ສູນກາງຊາວໜຸ່ມປະຊາຊົນປະຕິວັດລາວ (ຊປປລ) ໄດ້ຈັດງານວາງສະແດງສິລະປະ-ວັດທະນະທຳຂອງຄະນະຊາວໜຸ່ມລາວ ໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ ຄັ້ງທີ 42 ປະຈຳປີ 2015 ວັນທີ 7 ຕຸລາ 2015 ຢູ່ທີ່ຫໍວັດທະນະທຳແຫ່ງຊາດ ໂດຍການເປັນປະທານຂອງທ່ານ ດຣ. ວິໄລວົງ ບຸດດາຄຳ ເລຂາຄະນະບໍລິຫານງານສູນກາງ ຊປປລ ມີທ່ານ ທັດສະພອນ ເລີດຖາວອນ ຫົວໜ້າຄະນະຊາວໜຸ່ມລາວ ໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ ພ້ອມດ້ວຍບັນດາທູດ ທູຕານຸທູດປະເທດອາຊຽນ ພະນັກງານການນຳຊາວໜຸ່ມ ສະມາຊິກຊາວໜຸ່ມ ຕະຫຼອດຮອດພໍ່ແມ່ປະຊາຊົນພາຍໃນນະຄອນຫຼວງວຽງຈັນ ແລະ ແຂກທີ່ຖືກເຊີນເຂົ້າຮ່ວມ.
ທ່ານເລຂາຄະນະບໍລິຫານງານສູນກາງ ຊປປລ ກ່າວວ່າ: ໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ ແມ່ນໂຄງການຮ່ວມມືລະຫວ່າງລັດຖະບານຍີ່ປຸ່ນ ກັບລັດຖະບານບັນດາປະເທດອາຊຽນ ທີ່ໄດ້ສ້າງຕັ້ງໃນປີ 1974 ໃນເບື້ອງຕົ້ນມີ 5 ປະເທດສະມາຊິກອາຊຽນເຂົ້າຮ່ວມໂຄງການ ຄື: ອິນໂດເນເຊຍ ມາເລເຊຍ ສິງກະໂປ ຟີລິບປິນ ແລະ ໄທ ຍ້ອນເຫັນໄດ້ຄວາມສຳຄັນ ການພົວພັນໃນອະນາຄົດຂອງການພົວພັນຮ່ວມມື ມາໃນປີ 1985 ປະເທດບຣູໄນ ເຂົ້າຮ່ວມ 1996 ປະເທດຫວຽດນາມເຂົ້າຮ່ວມ 1998 ສປປ ລາວ ມຽນມາເຂົ້າຮ່ວມ ແລະ ມາຮອດປີ 2000 ປະເທດກຳປູເຈຍເຂົ້າຮ່ວມເປັນອັນດັບທີ 10 ເຊິ່ງການສະແດງດັ່ງກ່າວໃນຄັ້ງນີ້ ເປັນກິດຈະກຳໜຶ່ງໃນເດືອນຕຸລາທີ່ມີຄວາມໝາຍສຳຄັນທາງປະຫວັດສາດ ເຊັ່ນ: ວັນປະກາດເອກະລາດ 12 ຕຸລາ ວັນການທູດລາວ ຄົບຮອບ 70 ປີ ທັງເປັນການສ້າງຂະບວນການຄຳນັບຮັບຕ້ອນກອງປະຊຸມໃຫຍ່ ຜູ້ແທນຊາວໜຸ່ມທົ່ວປະເທດ ຄັ້ງທີ VII ແລະ ກອງປະຊຸມໃຫຍ່ ຄັ້ງທີ X ຂອງພັກ ພ້ອມກັນນັ້ນ ກໍ່ເພື່ອສະເຫຼີມສະຫຼອງສາຍພົວພັນການທູດ ລະຫວ່າງ ສປປ ລາວ-ຍີ່ປຸ່ນ ຍີ່ປຸ່ນ-ສປປ ລາວ ຄົບຮອບ 60 ປີ ແລະ ວັນສຳຄັນຕ່າງໆຂອງຊາດ ນອກນີ້ ການພົວພັນຮ່ວມມືກັບບັນດາປະເທດສະມາຊິກອາຊຽນ ແລະ ຍີ່ປຸ່ນ ໄດ້ເລີ່ມມາຕັ້ງແຕ່ປີ 1973 ເປັນຕົ້ນມາ ເຊິ່ງໃນໄລຍະໃໝ່ນີ້ ຍີ່ປຸ່ນ ແລະ ປະເທດສະມາຊິກອາຊຽນ ໄດ້ຮ່ວມກັນວາງຍຸດທະສາດ ເພື່ອປະຕິບັດໂຄງການແລກປ່ຽນໃນຫຼາຍລະດັບຢ່າງກວ້າງຂວາງ ເປັນຕົ້ນ ທາງດ້ານການເມືອງ ເສດຖະກິດ ວັດທະນະທຳ-ສັງຄົມ ວຽກງານຊາວໜຸ່ມ ແລະ ການທ່ອງທ່ຽວ.
ສຳລັບການສະແດງສິລະປະ-ວັດທະນະທຳຂອງຄະນະຊາວໜຸ່ມລາວ ໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ ຄັ້ງທີ 42 ປະຈຳປີ 2015 ປະກອບມີ: ບົດຟ້ອນສຽງກອງສະຫຼອງໄຊ ສິລະປະ-ວັນນະຄະດີເລື່ອງ ກຳພ້າຜີນ້ອຍ ໄລຍະ 1 ແລະ ໄລຍະ 2 (ຕອນຈົບ) ການສະແດງລວມໝູ່ຈາກອະດີດຄະນະຊາວໜຸ່ມລາວ ໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ ແຕ່ປີ 1978 ເຖິງປີ 2014 ການສະແດງຈາກອະດີດຄະນະຊາວໜຸ່ມລາວ ໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ ປີ 2014 ແລະ ຮ້ອງເພງ ລວມຊື່ Live High ນອກຈາກນີ້ ພາຍໃນງານດັ່ງກ່າວ ຍັງໄດ້ມີການມອບໃບກຽດຕິຄຸນ ແລະ ໃບຍ້ອງຍໍໃຫ້ແກ່ຜູ້ສະໜັບສະໜູນໂຄງການດັ່ງກ່າວອີກດ້ວຍ.
ແຫລ່ງຂ່າວ:
