ຂປລ. ເນື່ອງໃນໂອກາດ ທ່ານ ດຣ. ບຸນປອນ ບຸດຕະນະວົງ ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດ ມະຫາພາກ ແລະ ບໍລິການ ພ້ອມດ້ວຍຄະນະ ທີ່ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອຸດົມໄຊ ລະຫວ່າງວັນທີ 9-10 ຕຸລາ 2015. ໂອກາດນີ້, ທ່ານ ຮອງນາຍົກລັດຖະມົນຕີ ຍັງໄດ້ໄປຢ້ຽມຢາມ ໂຮງງານອາຫານສັດອຸດົມໄຊ ໂດຍໄດ້ຮັບການຕ້ອນຮັບ ຈາກທ່ານ ເຟີງໂຮ ຫົວໜ້າອຳນວຍການ ປຸງແຕ່ງຫົວອາຫານສັດ ອຸດົມໄຊ ພ້ອມດ້ວຍບັນດາພະນັກງານ.
ໃນ ການເຄື່ອນໄຫວຢ້ຽມຢາມຄັ້ງນີ້, ທ່ານ ຮອງນາຍົກລັດຖະມົນຕີ ໄດ້ຮັບຟັງການລາຍງານສະພາບ ຄວາມເປັນມາໂດຍຫຍໍ້ ກ່ຽວກັບໂຮງງານ ຫົວອາຫານສັດອຸດົມໄຊ ຈາກທ່ານ ຫົວໜ້າ ອຳນວຍການ ປຸງແຕ່ງຫົວອາຫານສັດອຸດົມໄຊ ວ່າ: ໂຮງງານແຫ່ງນີ້ ໄດ້ເລີ່ມລົງມືກໍ່ສ້າງມາແຕ່ປີ 2012 ແລະ ສຳເລັດການກໍ່ສ້າງໃນປີ 2013 ດ້ວຍມູນຄ່າການກໍ່ສ້າງ 5 ລ້ານກວ່າໂດລາສະຫລັດ ເຊິ່ງແມ່ນແຂວງຢູນານ ສປ ຈີນ ມອບເປັນຂອງຂວັນ ໃຫ້ແກ່ລັດຖະບານລາວ ເພື່ອເປັນການຊ່ວຍພັດທະນາຂະແໜງການປູກຝັງ, ລ້ຽງສັດ ໃນເຂດພາກເໜືອຂອງລາວ ເຊິ່ງໄດ້ເລີ່ມຜະລິດອາຫານສັດ ອອກສູ່ສັງຄົມ ໃນວັນ 21 ມີຖຸນາ 2015. ມາຮອດປະຈຸບັນ ຜະລິດໄດ້ທັງໝົດ 440 ກວ່າໂຕນ, ມີອາຫານປາ, ອາຫານໝູ, ອາຫານໄກ່ ໄດ້ຈຳໜ່າຍແລ້ວ ຢູ່ແຂວງອຸດົມໄຊ, ແຂວງຫລວງນ້ຳທາ, ໄຊຍະບູລີ, ຫລວງພະບາງ ແລະ ຜົ້ງສາລີ. ໄປຄຽງຄູ່ກັນນັ້ນ ບໍລິສັດໄດ້ເປີດໂຮງອົບສາລີ ຢູ່ແຂວງອຸດົມໄຊຕື່ມອີກ ເພື່ອເກັບຊື້ສາລີຈາກກະສິກອນມາອົບເພື່ອປ້ອນໂຮງງານ ແລະ ສ່ວນທີ່ເຫລືອສົ່ງອອກ. ມາຮອດປະຈຸບັນ ສາມາດເກັບຊື້ສາລີອົບແລ້ວ ປະມານ 1.000 ໂຕນ ແລະ ພາຍໃນ 1 ປິ ບໍລິສັດ ໄດ້ວາງເປົ້າໝາຍໄວ້ວ່າ ຈະຜະລິດອາຫານສັດທັງໝົດ 15.000 ໂຕນ, ເຊິ່ງມີອາຫານປາ 10.000 ໂຕນ, ສັດປີກ 2.500 ໂຕນ, ໝູ 2.000 ໂຕນ, ງົວ 500 ໂຕນ, ໃນນີ້ຕ້ອງການວັດຖຸດິບພາຍໃນ ກໍຄືສາລີ ຢ່າງໜ້ອຍ 15.000-20.000 ໂຕນ ເຊິ່ງແມ່ນສາລີຢູ່ພາກເໜືອໃນປະຈຸບັນ. ໃນຕໍ່ໜ້າ ບໍລິສັດມີແຜນການລົງທຶນຢູ່ລາວ ໂດຍຈະສ້າງບໍລິສັດກະສິກຳ, ອຸດສາຫະກຳ ແລະ ບໍລິສັດລ້ຽງສັດ ເພື່ອພັດທະນາກະສິກຳ, ປ່າໄມ້, ລ້ຽງ ສັດ ໃຫ້ເປັນລະບົບຄົບຊຸດ.
ໃນໂອກາດດຽວກັນນີ້, ທ່ານ ດຣ. ບຸນປອນ ບຸດຕະນະວົງ ໄດ້ໄປຢ້ຽມຢາມ ໂຄງການກໍ່ສ້າງ ສະຖານີຖ່າຍທອດ ວິທະຍຸ-ໂທລະພາບ ແຫ່ງຊາດ ປະຈຳພາກເໜືອ ແຂວງອຸດົມໄຊ ລວມມີໜ້າວຽກທັງໝົດ 15 ລາຍການ, ດ້ວຍມູນຄ່າການກໍ່ສ້າງ 1,7 ຕື້ກວ່າດົງ( ສະກຸນເງິນຫວຽດນາມ). ມາຮອດປະຈຸບັນ ກຳລັງຂຸ້ນຂ້ຽວດຳເນີນການກໍ່ສ້າງ ເພື່ອໃຫ້ສຳເລັດຕາມແຜນການ.
ແຫລ່ງຂ່າວ:
