ, ທະຫານ, ຕໍາຫລວດຕະຫລອດຮອດນັກຮຽນຮູ້, ນັກສຶກສາ ແລະ ຜູ້ທີ່ມີຄວາມສົນໃຈ ໄດ້ເຂົ້າຢ້ຽມຊົມ, ສຶກສາ, ຄົ້ນຄວ້າກ່ຽວກັບມູນເຊື້ອ ຂອງນັກການທູດລຸ້ນຕ່າງໆ ໃນໄລຍະຜ່ານມາ.
ຮູບ ພາບ ແລະ ເອກະສານສໍາຄັນຕ່າງໆ ທີ່ນໍາມາວາງສະແດງໃນຄັ້ງນີ້ ລ້ວນແຕ່ສະແດງໃຫ້ເຫັນ ຂະບວນການເຄື່ອນໄຫວຕໍ່ສູ້ ໃນໄລຍະເຮັດການປະຕິວັດຊາດ ປະຊາທິປະໄຕ ເພື່ອປົດປ່ອຍປະເທດຊາດ ເຊິ່ງເປັນການຕໍ່ສູ້ຢ່າງດຸເດືອດ ຂ້ຽວຂາດອັນເຕັມໄປດ້ວຍ ການເສຍສະຫລະເລືອດເນື້ອ, ຊີວິດຂອງນັກຮົບປະຕິວັດ ທີ່ນັບບໍ່ຖ້ວນ ບວກກັບການຕໍ່ສູ້ ໃນເວທີການເມືອງ, ການທູດທີ່ແຫລມຄົມ, ໄດ້ເຮັດໃຫ້ການປະຕິວັດລາວ ສາມາດສ້າງໜ້າປະຫວັດສາດ ອັນໃໝ່, ອັນເປັນພື້ນຖານອັນໜັກແໜ້ນ ໃຫ້ແກ່ການລຸກຮື້ຂຶ້ນຢືດອໍານາດ ແລະ ໄດ້ສະຖາປະນາເປັນ ສປປ ລາວ ຢ່າງສະຫງ່າຜ່າເຜີຍ. ພ້ອມນີ້ ຍັງໄດ້ສະແດງໃຫ້ເຫັນເຖິງຜົນງານການປະກອບສ່ວນຂອງບັນດາການນໍາ ຂັ້ນສູງຂອງພັກ-ລັດ, ບັນດາພະນັກງານການທູດ ແລະ ຂະແໜງການຕ່າງໆ ໃນການປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາປະເທດຊາດ.
ແຫລ່ງຂ່າວ:
